Лъэбэкъу мини 100 къакIущт
Мыекъуапэ физическэ культурэмкIэ ыкIи спортымкIэ и Комитет лъэс зекIонымкIэ Iофтхьабзэу «Физкультура-УРА!» зыфиIорэм шъухэлэжьэнэу шъурегъэблагъэ.
Физкультурникым и Мафэ ипэгъокIэу ар рагъэкIокIыщт.
ЗэхэщакIохэм зэрагъэнэфагъэмкIэ, Iофтхьабзэм хэлажьэхэрэм тхьамафэм къыкIоцI лъэбэкъу мини 100 къакIун фае. Социальнэ хъытыоу «ВКонтакте» иприложениеу «ШагиВКонтакте» зыфиIорэмкIэ нэбгырэ пэпчъ къыкIугъэ лъэбэкъу пчъагъэр зэхэщакIохэм агъэунэфыщт.
Джырэ уахътэм Iофтхьабзэм хэлажьэ зышIоигъохэм ятхын макIо, ар шышъхьэIум и 11-м рагъэжьэщт. Физкультурникым и Мафэ зэрэхэбгъэунэфыкIын плъэкIыщтым дакIоу, гъэмэфэ марафонэу «Физкультура-УРА!» зыфиIорэм уищыIэныгъэ зэхъокIыныгъэшIухэр фэпшIынхэмкIэ амалышIу къыуитыщт. Ащ дакIоу зызыушэтыхэрэм жьы къабзэм хэтхэу яуахътэ агъэкIощт, япсауныгъэ агъэпытэщт. Джащ фэдэу физкультурэм ыкIи спортым апыщагъэхэр нэIуасэ зэфэхъущтых.
Приложениеу «Шаги ВКонтакте» зыцIэм иамалкIэ нэбгырэ пэпчъ мафэм къыкIугъэ лъэбэкъу пчъагъэр зэригъэшIэн, ищыкIагъэ хъумэ, икъэгъэлъэгъонхэм ахигъэхъон ылъэкIыщт. Марафонэу «Физкультура-УРА!» зыфиIорэм шъухэлэжьэным пае онлайн шIыкIэм тетэу ащ зыщышъутх, Iофтхьабзэм зыфэжъугъэхьазыр.