Хэгъэгум фыряIэ шIулъэгъу­ныгъэр гъунэнчъэу, ащ фэшъыпкъэу, гуфэкIо Iоф­шIэным емызэщыжьэу пэ­рытныгъэ щызыIыгъ бзы­лъфыгъэу тиIэр макIэп. Ахэм ащыщ гуфэкIо купэу «Сетевой плацдарм» зы­фиIорэм ипащэу Елена (зэкIэми зэрашIэрэр Алена) Кутимскаяр.

Еленэ бэмышIэу медалэу «За со­действие СВО» зыфиIорэр къыфагъэшъошагъ ыкIи УФ-м и Президентэу Владимир Путиным игукъэкIыкIэ агъэ­нэфэгъэ апэрэ Лъэпкъ шIухьафтынэу «Къэралыгъор цIыфхэм зэрахъокIы» зыфиIорэр къызэратыгъэ нэбгырэ минмэ ащыщ хъугъэ.
ЩыIэныгъэ къызэрыкIом мы бзылъфыгъэр сыдэущтэу хэтыгъ ыкIи ар сыдэущтэу къызэринэкIыгъ? IофшIэн мыпсынкIэу ыгъэцакIэрэр къыдэхъунымкIэ сыда кIуачIэ зыхигъуатэрэр? ЩытхъуцIэхэм еплъыкIэу афыриIэр ыкIи нэмыкI упчIэхэр ащ «Адыгэ макъэм» фигъэзагъэх.
ЗэкIэ къызщежьагъэр
ХэушъхьафыкIыгъэ дзэ операциер къежьи, ащ частичнэ мобилизациер къызыкIэлъэкIом, къэралыгъомкIэ, цIыф­хэмкIэ мэхьанэ зиIэ лъэхъан ар хъугъэ. Мы хъугъэ-шIагъэхэм къаушыхьатыгъ пшъэрылъ шъхьаIэхэр зэшIохыгъэн­хэм фэшI охътэ кIэкIым цIыф къызэрыкIохэр зэкъохьанхэ зэралъэкIырэр.
ГуфэкIо IэпыIэгъур тызхэт щыIэны­гъэм хэпчын умылъэкIынэу изы Iахь хъугъэ. Нэбгырэ мин пчъагъэ зэкъохьагъэу, къэралыгъом афишIэрэм емыплъыхэу, дзэ операцием хэлажьэхэрэм ящыкIагъэр арагъэгъоты.

— ХэушъхьафыкIыгъэ дзэ операциер къызежьэм, сипшъэшъэгъоу Краснодар щыпсэурэм къыIоу зэхэсхыгъ чылысым кIохэзэ хъытыухэр зэрэщаблэхэрэр. Мыекъуапи ащ фэдэ чIыпIэ щыIэн зэрилъэкIыщтым сегупшысагъ. СызыкIэ­упчIэм, культурэм и Унэу «Гигантым» ащ фэдэ чIыпIэ къыщызэIуахыгъэ къодыеу щытыгъ. Ахэм сахахьи, хъытыум иблакIэ зэзгъэшIагъ. Уахътэ тешIагъэу, Хэгъэгум сырипатриотэу зыслъытэжьэу, нахьыбэу сишIуагъэ къэзгъакIомэ сшIоигъоу сакъыхэкIыжьи, мы купыр зэхэс­щагъ ыкIи джы лъэныкъуабэмэ ате­гъэпсыхьагъэу Iоф тэшIэ, — хигъэунэфыкIыгъ Аленэ.
Купэу «Сетевой плацдарм» зыфиIорэр Мыекъуапэ иурамэу 8 Мартым тет унэу N 24-м ичIыунэ хэт. Мы уахътэм ехъу­лIэу купым нэбгырэ 500-м ехъу къызэ­лъеубыты, ахэм ащыщхэр Шытхьалэ, Ханскэм щыIэхэу Iоф ашIэ. Зэпымыоу хъытыухэр зыблэхэрэр нэбгырэ 25-рэ фэдиз мэхъух. ЗэкIэми ныбжь зэфэ­шъхьафхэр яIэх, ау нахьыбэрэр пен­сием щысых. Мыщ бзылъфыгъэу къекIуалIэрэр бэдэд, ащыщхэр анэгукIэ пащэм дэгъоу ешIэх, азыныкъохэр кIэу къахэхьагъэх. Мыекъуапэ щыпсэухэрэм анэмыкIэу, бзылъфыгъэхэм ащыщхэр Севастопольскэм, Краснэ Улькэм, Подгорнэм къа­рэкIых. ЗэкIэми зы мурад зыдаIыгъыр, мыбэми, афэлъэкIыщтымкIэ тидзэкIолI­хэм яшIуагъэ арагъэкIыныр ары.
