Илъэсныкъом - километрэ 53,1-рэ
Мы илъэсыр къызихьагъэм къыщыублагъэу лъэпкъ проектэу «ЩыIэныгъэм пае инфраструктурэр» зыфиIорэм игъэцэкIэн ишIуагъэкIэ, Адыгэ Республикэм шапхъэхэм адиштэу шъолъыр гъогу 17-рэ муниципальнэ мэхьанэ зиIэ псэолъи 7-рэ агъэкIэжьыгъэх, зэкIэмкIи гъогухэм якIыхьагъэ километрэ 53,1-рэ мэхъу.
«Апэрэ илъэсныкъом изэфэхьысыжьхэмкIэ, шъолъыр гъогу 17 федеральнэ шапхъэхэм адиштэхэу ашIыжьыгъэх, ахэм зэкIэмкIи километрэ 48,9-рэ якIыхьагъ. Километри 3,128-рэ зикIыхьэгъэ чIыпIи 6 къалэу Мыекъуапэ щагъэцэкIэжьыгъ; поселкэу Яблоновскэм километрэ 1,1-рэ хъурэ гъогоу урамэу Промышленнэм дэкIырэр агъэкIэжьыгъ. ЗэкIэмкIи мы илъэсым километрэ 76-рэ хъурэ гъогухэр шапхъэхэм адедгъэштэжьыщтых», — къыIотагъ автомобиль гъогухэм я ГъэIорышIапIэу «Адыгеяавтодорым» ипащэу Алексей Корешкиным.
Псэуалъэхэм ягъэцэкIэжьын фэгъэхьыгъэ зэзэгъыныгъэхэм игъом зэракIэтхагъэхэм ишIуагъэкIэ федеральнэ проектхэр Адыгеим нахь псынкIэу щыпхыращышъух. ГущыIэм пае, Мыекъуапэ мы илъэсымкIэ агъэнэфэгъэгъэ гъогу чIыпIи 6-у километри 3,128-рэ хъурэр агъэцэкIэжьыгъах. Ау ащ къыщыуцугъэхэп, 2026-рэ илъэсым иплан хэхьагъэхэу мэлажьэх, урамэу Гоголым (метрэ 900-рэ) игъогу игъэкIэжьын джырэ уахътэм гъогушIхэм Iоф дашIэ. Ащ фэшъхьафэу, мылъкоу мыгъэфедагъэу къагъэнэшъугъэмкIэ джыри зы урам фежьэнхэ гухэлъ яI: урамэу Привокзальнэм, урамэу Краснооктябрьскэм къыщегъэжьагъэу ур. Лениным нэс, зэкIэмкIи метри 180-рэ хъущт. Непэ гъогушIхэм гъогубгъу мыжъохэр агъэуцугъахэх, гъогужъым телъыгъэ асфальтым икъытехын фежьагъэх. Псэуалъэм ишIын тефэщт сомэ миллион 13,2-рэ. Мы илъэсым ичъэпыогъу мазэ нэс IофшIэнхэр аухынхэу мэгугъэх.
Поселкэу Яблоновскэр пштэмэ, метрэ 800 зикIыхьэгъэ гъогоу урамэу Совхознэм пхырыкIырэр агъэцэкIэжьы. 2025-рэ илъэсым Яблоновскэм имуниципальнэ гъогу чIыпIи 4 шапхъэхэм адырагъэштэжьыщтых. ЗэкIэмкIи Яблоновскэм гъогу километри 3,6-рэ щагъэкIэжьынэу щыт.
Шъугу къэдгъэкIыжьын, лъэпкъ проектэу «ЩыIэныгъэм пае инфраструктурэр» зыфиIорэм ишIуагъэкIэ мы илъэсым Адыгеим шъолъыр гъогухэу 25-рэ шапхъэхэм щадырагъэштэжьых, 6-р — Мыекъопэ районым ыкIи 4-р Яблоновскэ къэлэ псэупIэм.