Урысые общественнэ ор­ганизациеу «Урысыем июристхэм я Ассоциацие» и Адыгэ шъолъыр къутамэ
зэхэсыгъо иIагъ. Мыщ хэтхэм илъэсым имэзихэу пыкIыгъэм яIофшIэн зыфэдагъэр зэфахьысыжьыгъ ыкIи тапэкIэ пшъэрылъэу яIэхэм атегущыIагъэх.

Iофтхьабзэр зэрищагъ Ассоциацием и Адыгэ шъолъыр къутамэ итхьаматэу ЛIыхьэтыкъо Аскэр. Пэублэм АР-м и Апшъэрэ хьыкум итхьаматэу отставкэм кIогъэ, Адыгэ шъолъыр къутамэм и Совет хэтэу Шумэн Байзэт Урысыем июристхэм я Ассоциацие ипащэу Сергей Степашиныр зыкIэтхэжьыгъэ Щытхъу тхылъыр ритыжьыгъ. Ащ къыщеIо организацием ишъолъыр къутамэ гъэпытэгъэнымкIэ ыкIи хэхъоныгъэ егъэшIы­гъэным, цIыфхэм яфитыныгъэхэр ыкIи яшъхьафитыныгъэ къэухъумэгъэным
Б. Шумэным иIахьышIу зэрэхэлъыр.
Джащ фэдэу ЛIыхьэтыкъо Аскэр Шумэн Байзэт имэфэкIкIэ фэгушIуагъ. Б. Шумэным ирэзэныгъэ гущыIэхэр къы­фэгушIуагъэхэм къапигъохыгъ ыкIи ицыхьэ телъэу къыIуагъ Урысые об­щественнэ организациеу «Урысыем июристхэм я Ассоциацие» и Адыгэ шъолъыр къутамэ тапэкIи хэхъоныгъэхэр ышIызэ ыпэкIэ зэрэлъыкIотэщтыр, шIуа­гъэ къытэу япшъэрылъхэр зэрэзэшIуа­хыщтыр.
Нэужым Урысыем юстициемкIэ и Министерствэ и ГъэIорышIапIэу АР-м щыIэм ипащэу Сергей Морозовыр УФ-м юстициемкIэ и Министерствэ иапшъэрэ къулыкъу тын лъапIэу, Анатолий Кони ыцIэкIэ агъэнэфэгъэ медалыр хэушъхьа­фыкIыгъэ дзэ операцием хэлэжьэгъэ очылхэм къазэрафагъэшъошагъэм фэгъэхьыгъэ унашъом къеджагъ. Ащ ыуж медальхэр аритыжьыгъэх хэушъхьа­фыкIыгъэ дзэ операцием хэкIодэгъэ Сергей Манкиевым ишъхьэгъусэ, дзэ пшъэрылъхэм ягъэцэкIэн щытхъу хэлъэу хэлэжьэгъэ Дмитрий Осколковым янэ.
Адыгеим иочылхэм я Палатэ ипащэу, Ассоциацием и Адыгэ шъолъыр къутамэ игъэцэкIэкIо комитет итхьаматэу Мамый Алый къыIуагъ очылхэу Сергей Ман­киевымрэ Дмитрий Осколковымрэ щытхъу хэлъэу ыкIи IэпэIэсэныгъэшхо аIэкIэлъэу яIофшIэн зэрагъэцэкIагъэр, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм ыпкIэ зыхэмылъ юридическэ IэпыIэгъур арагъэгъотынымкIэ яшIогъэшхо къызэрагъэкIуагъэр. Адыгеим иочылхэм я Палатэ ыкIи «Урысыем июристхэм я Ассоциацие» и Адыгэ шъолъыр къутамэ яIофшIэгъухэм яунагъохэм Iэпы­Iэгъу зэрафэхъущтхэм А. Мамыим къыкIигъэтхъыгъ.
Мы илъэсым имэзихэу пыкIыгъэм изэфэхьысыжьхэр къышIыгъэх Урысые общественнэ организациеу «Урысыем июристхэм я Ассоциацие» и Адыгэ шъолъыр къутамэ иаппарат игъэцэкIэ-­
кIо директорэу Елена Телегинам. Ащ къызэриIуагъэмкIэ, организацием иIоф­шIэнкIэ анахь шъхьаIэу щытыр ыпкIэ зыхэмылъ юридическэ IэпыIэгъур ягъэ­гъотыгъэныр ары. Илъэсныкъом Адыгеим щыпсэурэ нэбгырэ 300-м ехъумэ юридическэ IэпыIэгъу арагъэгъотыгъ. Ахэм азыщанэр хэушъхьафыкIыгъэ дзэ операцием хэлэжьагъэхэр ыкIи ахэм яунагъохэр ары.
Елена Телегинам къыIуагъ ыпкIэ зыхэмылъ юридическэ IэпыIэгъур зэрагъэгъотыхэрэм япчъагъэ илъэс къэс нахьыбэ зэрэхъурэр. Унагъом, псэупIэм, чIыгу Iахьым, щэфакIохэм яфитыныгъэ­хэм, псэупIэ-коммунальнэ хъызмэтым, социальнэ IэпыIэгъум, медицинэм, Iоф­шIэн зэфыщытыкIэхэм, нэмыкIхэми япхыгъэу цIыфхэм закъыфагъазэ.
ЫпкIэ зыхэмылъ юридическэ IэпыIэгъу ягъэгъотыгъэным хэлажьэх Урысыем юстициемкIэ и Министерствэ и ГъэIорышIапIэу АР-м щыIэри, цIыфхэм яфитыныгъэхэр зэтегъэуцожьыгъэнхэмкIэ АР-м и Уполномоченнэ, хьыкум къулыкъухэм ялIыкIохэр, нотариатхэр, хьыкум приставхэм якъулыкъу ыкIи Урысыем июристхэм я Ассоциацие иныб­жьыкIэ движение хэтхэр.
Мыщ фэдэ юридическэ IэпыIэгъур нахь дэгъоу зыщарагъэгъотыгъэу къыхагъэщыгъэр Урысыем июристхэм я Ассоциацие икъутамэу Адыгэкъалэ дэтыр ары. Ащ ипащэр АР-м и Къэралыгъо Совет — Хасэм идепутатэу, Урысыем июристхэм я Ассоциацие ипэублэ къута­мэ итхьаматэу Мыгу Адам.
Зэхэсыгъом хэлэжьагъэхэм Урысыем июристхэм я Ассоциацие и Адыгэ шъо­лъыр къутамэ иIофшIэн осэшIу фашIыгъ. ТапэкIэ организацием хэтхэм япчъагъэ хагъэхъонэу, ыпкIэ зыхэмылъ юридическэ IэпыIэгъур агъэлъэшынэу зэдаштагъ.