ПшъэдэкIыжьыр щызыгъэзыехэрэм апай
Мафэ къэс Адыгеим игъогухэм водитель ешъуагъэхэм агъэIорышIэрэ автомобильхэр гъогу-патруль къулыкъум иIофышIэхэм къащагъэуцух ыкIи хьыкумым Iофхэр зэхифынхэм фэшI тхылъхэр зэхагъэуцох.
Мы аужырэ гъэпсэфыгъо мэфитIоу кIуагъэхэм ащ фэдэ хъугъэ-шIэгъи 7 тиреспубликэ щагъэунэфыгъ. Къалэу Мыекъуапэ, Тэхъутэмыкъое, Красногвардейскэ ыкIи Джэджэ районхэм ащыпсэухэрэм ащыщхэу ащ фэдэ хэбзэукъоныгъэ зышIыгъэхэм пшъэдэкIыжь ахьынэу апэ илъ.
Зэфэхьысыжьхэм къызэрагъэлъагъорэмкIэ, пчъагъэрэ къыхэкIы ешъуагъэхэу транспортым ируль кIэрытIысхьэхэрэм ащ фэдэ зекIуакIэ ыпэкIи мызэу, мытIоу къахэфагъэхэу ыкIи ащ пае ахэм административнэ пшъэдэкIыжь ахьыгъагъэу.
Хабзэу щыIэм къызэрэдилъытэу, ащ фэдэ пшъэдэкIыжь зэрагъэхьыгъагъэхэм етIани арэущтэу зекIуагъэхэу загъэунэфыкIэ, ахэм алъэныкъокIэ уголовнэ Iоф полицием иIофышIэхэм къызэIуахы.
Мы мазэм гъогу-патруль къулыкъум иIофышIэхэм Тэхъутэмыкъое районым щыпсэурэ хъулъфыгъэу илъэс 27-рэ зыныбжьыр къагъэуцугъ. Ащ изекIокIэ-шIыкIэрэ игущыIакIэрэ уягуцэфэнэу щытыгъ ыкIи ащ пае полицием иIофышIэхэм уплъэкIунхэр зэхащагъэх. Нэужым ахэм къагъэлъэгъуагъ хъулъфыгъэр зэрешъогъагъэр. Джащ фэдэу ыпэкIэ ащ пшъэдэкIыжь ыхьыгъагъ ыкIи фитыныгъэ имыIэу рулым икIэрыкIэу кIэрытIысхьагъ. Ащ иавтомобиль Iахыгъ, ар гъэуцупIэ гъэнэфагъэм ащагъ.
Мыхэм афэдэ пэшIорыгъэшъ Iофтхьабзэхэр Джэджэ районми щызэрахьагъэх, ащ щыпсэурэ илъэс 49-рэ зыныбжь хъулъфыгъэу транспортыр зыгъэIорышIэщтыгъэр зэрешъуагъэр къыхагъэщыгъ.
Зэрагъэунэфыгъэу, мыщ ыпэкIэ пшъэдэкIыжь ащ ыхьыгъагъ. Джы хьыкумым агъэхьынэу ищыкIэгъэ тхылъхэр аугъоигъэх, транспортыр Iахыгъ.
Краснодар краим щыпсэурэ хъулъфыгъэу илъэс 38-рэ зыныбжьыми Теуцожь районым иполицие иIоф зэхефы. Ешъуагъэу ащ автомобилыр ыгъэIорышIэнэу фежьагъ ыкIи ар икъу фэдизэу фэмыгъэзекIоу гъогум дэчъэхыгъ.
ЧIыпIэм къэсыгъэ полицейскэхэм зэрагъэунэфыгъэу, хъулъфыгъэм иакъыл шъоным зэщигъэогъагъ, ау уплъэкIунхэр ыкIунхэу ыдагъэп. ЫпэкIи административнэ пшъэдэкIыжь ащ ыхьыгъэу щытыгъ.
Урысые Федерацием и Уголовнэ Кодекс ия 264.1–рэ статья иа 1-рэ Iахь къызэрэдилъытэу, мы хъугъэ-шIагъэхэм япхыгъэ уголовнэ Iофхэр полицием идознание иIофышIэхэм къызэIуахыгъэхэу зэхафых. Ащ фэдэ хэукъоныгъэхэм апае илъэситIум нэсэу ахэм хьапс атыралъхьан алъэкIыщт.
Гъомлэшк
Байзэт.