ГуфэкIо купым ипшъэрылъ шъхьаIэр зыгъэбылъыхэрэ хъытыухэм яблэн. «Се­тевой плацдармыр» зыщыIэм къыще­гъэжьагъэу (Iоныгъом илъэситIу хъугъэ) хъытыу мини 2 ыблагъ ыкIи ахэр зэкIэ дзэ операцием ащагъэх. Купыр ащ къы­щыуцурэп, IэпыIэгъоу дзэкIолIхэм ящыкIагъэу къаIорэм тетэу шIушIэн IофкIэ ахэр афаугъоих, афарагъащэх. Ежь Аленэ Курскэ шIушIэ IэпыIэгъу зы-
щэщт­хэм ахэтэу кIонэу джыри зегъэ­хьазыры.
— Зыкъытфэзыгъэзэрэ подразделениехэм нахьыбэрэмкIэ ящыкIагъэу хъу­рэр техническэ пкъыгъохэр ары: генераторхэр, квадрокоптерхэр, нэмыкIхэри. Мыхэр къэралыгъом къаримытхэу щытэп, ау ахэр зэпымыоу зэрагъэпсэуалъэхэрэм къыхэкIэу, шIэхэу мэстых. Дзэ пшъэ­рылъхэр игъом зэшIуахынхэм фэшI ящы­кIагъэр аIэкIэлъын фае. Джащ фэдэу медикаментхэр бэу афэттIупщыгъэх. Къытфытеохэу лъэIу къытэзытыхэрэр зэкIэ икъоу тэуплъэкIух, зэрэтэтиехэм тицыхьэ телъ зыхъукIэ ары IэпыIэгъур зафэттIупщырэр. Сыда пIомэ пыир чъые­рэп, шIыкIэ зэфэшъхьафхэр егъэфедэх, — къыIуагъ гуфэкIо купым ипащэ.
ИщыIэныгъ
Алена Кутимскаяр щыIэныгъэ къызэ­рыкIом псэукIэ дэгъоу щыриIагъэр щигъэзыягъ, тидзэкIолIхэу зыпсэ емыблэжьхэу тимамыр щыIакIэ къэзыухъумэхэрэм IэпыIэгъу афэхъуныр къыхихыгъ. Ар предприниматель, иIофшIэн зэтеуцуа­гъэу щыт, федэ къыфехьы. Зыгъэпсэфыгъо имыIэу шIушIэн IофшIэным зыхэтыр илъэситIум къехъугъ.
— «ЩыIэныгъэ къызэрыкIом сыдэущтэу ухэта?» шъуIоу шъукъысэупчIымэ, апэрапшIэу сэ сыны, сыпхъу ыкIи сынан, анахь насыпышIоу щыIэ цIыфэу зысэлъытэжьы. Шъыпкъэ, бэ щызгъэзыенэу хъугъэр Iахьыл-гупсэхэм, синыбджэгъу­хэм сызаIумыкIагъэр бэшIагъэ, телефон­кIэ садэгущыIэмэ ары. ЗыгъэпсэфыпIэ чIыпIэхэм сыкIонэу хъурэп, ары па­кIошъ, тикупкIэ тхьаумэфэ мафэр зыгъэпсэфыгъоу тиI шъхьаем, а мафэми зыгорэ къэсщэфын, е къаIысхыжьын, е гуIэу къытэолIэгъэ дзэкIолIэу зыгъэзэжьыщтым ищыкIагъэр фэсыугъоинэу мэхъу. Сыгу къыдэзыщаерэр сянэ къыспэмычыжьэу зэрэпсэурэр ары. Анахь кIасэ хъугъэми, ащ дэжь сыкъыIохьажьы, сыкIэлъырэсы. Спонсор шъхьаIэу сиIэхэми ар ащыщ, пенсиеу къыратырэм къыхехышъ, мазэ къэс сомэ минитф къысеты. ТIэкIу къы­зысымаджэкIэ, «икъущт сызэрэщыIагъэр» еIо. Сэри сысэмэркъэоу есэIожьы: «Александра Васильевна, тидзэкIолIхэм ТекIоныгъэр къыдамыхэу улIэ хъущтэп», — гушIозэ къеIуатэ Аленэ.
Ежь икIалэхэр Краснодар щэпсэух, ыпэрэм фэдэу бэрэ зэрэлъэгъунхэу джы хъурэп, ау иунагъо исхэм ар къагурэIо, иеплъыкIэхэм къыдырагъаштэ.
