Къэбэртэе шы лъэпкъхэм яушэтынышхоу «Адыгэ зекIо-Фыщт 2025» зыфиIорэм Адыгеим зыфегъэхьазыры. Iофтхьабзэм изэхэщакIу Адыгеим иобщественнэ дви­жениеу «Шыу Хасэр». Проектыр пхырыщыгъэнымкIэ зи­шIуагъэ къэкIуагъэр президент грантхэмкIэ Фондымрэ Адыгэ Республикэм игрантхэмрэ.

ШышъхьэIум къушъхьэлъэ чIыпIэхэм а ушэтынхэр ащыкIощтых, шэу хэлэжьэщтхэр кIочIэшхо, пытагъэ зыхэлъхэр, къушъхьэхэм къащакIухьанхэм фыте­гъэпсыхьагъэхэр ары. Ахэм километрэ 60 акIущт. Анахь ухьазырыныгъэ дэгъу зиIэ шыухэмрэ шыхэмрэ ары ар зэпызычын зылъэкIыщтхэр.
Мы Iофтхьабзэр зыфэгъэхьыгъэр къэбэртэе шы лъэпкъхэу джырэ уахътэм щыIэхэм къушъхьэлъэ чIыпIэхэм акIуа­чIэрэ ящэIэгъэ-пытагъэрэ ащыгъэунэфыгъэныр, ахэм атесыщтхэми яIэпэIэсэныгъэ, шым иамалхэр икъоу къы­далъытэшъунхэмкIэ къулайныгъэу аIэ­кIэлъыр гъэунэфыгъэнхэр ары. Къэбэр-­тэе шы лъэпкъышIухэр дунаим щызэ­лъашIэнымкIэ зэнэкъокъум ишIуагъэ къэкIощт. Шы спортым ныбжьыкIэхэр нахьыбэу хэщэгъэнхэм, ахэм ягушъхьэ­лэжь баиныгъэ нахь зыкъыIэтыным Iоф­тхьабзэр афэIорышIэщт.
Шыу Хасэм итхьаматэу Тхьапшъэкъо Альберт социальнэ хъытыум инэ­кIубгъо щыхигъэунэфыкIыгъ ткъош рес­публикэхэм азыфагу илъ зэгурыIоны­гъэр, зыкIыныгъэр гъэпытэгъэнхэмкIэ мы Iофтхьабзэм мэхьанэшхо зэриIэр ыкIи зипэщэ организациер ащ зэрэфэ­IорышIэрэр. Шыу зекIо зэнэкъокъум хэлэжьэн фитхэр къэбэртэе шы лъэпкъ­хэу илъэси 5 ыкIи ащ нахьыбэ зыныбжь­хэр арэу зэхэщакIохэм агъэнэфагъ.
Зэнэкъокъум къыращэлIэщтых Адыге­им, Къэбэртэе-Бэлъкъарым ыкIи Къэ­рэщэе-Щэрджэсым яшы лъэпкъ анахьы­шIухэр.
АдыгеимкIэ мы Iофтхьабзэм хэлажьэх командэм ипащэу Цуамыкъо Рэмэзан, Куфэнэ Руслъан, Зыхьэ Руслъан, Гос­тэкъо Алым, Бислъангъур Адам.

ЩыIэныгъэм уилъагъо зэрэщыбгъотыщтым, узэрэзыфырикъужьыщтым, уигу­хэлъхэр къызэрэзыдэбгъэхъущтхэм, гъэ­хъагъэхэм ыкIи къыбдэмыхъугъэхэу уишэн нахь псыхьагъэ зышIыхэрэм мы зекIо Iофтхьабзэр яшыхьат. Шы лъэпкъышIухэр зыгъэIорышIэщтхэр гъогу­уанэм щызэнэкъокъущтых. ИжъыкIэ зэ­рэщытыгъэм фэдэу адыгэ шъуашэхэр ащыгъхэу, гъогу гъомыли, шыхэм яIуси зыдаIыгъэу ушэтынышхор акIущт.
Къэбэртэе шы лъэпкъхэм яушэтынышхоу «Адыгэ зекIо-Фыщт 2025» зыфиIорэм хэлэжьэрэ Бислъангъур Адам «Адыгэ макъэм» зыIуигъэкIагъ, зэнэ­къокъум зызэрэфигъэхьазырырэм зыщигъэгъозагъ.
