УФ-м и Президент и Ука­зэу 2024-рэ илъэсым тыгъэгъазэм и 30-м къыдэ­кIы­гъэм игъэцэкIэн къыдыхэ-
лъытагъэу IэкIыб къэралхэм къарыкIыгъэхэу Урысыем хэбзэнчъэу щыпсэухэрэм ыкIи Урысые гражданствэ зимыIэхэу къэралыгъом ра­гъэкIынхэм ищынагъо зышъхьащытхэм яправовой статус агъэтэрэзын амал яIэным фэгъэхьыгъагъ АР-м хэгъэгу кIоцI IофхэмкIэ и Министерствэ кощын Iоф­хэмкIэ и ГъэIорышIапIэ ипэщэ IэнатIэ зыгъэцэкIэрэ Елена Боклановам зэхи­щэ­гъэ Iофтхьабзэр.

Пэублэм ащ къызэриIуагъэмкIэ, IэкIыб къэралхэм къарыкIыгъэхэу хэбзэнчъэу Урысыем щыпсэухэрэм ыкIи ащ икIын гухэлъ зиIэхэм правовой статусэу яIэр агъэтэрэзынымкIэ мазэ нахьыбэ къэнагъэп. А уахътэм зышIокIыхэкIэ, ахэм алъэныкъокIэ унашъохэр ашIыщтых, Урысыем рагъэкIыщтых ыкIи ыужкIэ къихьан фимытхэу хъущтых.
— ЦIыфхэм агу къэзгъэкIыжьынэу сыфай УФ-м и Президент иунашъоу ыпшъэкIэ зигугъу къэтшIыгъэм 2025-рэ илъэсым Iоныгъом и 10-м ипIалъэ зэрикIырэр. IэкIыб къэралхэм къарыкIыгъэхэу Урысыем хэбзэнчъэу щыпсэухэ­рэр ыкIи зылъыплъэхэрэр Реестрэм хагъэуцонхэм, ащ дакIоу къэралыгъом рагъэкIынхэм ищынагъо зышъхьащытхэм яправовой статус агъэтэрэзыным мы унашъор фэIорышIэ, — еIо Елена Бок­лановам.
Указым къыхеубытэх:
— шIокI зимыIэ дактилоскопическэ регистрацие зыкIугъэхэр ыкIи сурэт зытырахыгъэхэр;
— врачым афимыгъэнэфагъэу наркотикхэр ыкIи психотропнэ пкъыгъохэр зыгъэфедэхэрэр е ар къызхамыгъэщыгъэхэр гъэунэфыгъэнхэмкIэ медицинэ уплъэ­кIунхэр зыкIугъэхэр;
— урысыбзэр, Урысыем итарихъ ыкIи къэралыгъом ихэбзэгъэуцугъэ илъэныкъо шъхьаIэхэр зэришIэхэрэр къэзыушыхьатырэ тхылъхэр къэзытыгъэхэр;
— шIокI зимыIэ тынхэм алъэныкъокIэ чIыфэу ателъыр ежь яшIоигъоныгъэкIэ зыпщыны­жьыгъэхэр.
Мыщ фэдэ цIыфхэм Iизын къязытырэ тхылъхэр аратынхэмкIэ пэрыохъу щыIэп.
IэкIыбым къарыкIыгъэхэм ыкIи ахэм IофшIапIэ языгъэгъотыхэрэм Iизын къя­зы­тырэ тхылъхэм якъыдэхынкIэ, ягъэхьазы­рынкIэ Урысыем хэгъэгу кIоцI IофхэмкIэ и Министерствэ ипаспортнэ визовэ сер­вис икъутамэхэм е Урысыем и МВД ичIыпIэ къулыкъухэм зафагъэзэн алъэ­кIыщт.
Мы мафэм ехъулIэу яправовой статус агъэтэрэзынэу IэкIыб къэралхэм къарыкIыгъэ нэбгырэ 1100-м ехъумэ лъэIу тхылъхэр къатыгъэх.
УплъэкIун-лъыплъэн Iофтхьабзэу зэра­хьэхэрэм къакIэлъыкIоу IэкIыб къэрал­хэм къарыкIыгъэхэу хэбзэнчъэу тирес­публикэ исхэм ыкIи ахэм Iоф языгъа­шIэхэрэм УФ-м и Кодекс къызэригъэ­нафэу административнэ пшъэдэкIыжь арагъэхьыщт. IэнатIэ зиIэхэм апае тазырыр сомэ мин 70-рэ, юридическэ цIыфхэм ыкIи предпринимательхэм IэкIыбым къикIыгъэ зы нэбгырэу агъэлажьэрэ пэпчъ сомэ миллионым нэсэу тазыр арагъэтыщт.
КIАРЭ Фатим.