Зи Хэкужъ къэзыгъэ­зэ­жьы­гъэм и Мафэ Адыгеим щыхагъэу­нэфы­кIыгъ.

Ащ фэгъэхьыгъэ мэ­фэкI пчы­хьэзэхахьэр ЗыкIыныгъэмрэ ЗэгурыIоныгъэмрэ ягупчэ щыкIуагъ. Хабзэм иIофы­шIэхэр, общественнэ зэхахьэхэм ялIыкIохэр, республикэм щы­псэу­хэрэр, хьакIэхэр, анахь шъхьа­Iэхэу, мэфэкIыр къызще­жьа­гъэхэу Хэкужъым къэзыгъэзэ­жьыгъэхэр ащ къыугъоигъэх.
Хабзэ хъугъэу аужырэ илъэс 27-м хэдгъэунэфыкIырэ мафэм икъежьапIэр 1998-рэ илъэсыр ары. Ащ дэжьым заом зыкъызщиштэгъэ Косовэ къикIыжьи апэ­рэ адыгэ купышхо Хэкужъым къэкIожьыгъагъ. Лъэпкъым итарихъ ихъугъэ-шIэгъэ шъхьаIэхэм ар ахэуцуагъ. ЛIэшIэгъум ехъум зэпэIэпчъэ лъэпкъым зиугъои­жьынымкIэ лъэбэкъушIу ар хъу­гъагъэ. Урысыем и Правительст­вэ иIэпыIэгъукIэ шIушIэ Iофтхьабзэр агъэцэкIэгъагъ. А илъэс дэдэм Адыгеим и Президент иунашъокIэ шышъхьэIум и 1-р Хэкужъым къэзыгъэзэжьыгъэм и Мафэу агъэнэфагъ.
Лъэпкъ тарихъыр, бзэр, культурэр, шэн-хабзэхэр къэухъумэгъэнхэм, хэхэс адыгэхэу къэралыгъо пшIы пчъагъэхэм ащы­псэухэрэм адытиIэ зэпхыныгъэ­хэр гъэпытэгъэнхэм мафэм ихэ­гъэунэфыкIын фэIорышIэ. Непэ зыщыщ чIыгум къэзыгъэзэжьыгъэ адыгэ нэбгырэ минитIу фэдиз республикэм щэпсэу. Иорданием, Сирием, Тыркуем, Израиль ыкIи нэмыкI къэралхэм ахэр къарыкIыжьыгъэх.
Непэрэ мафэхэм зыкIыны­гъэм имэхьанэ зэрэлъэшыр къыIуагъ ыкIи пчыхьэзэхахьэм къекIолIагъэхэм мэфэкIымкIэ къафэгу­шIуагъ Урысыем и ЛIыхъужъэу, АР-м и Къэралыгъо Совет — Хасэм и Тхьаматэ игуадзэу Цэй Эдуард.
ГущыIэр лъигъэкIотагъ Косовэ къикIыжьыгъэ адыгэхэм афагъэ­псыгъэ къуаджэу Мэфэхьаблэ щыпсэурэ Хьэсани Мыхьамэт. Республикэм къэкIожьыхэрэр псынкIэу щыIэныгъэм хэгъэгъо­зэжьыгъэнхэмкIэ IофшIэнышхо Адыгеим щызэшIуахы. «IэкIыбым щыпсэурэ тилъэпкъэгъухэм ежьхэм яшIоигъоныгъэкIэ АР-м къа­гъэзэжьынымкIэ IэпыIэгъу афэхъугъэныр» зыфиIорэ къэралыгъо программэр шъолъырым щагъэцакIэ.
— ТичIыгогъухэм Урысыем къагъэзэжьызэ, иIахь шъхьаIэхэм ащыщ хъухэзэ, къэралы­гъом игъэ­пытэнрэ ихэхъоныгъэрэ яIахьышIу халъхьэ. Тыжъ пIашъэ­хэм ячIыгу щыпсэунхэу, Iоф ща­шIэнэу зэрэфаехэм ахэр зы ешIых. ГушъхьэлэжьыгъэмкIи экономикэм ылъэныкъокIи къэралыгъор нахь баи ашIы, лIэужыкIэхэм щыIэкIэшIу зэряIэщтым уицыхьэ тырагъэлъы, — къащиIуагъ ихъытыу нэкIуб­гъохэм АР-м и ЛIышъхьэу КъумпIыл Мурат.
МэфэкI Iахьым ыуж Iоф­тхьабзэр лъагъэкIотагъ Адыгеим итворческэ купхэм ыкIи орэды­Iохэм. Лъэпкъ IэпэIасэхэм яIэшIагъэхэм якъэгъэлъэгъони чIы­пIэм Iоф щишIагъ. Адыгэ джэгур пчыхьэ­зэхахьэм кIэух фэхъугъ.
Анцокъо Ирин.