Адыгеир зэрифэшъуашэу къыгъэлъэгъуагъ
Урысыем иныбжьыкIэхэм яя VI-рэ Спартакиадэ икIэух едзыгъоу къалэу Ермэлхьаблэ щыкIуагъэм Адыгэ Республикэм щыщ дзюдоистым хагъэунэфыкIырэ чIыпIэ къыщихьыгъ.
Къэралыгъом ишъолъыр 39-мэ къарыкIыгъэ спортсмени 145-мэ заушэтыгъ. Адыгеир къэзыгъэлъэгъуагъэр Бэслъэнэй Темирлан. Олимпийскэ резервым испорт еджапIэу Кобл Якъубэ ыцIэ зыхьырэм зыщызыгъэхьазырыгъэ тибэнакIо килограмм 66-м нэс къэзыщэчыхэрэм якуп хэтыгъ. Ащ зэрифэшъуашэу республикэр къыгъэлъэгъуагъ, финал зэIукIэгъум нэсыгъ. Ау ащ Свердловскэ хэкум илIыкIоу Абдуллах Парчиевыр къыщытекIуагъ. ТикIалэ тыжьын медаль къыдихыгъ, гъэхъэгъэшIу ышIыгъ, Спартакиадэм къыдыхэлъытагъэу мэхьанэшхо зиIэ очкохэр тишъолъыр къыфихьыгъэх. Спортсменыр зэнэкъокъум фэзыгъэхьазырыгъэр дзюдомкIэ Адыгэ Республикэм итренер шъхьаIэу Мудрэнэ Аслъан.
ЯтIонэрэ чIыпIэу Темирлан къыхьыгъэм джыри зэ къыушыхьатыгъ Адыгеим дзюдоистхэр дэгъу дэдэу зэрэщагъэхьазырхэрэр. Зэнэкъокъум иедзыгъо пстэуми тикIалэ текIоныгъэм ащыфэбэнагъ, шъхьэкIафэ зыфэпшIын фэе спортсменэу зыкъыгъэлъэгъуагъ.