Непэ — зи Хэкужъ къэзыгъэзэжьыгъэм и Маф
Адыгэ Республикэм щыпсэухэу лъытэныгъэ зыфэтшIыхэрэр!
ТичIыпIэгъу лъапIэхэр!
Зи Хэкужъ къэзыгъэзэжьыгъэм и Мафэ фэшI тышъуфэгушIо!
1998-рэ илъэсым шышъхьэIум и 1-м заом зэлъиштэгъэ Косовэ тилъэпкъэгъухэр къищыжьыгъэнхэм епхыгъэ шIушIэ Iофтхьабзэу Урысые Федерацием ипащэхэм яIэпыIэгъу хэлъэу зэшIуахыгъэр Хэкужъым къэкощыжьынхэмкIэ щысэу хъугъэ, тихэгъэгу дунаим щыриIэ лъытэныгъэри ащ ыгъэпытагъ.
Урысыем къэзыгъэзэжьырэ тилъэпкъэгъухэр цIыф лъэпкъ зэфэшъхьафыбэу ащ щыпсэухэрэм язы Iахьэу мэхъух, Хэгъэгу зэтегъэпсыхьэгъэ лъэшыр гъэпсыгъэнымкIэ яшIуагъэ къагъакIо. Ахэр зэзыпхыхэрэр ятэжъ пIашъэхэм ячIыгу щыпсэухэ ыкIи щылажьэхэ зэрашIоигъор, игушъхьэлэжькIи иэкономикэкIи нахь бай ар хъуным яIахь хашIыхьанэу зэрэфаехэр ары. КъыткIэхъухьэхэрэр нахьышIоу зэрэпсэущтхэм ахэм яцыхьэ телъ.
Тилъэпкъэгъухэр ежьхэм яшIоигъоныгъэкIэ къэкощыжьынхэм тегъэпсыхьэгъэ Iофтхьабзэу зетхьэхэрэм къэгъэзэжьын IофымкIэ яшIуагъэ къызэрэкIощтым тицыхьэ телъ. IэпэIэсэныгъэ ин зыхэлъ IофышIэхэр нахьыбэ хъунхэмкIэ, республикэми, хэгъэгуми яэкономикэ зыкъыIэтынымкIэ а пстэуми амалышIухэр къатыщтых.
Адыгеим зэкIэ щыпсэухэрэм ыкIи тихэгъэгогъухэм тафэлъаIо псауныгъэ пытэ, щыIэкIэшIу яIэнэу, ти Хэгъэгушхоу Урысые Федерацием ифедэ зыхэлъ IофымкIэ гъэхъэгъакIэхэр ашIынхэу!
Адыгэ Республикэм и ЛIышъхьэу,
Урысые политическэ партиеу «Единэ Россием» и Адыгэ шъолъыр къутамэ
и Секретарэу КъумпIыл Мурат
Адыгэ Республикэм и Къэралыгъо
Совет — Хасэм и Тхьаматэу
Владимир Нарожнэр