Хэкужъым къэзыгъэзэ­жьыгъэм и Мафэ ипэгъокIэу, «Кавказ хэхэсхэр» зыцIэ къэ­гъэлъэгъон Адыгэ Республикэм и Сурэт къэгъэлъэ­гъуа­пIэ къыщызэIуахыгъ.

Лъэпкъ культурэр къэухъу­мэгъэным, хахъо егъэшIыгъэным ыкIи зэпхыныгъэхэр гъэпытэгъэнхэм ар фэлажьэ. Живописым, графикэм ыкIи нэ­мыкI художественнэ шъуашэхэм арылъ IофшIэгъи 100 фэ-
диз ащ хэхьагъ.
Мыщ фэдэ къэгъэлъэгъоныр шышъхьэIум и 1-м ехъулIэу зэ­хищэныр республикэмкIэ хабзэ хъугъэ. Илъэс 27-кIэ узэ­кIэIэбэжьмэ, Косово къикIыжьхи апэрэ адыгэ хэхэсхэр хэ­кужъым къихьажьыгъэх. Ащ къыщегъэжьагъэу шышъхьэIум иапэрэ мафэ зи Хэкужъ къэзы­гъэзэжьыгъэм я Мафэу респуб­ликэм щыхагъэунэфыкIы.
Мурад шъхьаIэу къэгъэлъэ­гъоным иIэр адыгэ лъэпкъым къинэу кIэхэкIыгъэр къекIолIагъэхэм джыри зэ агу къагъэ­кIыжьыныр ары. БлэкIыгъэм тыхэIэзыхьажьын зэрэ­тымылъэ­кIыщтыр, ау ащ десэ къыхэтхын зэрэфаер къыткIэ­хъухьэхэрэм ядгъэшIэн фае. Мамырныгъэмрэ зэгурыIоны­гъэмрэ анахь лъапIэ зэрэщымыIэр зэкIэми къагуры­Iоным мэхьанэшхо иI.

Зэхахьэр къызэIуихыгъ ­Адыгэ Республикэм культу­рэмкIэ и Министерствэ иотдел ипащэу Шэуджэн Бэлэ:
— Лъэпкъым изыужьыжьын лъапсэ фэзышIыгъэ мафэр непэ хэтэгъэунэфыкIы. Зэман зэ­фэшъхьафхэм адыгэхэр зыпхырыкIыгъэ ушэтыпIэхэм къэгъэлъэгъоныр яшыхьат.
Сурэт къэгъэлъэгъуапIэм ипа­щэу, Урысыем культурэмкIэ изаслуженнэ IофышIэу Бырсыр Абдулахь, Адыгэ Респуб­ликэм исурэтышIхэм я Союз итхьаматэу Елена Абакумовар, Адыгэ Хасэм и Хэсашъхьэ хэтэу МэщфэшIу Нэдждэт зэхахьэм къыщыгущыIагъэх. Ахэм хагъэунэфыкIыгъ къэгъэлъэгъо­нэу «Кавказ хэхэсхэр» зыцIэм тишIэжь къызэригъэбаирэр, лъэпкъыр нахь зэпэблагъэ зэришIырэр.
СурэтышI IэпэIасэхэм яIоф­шIагъэхэм гъунэ зимыIэ ис­кусствэр къырагъэлъэгъукIыгъ. ЩыIэныгъэм илъэныкъуабэ къы­зэлъаубытызэ, искусствэм ыбзэкIэ сурэтхэм акупкI къырахыгъ.
IэшIагъэхэр дахэх, лъэгъуп­хъэх, тарихъым иIотакIох. Сурэт­хэу «Къысфэгъэгъу, тят» (Умарэ С. М), «Орэдыжъ» (Къуанэ А. М), «Хасэ», «ПсынэкIэчъ» (Бырсыр А. М), «Тыжъ Iуш» (Къат Т) ыкIи нэмыкIхэр блэ­кIыгъэмрэ джырэ уахътэмрэ янэпэеплъых, ахэр гум екIухэу шIыгъэх. Адыгэ лъэпкъым къыкIугъэ гъогур, къиныгъоу къызэпичыгъэхэр, цIыфхэм агу ихъыкIыгъэр IэпэIасэхэм сурэт­хэм къащагъэлъэгъон алъэкIыгъ. Зыфэдэ къэмыхъугъэ, купкI ин зиIэ IофшIагъэх ахэр. Илъэс пчъагъэ тешIагъэми, цIыфхэм апэкIэкIыгъэр сурэтышIхэм непэ къытагъэлъэгъун алъэкIыгъ. Мамырныгъэм къы­фэджэрэ сурэтхэр дэхэ дэдэх, гупшысэ куу ахэлъ.

ЦIыфэу къекIолIагъэ пэпчъ ыгукIэ пэблагъэу сурэт къыхи­хыгъ. Iэпэщысэхэм ажабзэкIэ къагъэлъэгъогъэ тхыдэр лIэшIэгъухэм къахэнэщт.
Iофтхьабзэм республикэм ишIэныгъэлэжьхэм ащыщхэр, Адыгеим исурэтышIхэр, лъэпкъ интеллигенцием инахьыжъ гъэшIуагъэхэр, АР-м культурэмкIэ и Министерствэ илIыкIохэр, Косово къикIыжьыгъэ тилъэпкъэгъухэр, журналистхэр ыкIи искусствэр зикIасэхэр хэлэжьагъэх. МэфэкI зэхахьэр зэгъэфагъэу, узIэпищэу, уигъэдаIоу гъэпсыгъагъ. Къэгъэлъэгъоныр шышъхьэIум и 11-м нэс зэIухыгъэщт. Искусствэр зышIогъэшIэгъонхэр ащ еплъынхэу зэхэщакIохэм рагъэблагъэх.
Лъэпшъыкъо Фатим.