Зымылъэгъухэрэм яспорт лъэпкъэу голболымкIэ я II-рэ кIэлэцIыкIу-ныбжьыкIэ зэнэкъокъухэр Московскэ хэкум ит къалэу Раменскэм щыкIуагъэх.

Адыгэ Республикэм илIыкIохэм гъэхъэгъэшIухэр ашIыгъэх, хагъэу­нэфыкIырэ чIыпIищ къыдахыгъ. Апэрэу илъэси 10 — 13 зыныбжь­хэр зыхэлэжьэгъэхэ лъэпкъ зэ­нэкъокъухэр рагъэкIокIыгъэх.
Зыныбжь илъэс 13-м емыхъугъэ пшъашъэхэм язэнэкъокъу щы­текIуагъ Московскэ хэкум икомандэ. Адыгеим илIыкIохэм хагъэунэфыкIырэ чIыпIэ къафагъэшъошагъ. КIалэхэмкIэ Подмосковьем испортсменхэм пэрытныгъэр аубытыгъ, Нижегородскэ хэкум икомандэ ятIонэр. Ящэнэрэ чIыпIэм фэбэнагъэх Адыгеим ыкIи Краснодар краим якомандэхэр. Республикэм испортсменхэр хэп­шIыкIэу нахь лъэшыгъэх, 11:1-у текIоныгъэр къыдахыгъ ыкIи джэрз медальхэр къахьыгъэх. Илъэс 14 — 17 зыныбжь пшъа­шъэхэм язэнэкъокъу щытекIуа­гъэх Нижегородскэ хэкур къэзыгъэлъэ­гъуагъэхэр, ахэр гъогогъуитIо ти­командэ нахь лъэшыгъэх. Адыге­им илIыкIохэр Липецкэ хэкум испортсменхэм апэ ишъы­гъэх ыкIи ящэнэрэ чIыпIэр къыдахыгъ. Илъэс 14 — 17 зыныбжь кIалэхэми заушэтыгъ. Мы купым анахь щылъэшыгъ Краснодар краир къэзыгъэлъэгъогъэ Ер­мэлхьаблэ икомандэ. Финалым ар Московскэ хэкум щыIукIагъ ыкIи 12:10-у текIоныгъэр къыдихыгъ.

Зымылъэгъухэрэм яспорт хэ­хъоныгъэ ышIынымкIэ, мыщ пыщагъэхэм ыкIи зэнэкъокъухэм ахэлажьэхэрэм япчъагъэ на­хьыбэ хъунымкIэ мыщ фэдэ Iоф­тхьабзэхэм шIогъэшхо къызэратырэм щэч хэлъэп. Ащ дакIоу шъолъыр командэхэр ыкIи тренерхэр опытэу аIэкIэлъымкIэ зэ­­хъожьых. Зэнэкъокъум зыщызыушэтыгъэхэм ухьазырыныгъэ дэгъу къызэрагъэлъэгъуагъэр зэ­хэщакIохэм хагъэунэфыкIыгъ.