Зэдегъэштэн есынымкIэ щэгъогогъо олимпийскэ чемпионкэу Ольга Брусникинар республикэм икъэлэ шъхьаIэ щыIагъ.

ЗэлъашIэрэ спортсменкэм, псым епхыгъэ спорт лъэпкъхэмкIэ Федерацием ивице-президентым илъэс къэс гъэмэфэ зыгъэ­псэфыгъо мазэхэм шъолъырхэр къекIухьэх.
2018-рэ илъэсым щегъэжьа­гъэу олимпийскэ резервым испорт еджапIэу В. С. Максимовым ыцIэ зыхьырэм зэдегъэштэн есынымкIэ къутамэм Iоф щешIэ.Спорт­сменхэр зыгъасэхэрэр Урысыем изаслуженнэ тренерэу Нина Го­ворковар ары. Мы илъэсым рес­публикэм илIыкIохэм гъэхъэгъэшIухэр ашIыгъэх, команднэ зэ­нэ­къокъухэм язэфэхьысыжьхэмкIэ спортым имастер хъунхэмкIэ шапхъэхэр агъэцэкIагъэх.

Ольга Брусникинам анахьэу ынаIэ зытыридзагъэр спортсменхэм зэрифэшъуашэу турнирхэм зафагъэхьазырынымкIэ, загъэсэнымкIэ амалэу аIэкIэлъхэр ары. Ар спортсмен ныбжьыкIэхэм ыкIи ахэм янэ-ятэхэм адэгущыIагъ, ылъэгъугъэм зэригъэрэзагъэр хи­гъэунэфыкIыгъ, ау зэдегъэштэн есыным хэхъоныгъэ ышIыным пае бассейн тедзэхэр шъолъырым щышIыгъэнхэм мэхьанэшхо иIэу ылъытагъ. Джащ фэдэу спорт инфраструктурэм зегъэушъомбгъу­гъэным иIофыгъуи тегущыIагъэх.