Лагерэу «Лань» зыфиIорэм мы мафэхэм мастер-класс гъэшIэгъон щыкIуагъ. Пыдзафэхэр бгъэфедэжьыхэзэ шIухьафтын хъущт пкъыгъо зэфэшъхьафхэр зэрэпшIынхэ плъэкIыщтыр кIэлэцIыкIухэм арагъэлъэгъугъ.

ШышъхьэIум и 1-м пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ЭкоЦентр» зыфиIорэм иIофы­шIэхэм Адыгэ Республикэм ныбжьыкIэ IофхэмкIэ и Комитет яIэпыIэгъоу творческэ экологическэ Iофтхьабзэ зэха­щагъ. Лагерым зыщызгъэпсэфырэ нэбгырэ 60 фэдиз ащ хэлэжьагъ.
Iофтхьабзэм ипэублэ пыдзафэхэр къыдэбгъэкIыжьынхэ зэрэплъэкIыщтыр ыкIи ащ мэхьанэу иIэр, тхьапэжъэу аугъоихэрэм пкъыгъуакIэхэр зэрэхашIыкIыжьыхэрэр ыкIи ащ ишIуагъэкIэ хэкIыр зыщыратэкъурэ чIыпIэхэр нахь нэкIы зэрэхъухэрэр, мэзхэр къызэрэзэтенэжьхэрэр къафаIотагъ. Щысэхэр нэужым къахьыгъэх, тхьэпэ пыдзафэхэм якъыдэгъэкIыжьын ишIуагъэкIэ чъыгэу къызэтырагъэнэгъэ пчъагъэр ыкIи респуб­ликэм иэкологие шIуагъэу ащ къыфихьырэр къафаIотагъ.
Теорием ыуж практическэ IофшIэным ыуж ихьагъэх. Тхьапэм IэкIэ хэпшIыкIын плъэкIыщтхэр арагъэлъэгъугъэх. Жъгъэеу упкIэтэгъэ тхьапэхэр псым хагъэкIухьагъэх, ахэр нэужым агъэгъушъыгъэх, хьазыр тхьапэхэр открыткэ ашIыгъэх, художественнэу агъэкIэрэкIагъэх. НыбжьыкIэхэм аIэкIэ ашIыгъэхэм Адыгеим ичIыопс идэхагъэ, икъушъхьэхэр, имэз­хэр, ипсэушъхьэхэр, икъэгъагъэхэр атырашIыхьагъэх. Ахэр сувенир закъо афэхъуныр арэп зэхэщакIохэм пшъэры­лъэу яIагъэр, пыдзафэхэм шIуагъэ къызыпыкIыщт пкъыгъохэр ахэпшIыкIын зэрэплъэкIыщтыр арагъэлъэгъуныр ары.
Мыщ фэдэ Iофтхьабзэхэм яшIуагъэкIэ къыткIэхъухьэрэ лIэужхэм тыкъэзы­уцухьэрэ дунаир къызэрагъэгъунэн фаер, пыдза­фэхэм якъыдэгъэкIыжьын нэбгырэ пэпчъ хэлэжьэн зэрилъэкIыщтыр зэхашIэ. «ЭкоЦентрэм» ипрограммэ къыдыхэлъы­тагъэу шъолъырым ит лагерьхэм ыкIи еджапIэхэм мыщ фэдэ мастер-классхэр ащызэхащэщтых, пыдзафэхэм пкъыгъуа­бэ ахэпшIыкIын зэрэплъэкIыщтыр арагъэлъэгъущт.
«ЭкоЦентрэм» и Адыгэ шъолъыр къутамэ ипресс-къулыкъу.