ЗэкIэми анахь мэфэкI IэшIур ыкIи зыфэдэ къэмыхъугъэр мыгъэ бжыхьэм икъихьагъу хагъэу­нэфыкIыщт – Iоныгъом и 13 – 14-м. Ар, хабзэ зэрэхъу­гъэу, ыпэкIи зыщызэхащэ­щ­тыгъэ чIыпIэм, Дахъо гъэхъу­нэм, джыри щашIыщтыгу.

— Илъэс къэс фестивалым къэралыгъом ишъолъыр зэфэшъхьафхэм къарыкIырэ хьакIэхэр бэу къырещалIэх. Ащыщхэм Адыгеим Iоныгъом къэкIонхэу пэшIорыгъэшъэу агъэнафэ мы мэфэкIым къытефэнхэм пае. Ар гъомылапхъэм епхыгъэ хъугъэ-шIэгъэ закъоп – тихабзэхэм, тикультурэ ыкIи цIыфхэу тишхыныгъохэм яшIыкIэ лIэшIэгъухэм апхырызыщыхэрэм, лIэужхэм анэзыгъэсыжьхэрэм яIофшIагъэ уасэ защыфэтшIырэ хъугъэ-шIагъ, — къы­Iуагъ Адыгеим и ЛIышъхьэу ­КъумпIыл Мурат.
Iофтхьабзэм къыхиубытэу гъомылэп­хъэ уплъэкIуныр, лъэпкъ къэгъэлъэгъон­хэр, мастер-классхэр, фермерхэм къыдагъэкIырэ шхыныгъохэм яермэлыкъ зэхащэщтых. Район зэфэшъхьафхэм щагу цIыкIухэу агъэпсыщтхэм къащагъэлъэгъощт адыгэ къое шъыпкъэр зэрипхыщтыр ыкIи ащ хэшIыкIыгъэ гъомылапхъэхэр зэрэпшIыщтхэр.
— ПшъэдэкIыжь хэлъэу Iофтхьабзэм изэхэщэн къекIолIэнхэу ыкIи зэпстэури къыдыхалъытэнэу пшъэрылъ афэсшIыгъ. Ащ изэхэщэнкIэ IофшIэкIэ амал инхэр тIэкIэлъ хъугъэх. Адыгэ къуаем ифестиваль IэшIуным, республикэм дэгъоу зыщагъэпсэфыным ыкIи ащ щагъэкIорэ уахътэр пстэуми агу къи­нэжьыным апае ищыкIэгъэ пстэури тшIэщт. ХьакIэр зыщагъэлъэпIэрэ Адыгеим идэхагъэрэ идэгъугъэрэ ­ауплъэкIунэу, зэхашIэнэу пстэури къе­сэгъэблагъэ, — къащитхыгъ Адыгеим ипащэ исоциальнэ нэкIубгъохэм.