ГъэпцIакIом зыдэгущыIэ нэуж илъэс 22-рэ зыныбжь кIалэу Мыекъопэ районым щыпсэурэм ахъщабэ шIокIодыгъ.

Полицием икъулыкъушIэхэм зэрагъэунэфыгъэмкIэ, ащ ымышIэрэ горэ къыфытеуи, банкым иIофышIэу къыриIуагъ. Икартэ илъ ахъщэр гъэпцIакIохэм рахыным ищынагъо щыIэу гуригъэIуагъ, ащ пае ахъщэр «щынэгъончъэ счетым» ригъэхьанэу къыриIуагъ. Иахъщэ шIокIодыным кIалэр тещынахьи, гъэпцIакIом зэриIуагъэм тетэу зекIуагъ, къыриIогъэ счетым сомэ мин 760-рэ ригъэхьагъ. Нэужым «банкым иIофышIэ» зигъэкIодыжьыгъ. Мы хъугъэ-шIагъэм фэгъэхьыгъэу Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм уголовнэ Iоф къызэIуихыгъ. Полицием икъулыкъушIэхэр цIыфхэм къяджэх гъэпцIакIохэм цыхьэ афамышIынэу, телефонымкIэ зарамыгъэгъэделэнэу. Зыщышъумыгъэгъупш: банкым иIофышIэ цIыфхэм афытеорэп ыкIи «щынэгъончъэ счет» щыIэп.