ФутболымкIэ Краснодар краим ичемпионат иапшъэрэ лигэ хэт командэхэм яешIакIохэм мазэрэ загъэпсэфыщт.

Адыгэ Респуб­ликэр мыщ къы­щызыгъэлъагъо­хэрэр — «Урожай» (псэупIэу Тульскэр) ыкIи «Зэкъошныгъ-2» (Мыекъуапэ). Тигуапэу къыхэ­тэгъэщы Мые­къопэ районым икомандэ зэнэкъокъум апэрэ чIыпIэр зэрэщиIыгъыр.
Зыгъэпсэфыгъо уахътэр ра­мыгъажьэзэ «Урожаир» станицэу Выселки щыIагъ ыкIи чIыпIэ коман­дэу «Аполлонием» 9:0-у те­кIуагъ. Тифутболистэу Александр Красновым гъогогъуи 6-рэ къэлапчъэм Iэгуаор дидзагъ, джащ фэдэу Денис Крыловымрэ ХъокIо Руслъанрэ къахэщыгъэх.
Я 14-рэ турым къыдыхэлъытагъэу «Зэкъошныгъ-2-р» Ермэл­хьаблэ щешIагъ. Бысымхэр тIогъогогъо ыпэ ишъыгъэх нахь мышIэми, хьакIэхэр къызэкIэ­кIуагъэхэп, пчъагъэр 2:2-у ешIэ-гъур аухыгъ. Тикомандэ хэтхэу Вячеслав Ру ыкIи Едыдж Та­мирлан гъогогъу зырызэ къэлап­чъэм Iэгуаор дадзагъ.
«Урожаим» апэрэ чIыпIэм щы­тэу зэнэкъокъум иапэрэ кIэлъэныкъо ыухыгъ, джы ащ хэт-
хэм загъэпсэфыщт, текIоныгъа­кIэхэм афэбэнэщтых. Тульскэм илIы­кIо­хэм ешIэкIэ дахэ ыкIи ухьазырыныгъэ дэгъу къагъэ­лъэгъуагъ ыкIи яфэшъуашэу пэрытыныгъэр аIыгъ.
«Зэкъошныгъ-2-м» ешIэгъоу иIа­гъэр къымыхьыгъэми, лигэм хэт командэ пэпчъ зэрифэшъуа­шэу дешIэн, текIоныгъэм фэбэнэн ылъэкIыщт. Мыекъуапэ ифутболист ныбжьыкIэхэм яухьазырыныгъэ хагъахъо, якъэгъэлъэгъонхэр нахь дэгъу зэрашIыщтхэм пы­лъых. АщкIэ зэнэкъокъум иятIо­нэрэ кIэлъэныкъо ушэтыпIэ афэхъущт.

Футболыр зыгу рихьыхэрэр чемпионатыр рагъэжьэжьыным ежэх, тикомандитIуми гъэхъэ­гъэ­шIухэр ашIынхэм щэгугъых. Шы­шъхьэIум и 31-м зичэзыу ешIэ­гъухэр яIэщтых.
Командэхэр зыдэщыт чIыпIэхэр ыкIи очко ­пчъагъэу яIэр:

1. «Урожай» (Тульскэр) — 38.
2. «Петра-2022» (псэупIэу Новомышатовскаяр) — 32.
3. «Кубань Холдинг-2» (Павловскэ район) — 31.
4. «ГНС-Спартак» (Краснодар) — 29.
5. «Урожай» (станицэу Ивановскаяр) — 20.
6. «Жемчужина» (Шъачэ) — 17.
7. «Зэкъошныгъ-2» (Мыекъуапэ) — 14.
8. «Торпедо» (Ермэлхьабл) — 9.
9. «Олимп-Универспорт» (Краснодар) — 8.
10. «Аполлония» (Выселки) — 3.