КIуачIэ зыхигъуатэрэр
ЩыIэх цIыфхэр IофшIэн горэм фаб­лэхэу рагъажьэу, ау уахътэ зытешIэкIэ, езэщыхэу, чIадзыжьэу. ТигущыIэгъу ахэм афэдэп, ыгъэцэкIэрэ шIушIэ IофшIэным емызэщыжьэу, ыгукIэ фэщагъэу зэригъэцэкIэщтым пылъ.
— Гухэлъэу зыфигъэуцурэм фэкIорэ цIыфхэм сащыщ, зыгорэ сшIэнэу есхьы­жьагъэмэ, апэрэмкIэ, щытхъум паеп зыкIасшIэрэр, кIэух дэгъу фэхъуфэ сэгъэцакIэ. ЯтIонэрэмкIэ, ТекIоныгъэр къэсыфэ зи къызэтеуцощтэп. ТигуфэкIо куп пшъыхэу, агу кIодэу хэкIыжьыхэрэр къыхэкIых. ЩыIэныгъэу тызхэтымкIэ ахэри къызгурэIох, ау шъушIошъ жъу­гъэхъу фронтым щыIэ тидзэкIолIхэм тэщ нахь къин зэралъэгъурэр. Непэ фэдэ фэбэшхом шъофым, мэзым хэтых. Зэшъощтхэ псыр ямыIэу, шъошэ хьылъэхэр ащыгъхэу тэ мамырэу тыщыIэным ахэр фэбанэх. Мэхьанэ зиIэр ахэм кIыбдэт пытэ зэряIэр, тызэряжэрэр зэхядгъэшIэныр ары, — хигъэунэфыкIыгъ Алена Кутимскаям.
Джащ фэдэу тигущыIэгъу кIуачIэ зыхигъуатэу, IофшIэным нахь фэзыгъэблэу къыхигъэщырэр IэпыIэгъу зыфэхъугъэ кIалэхэр телефонкIэ къыфытеохэу «Алена, Жуковым ыцIэ зыхьырэ медалыр къысатыгъ», адрэм «ЛIыхъужъныгъэм иорден къысфагъэшъошагъ, псаоу а уахътэм тыкъынэсыным шъуишIуагъэ хэлъ, шъуи­хъытыухэм тыкъагъэнагъ» къызыраIокIэ, нахь гущыIэ лъапIэ щымыIэу елъытэ.
— ЦIыфым ищыIэныгъэ нахь лъапIэ щыIэп, ар къызэтебгъэнэным, къэуухъу­мэным мэхьанэ иI. Зыгорэ ишъхьэгъусэ ежэ, ны-тыхэр якIалэ къэкIожьыным пэплъэх, сабыир «папэ къэсыжьыгъ» ыIоу зэрэпэгъочъыщтым кIуачIэ къысхалъхьэ, нахьыбэ сшIэным сыфаблэ, — хигъэунэфыкIыгъ Аленэ.
Тын лъапIэр
ТигущыIэгъу бгъэхалъхьэхэр къызэрэфагъэшъошэщтхэм паеп шIушIэ IофшIэныр зыкIигъэцакIэрэр, ау ар имыгуапэу щытэп.
— АпэрапшIэу къыхэзгъэщымэ сшIоигъу, мы тынхэр зэкIэри сэрэп къэзылэжьыгъэр. АIэ зэкIэдзагъэу илъэситIум ехъугъэу тикупэу «Сетевой плацдармым» хэтхэу, чэщи мафи ямыIэу «щыIэныгъэм ихъагъэхэр» зыблэхэрэ бзылъфыгъэхэм яшIушIагъ. «IофшIэнэу жъугъэцакIэрэм пае тхьашъуегъэпсэу» къызыуаIоу, укъызыхагъэщыкIэ, гуапэ мэхъу. УФ-м и Президент зэрихьэрэ политикэм сэ десэгъаштэ, ащ ыгъэнэфэгъэ шIухьафтыным илауреатэу сызэрэ­хъугъэр сэркIэ ошIэ-дэмышIагъэу щыт. А тын лъапIэм сызэрэщыгугъырэр хэушъхьафыкIыгъэ дзэ операцием хэлэжьэрэ тикIалэхэм тапэкIэ джыри нахь IэпыIэгъу ин ядгъэгъотынымкIэ нэмыкI пчъэхэр къысфызэIуихынхэу ары, — къыIуагъ Алена Кутимскаям.
Iэшъынэ Сусан.