Сэнаущыгъэ зыхэлъ ныбжьыкIэхэм язэхахьэу «Фыщт» зыфиIорэм епхыгъэ мафэу ащ изыфэгъэхьазырынкIэ къэуцурэ Iофыгъохэм зыщатегущыIагъэхэр шышъхьэIум и 4-м Адыгэ къэралыгъо университетым щыкIуагъ, республикэм ис кIэлэ ыкIи пшъэшъэ чан 550-м ехъу ащ къыщызэIукIэгъагъ.

Адыгэ къэралыгъо университетым, Мыекъопэ къэралыгъо технологическэ университетым ястудентхэр, Адыгеим имуниципальнэ образовании 9-мэ ялIыкIохэр, ныбжьыкIэ ыкIи мысатыу организациехэу шъолъырым итхэм яныбжьыкIэхэр а Iофтхьабзм хэлэжьагъэх.
Зэхэхьашхоу мэфэ заулэрэ «Фыщт» ишыгу екIурэ гъогум тетыщтхэм чIыопсым щынэгъончъэу ыкIи гупсэфэу яуахътэ зэрэщагъэкIощтым а мафэм тегущыIагъэх. Программэм елъы­тыгъэу щынэгъон­чъэнымкIэ, апэрэ IэпыIэгъур ятыгъэнымкIэ, къапыщылъ гъогум зыфагъэхьазырынымкIэ лъэныкъуабэхэм анэсыгъэх. Анахьэу анаIэ зытырагъэтыгъэр гъогум зыдаштэщтхэр, Iалъмэкъхэм аралъхьащтхэр, ящыкIэгъэщт Iэмэ-псымэхэр зэрагъэхьазырыщтхэр ары. Гъо­гоу къя­жэрэм интернети, электричестви, тучани зэрэтемытыщ­тыр ахэм араIуагъ.
Программэм игупчэу плъытэн плъэ­кIыщт Адыгэ Республикэм ихэбзэ къулыкъухэм ныбжьыкIэхэр гущыIэгъу афэхъунхэ зэралъэкIыгъэр. ЫпэкIэ «Фыщт» дэкIоегъагъэхэм хэукъоныгъэу ашIыгъагъэхэр къыхагъэщыгъэх, зыгъэгумэкIыхэрэ Iофыгъохэми япхыгъэ упчIэхэр къатыгъэх.
Iофтхьабзэм изэхэщакIор Урысые общественнэ организациеу «Урысыем иныбжьыкIэхэм я Союз» зыфиIорэм и Адыгэ шъолъыр къутам ары, ныбжьыкIэ IофхэмкIэ Адыгэ Респуб­ликэм и Комитети ишIуагъэ къаригъэкIыщт.
Зэхахьэу къапыщылъым ипэгъокI Iоф­тхьабзэу зэхащэгъа­гъэм къекIолIэгъа­гъэх хэбзэ къулыкъу­хэм ялIыкIохэр ыкIи рагъэблэгъэгъэ экспертхэр:

1. Аулъэ Юрэ Шумаф ыкъор, Адыгэ Республикэм культурэмкIэ иминистр;
2. Пэрэныкъо Сусанэ Рус­лъан ­ыпхъур, Адыгэ Республикэм гъэсэныгъэмрэ шIэныгъэмрэкIэ иминистрэ иапэрэ гуадз;
3. Павловский Александр Сергей ыкъор, Адыгэ Респуб­ликэм экономикэ хэхъоныгъэмкIэ ыкIи сатыумкIэ иминистрэ иапэрэ гуадз;
4. Галушкин Максим Сергей ыкъор, ныбжьыкIэ IофхэмкIэ Адыгэ Республикэм и Комитет итхьамат;
5. Бакланов Сергей Николай ыкъор, полицием иполковник, Адыгэ Республикэм хэгъэгу кIоцI IофхэмкIэ и Министерствэ иотделэу полицием иучасткэ уполномоченнэхэм ыкIи зы­ныбжь имыкъугъэхэм яIофхэмкIэ подразделениехэм яIофшIэн изэхэщэн фэгъэзагъэм ипащ;
6. Мыгу Бислъан Аслъан ыкъор, «Адыгеим иныбжьыкIэхэр» зыфиIорэм ипащ;
7. Абрэдж Заур Мурат ыкъор, Урысые общественнэ организациеу «Урысыем иныбжьыкIэхэм я Союз» зыфиIорэм и Адыгэ шъолъыр организацие итхьамат.
   

УпчIэ зиIэхэм зыфагъэзэн алъэкIыщт «Урысыем иныбжьыкIэхэм я Союз» зыфиIорэ организацием ипресс-къулыкъу ипащэ игуадзэу Балюкова ­Анжеликэ Александр ыпхъум. Тел.:+7 (995) 200-32-70.