Адыгеим и ЛIышъхьэу КъумпIыл Мурат Адыгеим истудентхэм я Ассоциацие IофышIэхэмкIэ и ЕджапIэу «Рыфабгъо – зыкIыныгъэм ичIыпI» зыфиIорэм иIофшIэнэу Мыекъопэ районым шышъхьэIум и 1-м къыщегъэжьагъэу и 4-м нэс щыкIуагъэм хэлэжьагъ.

А Iофтхьабзэм щыIагъэх АР-м ныбжьыкIэ IофхэмкIэ и Комитет итхьаматэу Максим Галушкиныр, пшъэрылъыбэ зыгъэцэкIэрэ республикэ ныбжьыкIэ Гупчэм ипащэу Мыгу Бислъан.
Республикэм и ЛIышъхьэ адыриIэгъэ зэIукIэгъум Адыгеим щыщ студенти ­100-м ехъу хэлэжьагъ. Ахэр Урысыем икъэлэ зэфэшъхьафхэм ащеджэх, Адыгеим истудентхэм я Ассоциацие чанэу хэлажьэх. Студент движением хэгъэгум икъэлэ иныбэмэ чIыпIэ гъэнэфагъэ ащиубыты хъугъэ: Москва, Санкт-Петербург, Ростов-на-Дону, Ставрополь, Саратов. Джащ фэдэу мы Iофтхьабзэм къырагъэблэгъагъэх Къэрэщэе-Щэрджэсым, Къэбэртэе-Бэлъкъарым ыкIи Краснодар краим къарыкIыгъэ студентхэр. Мыщ дэжьым къыхэгъэщыгъэн фае республикэм ихэбзэ къулыкъухэм яIэпыIэгъу хэлъэу Ассоциацием иIофшIэн зэрэзэхэщагъэр.

КъумпIыл Мурат зэIукIэр къызэIуихызэ IофышIэхэм я ЕджапIэ хэлажьэхэрэм Адыгеим истудентхэм я Ассоциацие зэхэщагъэ зэрэхъугъэм фэгъэхьыгъэу къафиIотагъ, ныбжьыкIэ политикэм зегъэушъомбгъугъэнымкIэ гухэлъэу щыIэхэми ащигъэгъозагъэх. Республикэм ипащэ къызэрэхигъэщыгъэмкIэ, ныбжьыкIэ движением IэпыIэгъу етыгъэным пае республикэм бэ щашIэрэр. Ахэм ахэхьэх Урысыем и Президентэу Владимир Путиныр кIэщакIо зыфэхъугъэ лъэпкъ проектыкIэхэу «НыбжьыкIэхэмрэ кIэлэцIыкIухэмрэ», «Унагъор» зыфиIохэрэр гъэцэкIагъэ хъунхэр. Республикэм и ЛIышъхьэ блэгъэныгъэ зэфыщытыкIэхэр, зэпхыныгъэхэр щыIэ хъунхэм мэхьа­нэшхо зэриIэм анахьэу ынаIэ тыригъэтыгъ.
«КIалэхэу, тичIыпIэгъухэу нэмыкI къалэхэм ащеджэхэрэм ренэу зэхашIэн фае, Адыгеим пэчыжьэхэ нахь мышIэми, тынаIэ зэратетыр, тызэрягъусэр. Адыгеим истудентхэм я Ассоциацие пшъэрылъэу иIэр студентхэр зэкъуигъэуцонхэр, блэгъэныгъэ-ныбджэгъуныгъэ зэфыщытыкIэхэр зэдыряIэ хъунхэр, тапэкIи зэгъусэхэу щыIэныгъэ гъогум рыкIонхэр, амалэу яIэхэр агъэфедэхэзэ, ягупсэ республикэм яшIуагъэ рагъэкIыныр», — къыIуагъ КъумпIыл Мурат.
ЗэдэгущыIэгъум илъэхъан Адыгеим и ЛIышъхьэ Ассоциацием чанэу хэлажьэхэрэм къяджагъ республикэм икIыгъэ студентхэу нэмыкI къалэхэм ащеджэхэрэми проект гъэшIэгъонхэр пхыращынхэу, республикэми, къэралыгъо­ми якультурнэ шэн-хэбзэ дахэхэр къыдалъытэхэзэ ашIынэу, нахьыкIэхэм щысэ арагъэлъэгъунэу. КъумпIыл Мурат профильнэ комитетым ыкIи республикэ ныбжьыкIэ гупчэм пшъэрылъ афишIыгъ Адыгеим истудентхэм я Ассоциацие кIэщакIо зыфэхъухэрэм тапэкIи адырагъэштэнэу.

ЗэдэгущыIэгъум илъэхъан шъхьафэу къызщыуцугъэхэм ащыщ ныбжьыкIэхэр яхэгъэгу шIу алъэгъоу, ащ фэшъыпкъэхэу пIугъэнхэр. Республикэм и ЛIышъхьэ къызэрэхигъэщыгъэмкIэ, тынаIэ зытедгъэтырэ Геническэ районым щыпсэухэ­рэм IэпыIэгъу ятыгъэным пае тишъо­лъыр Iофышхо егъэцакIэ, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм ишIуагъэ арегъэкIы.
«ТидзэкIолIхэм IэпыIэгъу ятыгъэным зиIахьышхо хэзышIыхьэхэрэм ащыщых гуфакIохэр, патриот движениехэм ахэлажьэхэрэр, партиеу «Единэ Россием», Урысые народнэ фронтым ахэтхэр. Тэ тинэрылъэгъу ныбжьыкIэхэр а IофшIэным хэщагъэ зэрэхъухэрэр, хэушъхьафыкIыгъэ дзэ операцием хэлажьэхэрэм яунагъохэм зэрадеIэхэрэр, дзэ операцием иветеранхэр яIофтхьабзэхэм зэрарагъэблагъэхэрэр – а пстэуми апае тафэраз», — къыIуагъ КъумпIыл Мурат.
Студент движением чанэу хэлажьэхэрэм Ассоциацием хэхъоныгъэ егъэшIыгъэнымкIэ, проектыкIэхэр пхырыщыгъэнхэмкIэ гухэлъэу яIэхэм ­Адыгеим и ЛIышъхьэ ащагъэгъозагъ. Ащ дакIоу къэлэшхохэм ащеджэнхэмкIэ Iоф­шIэкIэшIоу аIэкIэлъ хъугъэм, Iофтхьабзэхэу ахэм ащызэшIуахыгъэхэм афэгъэ­хьыгъэу ЛIышъхьэм къыфаIотагъ. ­Адыгеим и ЛIышъхьэ Ассоциацием IэпыIэгъу зэрэфэхъурэм пае рэзэныгъэ гущыIэхэр къыраIуагъэх.
Мыщ дэжьым къыхэгъэщыгъэн фае: студентхэм я Ассоциацие IофышIэхэмкIэ и ЕджапIэ зыфытегъэпсыхьагъэр яIоф­шIэн шIуагъэу къытырэм зыкъегъэIэтыгъэныр, IэпэIэсэныгъэу ахэлъым зегъэ­ушъомбгъугъэныр ары. Мы Iофтхьабзэм хэлажьэхэрэр анахьэу агукIэ зыфэщэгъэхэ лъэныкъохэм атегъэпсыхьагъэу купи 5-у агощыгъагъэх. Iофтхьабзэм ипрограммэ къызэрэдилъытэрэм тетэу гъэсэныгъэм епхыгъэ блокхэр, джэгукIэ зэфэшъхьафхэр, мастер-классхэр, творческэ, спорт ыкIи культурнэ Iофтхьабзэхэр зэхащагъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.