«Нацизмэм иукраинскэ лIыкIохэм язекIуакIэхэм ятарихъ» зыфиIорэ къэгъэлъэгъон Адыгеим къыщызэIуахыгъ

Бэдзэогъум и 30-м Мыекъуапэ къыщызэIуахыгъ къэгъэлъэгъонэу «Нацизмэм иукраинскэ лIыкIохэм язекIуакIэхэм ятарихъ» зыфиIорэр. Ар афэгъэхьыгъ хэбзэукъоныгъэхэу украинэ нацизмэм зэрихьэхэрэм. Урысые Федерацием и Къэралыгъо Думэрэ агентствэу «РИА Новости» зыфиIорэмрэ яIэпыIэгъукIэ зэхащэгъэ Iофтхьабзэр къызэIуихыгъ АР-м и Къэралыгъо Совет – Хасэм и Тхьаматэу Владимир Нарожнэм. Респуб­ликэ парламентым ихэбзэгъэуцухэр ащ къекIолIагъэх.
Сурэт къэгъэлъэгъуапIэм щызэгъэу­Iугъ сурэт 54-у Донбасс щыпсэурэ мамыр цIыфхэм хьакIэ-къокIагъэу украинэ нацистхэм адызэрахьагъэр къизыгъэлъэ­гъукIыхэрэр. Киев тетыгъом зэраригъэ­хьэгъэ дзэ хэбзэукъоныгъэхэм, шъоищ укIхэм ыкIи террорым янэпэеплъых сурэттехыгъэхэр.

«Тэ типшъэрылъ террорыр къэгъэуцугъэнымкIэ, амал зэриIэу нахь псынкIэу текIоныгъэр къэгъэблэгъэгъэ­нымкIэ тфэлъэкIыщтыр тшIэныр, ЛIы­хъужъхэу Хэгъэгур къэзыухъумагъэхэр дгъэлъэпIэнхэр, нацистхэм дунаир ащаухъумэным фэшI лIыгъэрэ псэемыблэжьныгъэрэ къызхэзыгъэфагъэхэр, лъэхъэнэ къинэу зыхэтхэм емылъытыгъэу, цIыфыгъэрэ нэмыкIхэм агу фэузынымрэ хэзымынагъэхэр лIэужхэм ащымыгъэгъупшэгъэнхэр. Мы къэгъэлъэгъоныр щыIэныр зишIушIагъэр журналистхэу джащ фэдэу лIыгъэшхо зезыхьагъэхэр, ящыIэныгъэкIэ щынагъо къэуцуми, ясэнэхьат пшъэрылъхэр ыкIи хэушъхьафыкIыгъэ дзэ операциер зыщыкIорэ лъэхъаным якъэралыгъокIэ яхьакъ зыгъэцэкIагъэхэр ары», — къы­Iуагъ Владимир Нарожнэм.
ШIоигъоныгъэ зиIэ пстэури къэгъэлъэ­гъоным еплъышъущт, ар шышъхьэIум и 7-м нэс зэIухыгъэщт.