Страховой пенсиехэм къахэхъощт
Республикэм ипенсионер мин 23-у Iоф зышIэхэрэм ыкIи страховой взносхэр зыфатыгъэхэм ястраховой пенсиехэр 2025-рэ илъэсым шышъхьэIум и 1-м Урысыем и Социальнэ фонд Адыгэ РеспубликэмкIэ икъутамэ къыIэтыщтых. IофшIэнэу агъэцакIэрэм емылъытыгъэу 2025-рэ илъэсым къыщегъэжьагъэу страховой пенсие лъэпкъ пстэури индексацие ашIыщтых.
Ахъщэу къыхагъэхъощтыр зэлъытыгъэр лэжьапкIэу къагъахъэрэр ары. Ар нахь лъагэ къэс къыхэхъощтри нахьыбэщт. Ау пенсионнэ коэффициенти 3-м ар шъхьадэкIырэп. Къэралыгъо фэIо-фашIэхэм япорталкIэ хэти икоэффициент зыфэдизыр зэригъэшIэн ылъэкIыщт.
«Iоф зышIэхэрэм къулыкъу горэми зыфамыгъазэу шышъхьэIум япенсие къафаIэтыщт. Iоф зышIэрэ пенсионер пстэуми графикым диштэу ахъщэр къаIукIэщт», — къыIуагъ Урысыем и Социальнэ фонд Адыгэ РеспубликэмкIэ икъутамэ ипащэу МэщлIэкъо Хьамид.
УпчIэ зиIэхэр зэпхыныгъэмкIэ гупчэ зыкIым ителефонэу 8(800)100-00-01-мкIэ теонхэ алъэкIыщт. Блыпэм къыщыублагъэу мэфэкум нэс ащ пчэдыжьым сыхьатыр 9-м къыщегъэжьагъэу пчыхьэм 6-м нэс, бэрэскэшхом сыхьатыр 9-м къыщегъэжьагъэу 5-м нэс Iоф ешIэ.