Программэу «Урысыем инеущырэ маф» зыфиIорэм къыдыхэлъытагъэу зэхащэгъэ Адыгэ Республикэм изэIухыгъэ зэнэкъокъу ыкIэм фэкIуагъ.

МэфиплIырэ кIогъэ Iофтхьабзэм Урысыем и Къыблэ исубъектибгъумэ къарыкIыгъэ спорт­смен 350-м ехъу хэлэжьагъ. Пстэуми зэрифэшъуашэу зыкъа­гъэлъэгъуагъ, текIоныгъэм ыкIи хагъэунэфыкIырэ чIыпIэхэм афэ­бэнагъэх.
Адыгеир турнирым къыщызыгъэлъэгъуагъэхэр респуб­ликэм икъэлэ шъхьаIэ, Адыгэ­къалэ, Мыекъопэ, Красногвардейскэ ыкIи Тэхъутэмыкъое районхэм ялIыкIохэр ары. Ти­шъолъыр щыщэу медаль къэзы­хьыгъэ закъор Мыекъопэ районым щыщ илъэс 17 зы­ныбжь Дмитрий Работяга. Ащ унэе зэнэкъокъухэм ятIонэрэ чIыпIэр къащыдихыгъ. Джащ фэдэу Лабинскэ къэзыгъэлъэгъорэ Владислав Курдюковыр, нэужым Ставрополь краим щыщ Вероника Сидоровар (микст) игъусэхэу тиспортсмен хагъэунэфыкIырэ чIыпIитIу къыдихыгъ.

КIалэхэм яунэе зэнэкъо­къу­хэм (илъэс 12-м, 14-м ыкIи 18-м анэс зыныбжьхэм) къащыхэщыгъэх Ставрополь краим итеннисистхэр, пшъашъэхэмкIэ —Краснодар краим илIыкIохэр.
Турнирыр шэпхъэшIухэм ади­штэу зэрэрекIокIыгъэр зэхэща­кIохэм хагъэунэфыкIыгъ ыкIи мы спорт лъэпкъым тапэкIи тишъолъыр зыщиушъомбгъуным зэрэщыгугъыхэрэр къыхагъэ­щыгъ.
Программэу «Урысыем инеущырэ маф» зыфиIорэм къыдыхэлъытэгъэ зичэзыу турнирэу Мыекъуапэ щызэхащэщтым теннис цIыкIур зыгу рихьыхэрэр ежэщтых, ар шышъхьэIум къызэIуахыщт.