Республикэм ны мылъкур нахьыбэу зэрагъэфедэрэр псэукIэ амалэу яIэхэр нахьышIу шIыгъэнхэр ары. Мы илъэсым Адыгеим щыщ унэгъо 723-мэ а амалыр къызфагъэфедагъ.

Сабыим ыныбжь илъэси 3 зыхъукIэ, унагъом фэтэр къыщэфын е чIыфэ ымыштэу унэ ышIын ылъэкIыщт.
Мыщ къыхимыубытэрэр ипотекэ чIыфэу унэ къыщэфыным е ышIыным пае ыштагъэм ны мылъкур пэIуигъэхьаныр ары. Арэущтэу зышIынэу фаем сабыир къызэрэфэхъугъэм тетэу е ыпIунэу къызэраIихыгъэм лъыпытэу ны мылъкур ащ пэIуигъэхьан ылъэкIыщт.
Ны мылъкум игъэфедэнкIэ лъэIу тхылъыр къэралыгъо фэIо-фашIэхэмкIэ порталым, МФЦ-м е Урысыем и Социальнэ фонд икъутамэу Адыгэ Респуб­ликэм щыIэм аIэкIигъэхьан ылъэкIыщт. ЧIыфэр къызIихыгъэ банкми ар щигъэцакIэми хъущт.
Мы илъэсым къыщегъэжьагъэу ны мылъкумкIэ унэ къэзыщэфы зышIоигъо­хэм е агъэпсыщт унэм пэIухьащт ахъщэм изы Iахь афэлъэгъужьыгъэнэу фаехэм ущыпсэуным унэр тегъэпсыхьагъэмэ е темыгъэпсыхьагъэмэ къэзыушыхьатырэ тхылъыр къырахьылIэн фаеу хъущт.
«Унэу къащэфыщтыр Урысыем итын, ренэу ущыпсэуным фытегъэпсыхьэгъэн фае, зэхэтэкъоным нэсыгъэу ар щыты хъущтэп. Унэм игъэцэкIэжьын пэIухьэрэр псэукIэ амалэу яIэхэр нахьышIу афэшIыгъэнхэм къыхиубытэрэп», — къы­Iуагъ Урысыем и Социальнэ фонд икъутамэу АР-м щыIэм итхьаматэу МэщлIэкъо Хьамид.
ЛъэIу тхылъыр игъоу залъэгъукIэ Урысыем и Социальнэ фонд икъутамэу Адыгэ Республикэм щыIэм ны мылъкур е ащ изы Iахь IофшIэгъу мэфи 5-м къыкIоцI къафитIупщын ылъэкIыщт.
Апэрэ сабыим пае ны мылъкур зэрэхъурэр сомэ 690266,95-рэ. Унагъом ятIонэрэ сабыир къызихъокIэ, сомэ 221895,14-м нэсэу ащ къыхэ­хъощт.
УпчIэ зиIэхэм Гупчэ зыкIым зыфагъэзэн алъэкIыщт: тел.: 8(800)100-00-01 (ыпкIэ хэмылъэу), блыпэм къыщегъэжьагъэу мэфэкум нэс пчэдыжьым сыхьатыр 9-м къыщыублагъэу пчыхьэм 6-м нэсэу, бэрэскэшхом – пчэдыжьым сыхьатыр 9-м къыщегъэжьагъэу пчыхьэм сыхьатыр 5-м нэсэу.