МэфэшхомкIэ — зи ЧIыгужъ къэзыгъэзэжьыгъэм и МафэкIэ тыгу къыддеIэу тышъуфэгушIо!
Илъэс 27-кIэ узэкIэIэбэжьмэ, 1998-рэ илъэсым шышъхьэIум и 1-м къэхъугъэ хъугъэ-шIэгъэшхор ащ тыгу къегъэкIыжьы. Урысые Федерацием ипащэхэм яIэпыIэгъу хэлъэу автоном краеу Косовэ щыщ ти­лъэпкъэгъу купым мыщ фэдэ мафэм апэу алъапэ ячIыгу гупсэ къырадзэжьыгъагъ. Тшыхэмрэ тшыпхъу­хэмрэ якъэгъэзэжьынкIэ ар ублапIэ хъугъагъэ.
Хэгъэгубэмэ ащыпсэурэ адыгэхэр зыхэс лъэпкъхэм зэралъытэхэрэм, ясэнэхьаткIи, научнэ IофшIэнымкIи гъэхъэгъэшIухэр зэрашIыгъэм тарэгушхо. Ау зыщыпсэу­хэрэ чIыпIэм, бзэу аIулъым емылъытыгъэу ахэм агурэ апсэрэ тарихъ чIыгужъымкIэ къэгъэзагъэх, ар яплъапIэу мэпсэух.
Косовэ, Тыркуем, Шам, Израиль, Иорданием, Германием, США-м къарыкIыжьыгъэ тилъэпкъэгъу 5000-м ехъу непэ Темыр Кавказым иреспубликэхэм ащэпсэу. Сирием къикIыжьыгъэ адыгэ мини 3-р ахэм ащыщ. ЗэкIэ ахэр хэгъэгум ицIыф шъыпкъэ хъугъэх, ащ ихэхъоныгъэ яIахьышIу хашIыхьэ. Обществэм пытэу хэуцуагъэх, лъэныкъо зэфэшъхьафхэм Iоф ащашIэ, дунаим щыпсэурэ адыгэхэм зэпхыныгъэу адыряIэм нахь зырагъэушъомбгъу.
Зи ЧIыгужъ къэзыгъэзэжьыхэрэм щыIэкIэ-псэукIэ амал дэгъухэр ягъэгъотыгъэнымкIэ, щыIэныгъэм ахэр хэгъэгъозэгъэнхэмкIэ фызэшIокIырэр зэкIэ къэралыгъом ешIэ.
Ткъош, тшыпхъу лъапIэхэр! Хэгъэгу зэфэшъхьафхэм шъукъызэрэрахъухьагъэм емылъытыгъэу тарихъ ЧIыгужъым зэпхыныгъэу дышъуиIэм лIэшIэгъубэмэ къа­кIоцI къыкIежъугъэчыгъэп. Шъуятэжъ пIашъэхэм яхэкужъ къызышъогъэзэжьым, лIэужыбэхэр зыкIэ­хъопсыщтыгъэхэр гъэцэкIагъэ хъугъэ. ТапэкIи адыгэ­хэм ятарихъ ЧIыгужъ къызэрагъэзэжьыщтым тицыхьэ телъ.
Дунэе Адыгэ Хасэм игъэцэкIэкIо комитет ыцIэкIи, сэ сшъхьэкIи дунаим тет адыгэ пстэуми псауныгъэ пытэ, щыIэкIэшIу яIэнэу, мамырэу псэунхэу, Iофэу етхьыжьэхэрэр къыддэхъунхэу, IэкIыб къэралыгъохэм арыс тилъэпкъэгъухэмрэ Урысыемрэ язэпхыныгъэ нахь пытэнэу сэлъаIо!
Дунэе Адыгэ Хасэм итхьаматэу
Сэхъурокъо Хьаутий