ЕджапIэхэм яигъэкIотыгъэ гъэцэкIэжьынкIэ программэр зэшIохыгъэ зэрэхъурэм иуплъэ­кIун къыдыхэлъыта­гъэу Адыгэ Республикэм и ЛIышъхьэу КъумпIыл Мурат къалэу Мыекъуапэ дэт гурыт еджапIэу N 17-м щыIагъ.

Лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм ифедеральнэ проектэу «АнахьышIур зэкIэ кIэлэцIыкIухэм апай» зыцIэм тегъэ­псыхьагъэу гъэсэныгъэ зыщарагъэгъо­тырэ организациехэу непэкIэ игъэкIотыгъэ гъэцэкIэжьынхэр зэрашIылIэхэрэм ар ахэхьагъ.
Республикэм и ЛIышъхьэ игъуса­гъэх федеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэ игуадзэу Хъоткъо Хъызыр, гъэсэныгъэмрэ шIэны­гъэмрэкIэ министрэм игуадзэу Пэрэныкъо Сусанэ, Мыекъуапэ имэрэу Геннадий Митрофановыр, федеральнэ программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, гъэсэныгъэ зыщарагъэгъотырэ учреждением иадминистрацие илIыкIохэр, подрядчикхэр.

Гурыт еджапIэу N 17-р 1979-рэ илъэсым ашIыгъагъ, аужырэу загъэцэкIэжьыгъагъэр 2018-рэ илъэсыр ары. Джы непэ мыщ IофшIэнышхохэр щагъэцакIэх: инженер коммуникациехэр зэблахъух, уахътэм диштэрэ анахь псэолъэпхъэ дэгъухэр агъэфедэх. Ащ нэмыкIэу Iэмэ-псымэу ящыкIэгъэщтхэр ыкIи мебелыкIэр ращэфынхэу ахъщэ къафыхагъэкIыгъ. ЕджапIэр зычIэт унэм ышъхьэ агъэцэкIэжьыгъ, фабэр, псыр зэрыкIощтхэр, шъхьаныгъупчъэ блыпкъхэм ащыщхэр зэблахъугъэх, видеолъыплъэнымрэ машIом зы­къыштэмэ макъэ къэзыгъэIущт системэхэмрэ хагъэуцуагъэх. Зыщеджэхэрэ кабинетхэр, спортзалыр, нэмыкI унэхэр зэтырагъэпсыхьэх.
ЕджапIэм икъэплъыхьан зыщыкIогъэ лъэхъаным республикэм и ЛIышъхьэ къыхигъэщыгъ гъэцэкIэжьын Iофтхьабзэхэр зэкIэ игъом зэшIохыгъэнхэм мэхьанэшхо зэриIэр. Ащ дакIоу пстэуми анахь шъхьаIэр еджапIэр щынэ­гъончъэу ыкIи кIэлэцIыкIухэмкIэ гуIэтыпIэу щытыныр ары. Ахэм адакIоу КъумпIыл Мурат пшъэрылъхэр афишIыгъэх еджапIэм къыпэIулъ чIыпIэр тэрэзэу зэтегъэпсыхьэгъэнымкIэ.

«ЕджапIэр зэрэпсаоу гъэкIэжьыгъэн фае – ар зэкIэми зэдытипшъэрылъ. Iоф­шIэнхэр дэгъоу, псэолъэшIынымкIэ шапхъэу щыIэхэр амыукъохэу зэшIуахынхэ фае», — къыIуагъ КъумпIыл Мурат.
Адыгеим и ЛIышъхьэ агу къыгъэ­кIыжьыгъ УФ-м и Президентэу Владимир Путиным еджапIэхэм зы сменэу Iоф ашIэным техьэгъэным пае пшъэрылъэу къыгъэуцугъэхэр зэрагъэцакIэхэрэр. Урысыем и Правительствэ иIэпыIэгъу хэлъэу республикэм еджапIэхэм яшIын щэкIо. Мы лъэхъэнэ благъэхэм атыщт псэуалъэхэм ащыщ Урысыем и ЛIы­хъужъэу Роман Тороховым ыцIэкIэ щыт еджэпIакIэу N 1-р, ащ нэбгырэ 1100-рэ чIэфэщт. Мыекъуапэ икъокIыпIэ лъэныкъо непэ щыIэ еджэпIэ закъоу N 17-м тегъэкIагъэр а еджэпIакIэр заухыкIэ нахь макIэ хъущт.
НыбжьыкIэхэр яхэгъэгу фэшъыпкъэхэу пIугъэнхэм иIофыгъохэм Адыгеим и ЛIышъхьэ анахьэу анаIэ тыраригъэдзагъ ыкIи илъэс зэфэшъхьафхэм еджапIэр къэзыухыгъэхэу, ядзэкIолI пшъэрылъ агъэцакIэзэ, хэушъхьафыкIыгъэ дзэ операцием илъэхъани къыхиубытэу, фэхыгъэхэм яшIэжь пхъэмбгъухэр зыдэщытыщтхэ чIыпIэр еджапIэм игъэцэкIэжьын зыщыкIорэ лъэхъаным къыдалъытэнэу пшъэрылъ афишIыгъ.
Iофтхьабзэм икIэухым Адыгеим и ЛIышъхьэ Мыекъуапэ иадминистрациерэ гъэсэныгъэмрэ шIэныгъэмрэкIэ АР-м и Министерствэрэ пшъэрылъ афишIыгъ Iофхэр зэрэкIохэрэм икъоу анаIэ тырагъэтынэу, Iофыгъоу къэуцухэрэр нахь псынкIэу зэшIуахыхэзэ ашIынэу.
Шъугу къэтэгъэкIыжьы: Урысыем гъэ­сэныгъэмкIэ и Министерствэ игъэ­кIотыгъэ гъэцэкIэжьынхэр зэрэзэшIуа­хыщтхэ программэу зэхигъэуцогъа­гъэм къыхиубытэрэ псэуалъэхэм ахэфэгъагъ Адыгэ РеспубликэмкIэ 2025-рэ илъэсым къыщегъэжьагъэу 2027-рэ илъэсым нэс игъэкIотыгъэ гъэцэкIэжьынхэр зэрашIылIэщтхэ организацие 27-рэ. Мы илъэсым Адыгеим имуниципалитет зэфэшъхьафхэм яеджэпIи 9-мэ игъэ­кIотыгъэ гъэцэкIэжьынхэр арашIылIэщтых.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.