Кушъхьэфэчъэ спортымкIэ Урысыем иныбжьы­кIэхэм я Спартакиадэ ия VI-рэ кIэух едзыгъо къалэу Муром щыкIуагъ.

Адыгэ Республикэм испорт­сменкэу Ангелина Винник ухьазырыныгъэ дэгъу къыгъэлъэ­гъуагъ, унэе зэнэкъокъухэм ты­жьын медаль къащихьыгъ. Ти­пшъашъэ ящэнэрэ чIыпIэр къыдэзыхыгъэ Санкт-Петербург ­щыщ Лилия Исмагиловам тIэкIу дэдэкIэ ыпэ ишъыгъ. Мы къэлэ дэдэм щыщ Анастасия Самсо­новам дышъэ медаль фагъэшъошагъ.
Спартакиадэм изэфэхьысыжьхэмкIэ, Адыгеим икомандэ яхэ­нэрэ чIыпIэр ыубытыгъ. Ащ итре­нер шъхьаIэ къызэрэхигъэщы­гъэмкIэ, тиспортсменкэхэм физическэ ухьазырыныгъэ дэгъу къагъэлъэгъуагъ, текIоныгъэм ыкIи хагъэунэфыкIырэ чIыпIэхэм афэ­бэнагъэх. Ахэм къэгъэлъэгъонэу яIэхэм тапэкIэ арагъэхъуным зэрэщыгугъырэр хигъэунэфыкIыгъ. Спартакиадэм хэлэ­жьэгъэ пшъэшъэ ныбжьыкIэхэм яIэпэIэсэныгъэ хагъэхъуагъ. Ащ дакIоу къэралыгъо ыкIи дунэе зэнэкъокъухэм гъэхъагъэхэр аща­шIынхэм, республикэм ыцIэ да­хэкIэ рарагъэIоным зэрэпылъыщтхэр тренер шъхьаIэм къыIуагъ.

Кушъхьэфэчъэ спортым пы­щагъэхэм япчъагъэ нахьыбэ ­хъуным, ащ хэхъоныгъэхэр ышIынхэм, чемпионхэр гъэхьазыры­гъэнхэм афэIорышIэх гъэмэфэ Спартакиадэм фэдэ ныбжьыкIэ Iофтхьабзэхэр.