Адыгэ Республикэм иавтомобиль гъогоу «Некрасовскэр– Хьатикъуай» зыфиIорэм хэхьэрэ лъэмыджыр агъэцэкIэжьы.
Лъэпкъ проектэу «ЩыIэныгъэм пае инфраструктурэр» зыфиIорэм ишIуагъэкIэ Адыгеим и Красногвардейскэ район ит псыхъоу Псынэф телъ лъэмыджыр агъэ­кIэжьыщт.
«ПIэлъэ гъэнэфагъэкIэ агъэфедэщт гъогу тамыгъэхэр агъэуцугъэх, лъэмыджыр аухыфэ зэрыкIощтхэ гъогур агъэпсыгъ. Лъэмыджыжъыр зэхахыжьыным ыкIи кIэр ашIыным пае агъэфедэщт технологичнэ лъэмыджыри гуашIыхьагъ. Джырэ уахътэм лъапсэхэм, пкъэу бгыкъухэм адэлажьэх. IофшIэным кIэухэу фэхъущтыр асфальтым ителъхьан ары, ащ гъогубгъу мыжъохэр голъыщтых, — къыIотагъ автомобиль гъо­гухэм я ГъэIорышIапIэу «Адыгеяавтодорым» псэолъэшIынымкIэ иотдел ипащэу Павел Бахтиным.
Iухьэгъухэри къыдэлъытагъэхэу псэуалъэм икIыхьагъэ метри 150-рэ мэхъу, IофшIэнхэм сомэ миллиони 106-рэ апэIухьащт.
IофшIэнхэр мы илъэсым итыгъэгъэзэ мазэ и 1-м ехъулIэу аухынхэу мэгугъэх.
Красногвардейскэ районым щашIырэ лъэмыдж закъор арэп мы илъэсымкIэ агъэнэфагъэр. Лъэпкъ проектэу «ЩыIэныгъэм пае инфраструктурэр» зыфиIорэм имылъкукIэ джырэ уахътэм лъэмыджищ ащагъэцэкIэжьы Джэджэ, Кощхьэблэ ыкIи Мыекъопэ районхэм.
Ащ фэшъхьафэу, шъолъыр «Автодорым» къызэрэщыхагъэщыгъэмкIэ, Тэхъу­тэмыкъое районым щыIэ Чыбый каналым телъ лъэмыджыр шапхъэхэм адиштэу агъэкIэжьыгъ, ар шъолъыр автомобиль гъогоу «Яблоновскэр – Шапсыгъэ псыIыгъыпIэм ипытапIэ» хэхьэ.