Урысые Федерацием щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм илъэс 26-рэ ыкIи илъэс 25-рэ зыныбжь нэбгыритIум УФ-м и Уголовнэ кодекс ия 154-рэ статья ия 4-рэ Iахь къыдилъытэрэ бзэджэшIагъэ (шхъухьэ зехьэгъэныр) зэрэ­зэрахьагъэм пае уголовнэ Iофэу къызэIуихыгъэм изэхэ­фын ыкIэм фэкIуагъ.

2021-рэ илъэсым къыщегъэжьагъэу 2023-рэ илъэсым нэс унэе предпри­ниматель бзылъфыгъэм иIофышIэ игъу­сэу Iоф бзаджэу зэкъуадзагъэр лъа­гъэкIотагъ: автоном мысатыу органи­зациеу предпринимательствэ цIыкIумрэ гурытымрэ IэпыIэгъу язытырэм бюд­жет ахъщэу къыфыхагъэкIырэр къызфагъэфедэнэу агу къэкIыгъ.
Ащ пае ахэм документ нэпцIхэр агъэ­хьазырхэу рагъэжьагъ. Предпринимательхэмрэ ежь иIоф къызэIузыхы­гъэхэмрэ веб-сайтхэр, бизнес-планхэр, фирменнэ документхэр агъэхьазырынхэмкIэ яфэIо-фашIэхэр афагъэцакIэхэ фэдэу ашIыти, ахъщэ къаIэкIэхьаным пае ахэр арахьылIэщтыгъэх.
БзэджэшIагъэ зыщызэрахьэгъэ уахътэм къыкIоцI ахэм документ нэпцIэу 130-рэ агъэхьазырыгъ, пстэумкIи сомэ миллиони 3,9-рэ фэдиз хэбзэнчъэу къызIэкIагъэхьагъ.
Урысыем и ФСБ и ГъэIорышIапIэу Адыгэ Республикэм щыIэм иIофышIэхэм унэе предприниматель бзылъфыгъэмрэ ащ игъусагъэмрэ яхэбзэнчъэ зекIуакIэ гъунэ фашIыгъ.
Урысые Федерацием и Уголовнэ кодекс ия 159-рэ статья ия 4-рэ Iахь зигугъу къышIырэ уголовнэ Iофэу прокуратурэм изэфэхьысыжь зигъусэр хьыкумыр хэплъэным пае фагъэхьыгъ.
Урысыем щынэгъончъэнымкIэ и Федеральнэ къулыкъу
Адыгэ РеспубликэмкIэ и ГъэIорышIапIэ
ипресс-къулыкъу.