Бислъангъур Адам илъэс 36-рэ ­ыныбжь, къуаджэу Къэбыхьаблэ къыщыхъугъ. ИцIыкIугъом къыщыублагъэу яунагъо шыхэр ыхъущтыгъ, унэгъо Iофхэр рагъэцакIэщтыгъ. 2017-рэ илъэсым иунэе апэрэ шыр къыщэфыгъ, илъэсыбэ хъугъэу шы къэгъэчъэным пылъ.
— СицIыкIугъом къыщыублагъэу шыхэр шIу сэлъэгъух. Шым узэрэпылъын фаер дэгъоу зышIэрэ цIыфхэр сиупчIэжьэгъух. Илъэси­бгъу хъугъэу шы къэгъэчъэным сыпылъ. ЦIыфымрэ шымрэ дэгъоу тызэгурыIомэ, зекIор псынкIэ къытфэхъущт. Гъогу къиным
ифэшъуашэу зыфэтэгъэхьазыры. Къушъ­хьэтхыхэм ядэкIоени, якъе­хыжьыни, фэбэшхоу щыIэри къемыхьылъэкIыным, фэщэчыным шыр атезгъэпсыхьагъ. Гъогууанэр ифэшъуашэу зэпытчыным сыщэгугъы.
Зэкъошныгъэм изекIо гъогоу тыз­техьащтыр гъогу псынкIэп. Ткъош республикэхэм къарыкIырэ шыухэм нэIуасэ тызэрафэхъущтым лъэшэу сегъэгушIо. Ащ лъэныкъо гъэнэфагъэу къыдыхэлъытагъэхэм яшап­хъэхэм мэзитIу хъугъэу зафэсэгъэ­хьазыры. Шыхэр зыщаIыгъ клубэу «Созвездие» зыфиIорэм иш сыкIэлъэIугъэу Iофтхьабзэм сырыхэлэжьэщт. Шагъдый лъэпкъышIум ыкIуачIи тыуплъэкIущт, сиIэпэIэ­сэныгъи зекIо гъогум къыгъэнэ­фэщт. Зэнэкъокъухэр шъоф зэIухыгъэм, мэз пырыпыцум, къушъхьэ лъагэм ащыкIощтых. Шы лъэп­къышIухэу зэнэкъокъум анахь дэ­гъукIэ щалъытагъэхэр Iофтхьабзэм икIэух щызэрагъэпшэщтых, — къеIуатэ Адам.
Шыхэр шIу зылъэгъухэрэр ахэм ахъщэшхо къарагъэлэжьыным кIэхъопсы­хэрэп. Нахьыбэу зыфэщагъэхэр адыгэ­хэм ящыIэкIэ-псэукIэ шым ифэшъошэ чIыпIэ щырагъэубытыжьыныр ары.
Зылъэгъурэ пстэумэ агъэшIагъоу лIэшIэгъу пчъагъэхэр къызэпичыхи къэ­бэртэе шы лъэпкъышIур непэрэ мафэми къынэсыгъ.
Спортым изы лъэныкъохэм ащыщэу шыхъуныр, ижъырэ шы лъэпкъхэр къэу­хъумэгъэнхэр, а лъэны­къомкIэ хэбзэ шIагъоу щыIэ хъу­гъэхэм зягъэушъомбгъугъэныр непи тищыкIагъ.
— Лъэпкъ шъуашэр зыщыплъэу шым утетIысхьэмэ е урам шъуамбгъом укъырыкIомэ урыпагэу, шъуа­шэр зэрэпщыгъым фэшI «сыадыг» оIокIэ икъурэп. Адыгэ шъуа­шэр зезыхьэрэ адыгэ шыум шэн­хабзэхэри щыIэныгъэм щыпхырищынхэ фае, — хигъэунэфыкIыгъ Адам.
Адыгеим шыхъуным зыкъыщырагъэIэтыжьынэу зэрэфежьагъэхэм уегъэгушIо. Мыщ фэдэ шыу ушэтынхэр Шыу Хасэм зэрэзэхищагъэхэм АдыгеимкIэ мэхьанэшхо иI.
Зэнэкъокъур зэрэкIуагъэр нахь игъэ­кIотыгъэу тигъэзет изичэзыу къыдэкIыгъо къыщыттыжьыщт.
Лъэпшъыкъо Фатим.