Адыгеим и ЛIышъхьэу КъумпIыл Мурат Мыекъопэ районым зыщэIэм къутырэу Северо-Восточные Сады, псэупIэхэу Победэм ыкIи Краснооктябрьскэм врач амбулаториехэм яшIын зэращыкIорэр зэригъэ­лъэгъугъ.

Къэралыгъо программэу «Псауны­гъэм икъэухъумэнкIэ пэублэ IэпыIэгъу зыщаратыхэрэм ягъэкIэжьын» зыфиIорэм къыдыхэлъытагъэу а псэуалъэхэр ашIых. Къуаджэхэм медицинэ IэпыIэгъур цIыф­хэм зэращарагъэгъотырэр нахьышIу шIыгъэным а программэр фытегъэ­псыхьагъ.
АР-м и ЛIышъхьэ игъусагъэх федеральнэ инспектор шъхьаIэу Сергей Дрокиныр, АР-м псауныгъэм икъэухъу­мэнкIэ иминистрэу Мэрэтыкъо Рустем, муниципальнэ гъэпсыкIэ зиIэ Мыекъопэ районым ипащэу Михаил Марьиныр, АР-м икъэралыгъо бюджет учреждениеу «Стройзаказчикым» иIэшъхьэтетэу Хьаджымэ Аслъан.

КъумпIыл Мурат Мыекъопэ районым зыщэIэм подрядчикхэм, чIыпIэ адми­нистрациехэм ялIыкIохэм гущыIэгъу афэхъугъ. ПсэупIищми врач амбулаториехэр зычIэтыщтхэ унэхэм апкъ ашIыгъах, джы унэ кIоцI IофшIэнхэр зэшIуа­хых. ПсэолъитIур шышъхьэIум атынэу щыт, Краснооктябрьскэм щашIырэ амбулаториер мы илъэсым ыкIэхэм дэжь аухыщт. Республикэм и ЛIышъхьэ пшъэ­рылъ афишIыгъ IофшIэнхэм ягъэцэкIэн зэрэкIорэр зэрауплъэкIурэр агъэлъэшынэу, псэуалъэхэм къапэIулъ чIыпIэ-
хэр зэрагъэфэнхэу, чъыгхэмрэ къэгъагъэхэмрэ ащагъэтIысынхэу, унэхэм якIо­лIэрэ гъогухэр агъэцэкIэжьынхэу. КъумпIыл Мурат джащ фэдэу агу къыгъэ­кIыжьыгъ къутырэу Северо-Восточные Сады дэс цIыфхэм ялъэIу: псэупIэр джыри нахь зэтырагъэпсыхьанэу ахэр фаех. АР-м и ЛIышъхьэ медицинэ учреждением кIэлэцIыкIу джэгупIэ къы­гуашIыхьанэу пшъэрылъ афишIыгъ.
ПсэолъэшIыным епхыгъэ Iофыгъохэм анэмыкIэу амбулаториякIэхэр Iэмэ-­псымэхэмкIэ зэрэзэтырагъэпсыхьащтхэм, IэпэIэсэныгъэ зыхэлъ IофышIэхэр икъоу къызэрэращэлIэщтхэм атегущы­Iагъэх. Адыгеим и ЛIышъхьэ псауныгъэм икъэухъумэнкIэ Министерствэм пшъэрылъ фишIыгъ къуаджэхэм медицинэ IофышIэхэр нахьыбэу ащылэжьэнхэм епхыгъэ IофшIэныр ыгъэлъэшынэу. МыщкIэ къызфагъэфедэнхэ фае программэхэу «Къоджэ докторымрэ» «Земскэ фельдшерымрэ».
«Фельдшер-мамыку IэзапIэхэм яшIын графикым диштэу макIо, ау пIалъэхэм язакъоп мэхьанэ зиIэр, IофшIэнхэр зэкIэ дэгъоу зэшIохыгъэ зэрэхъущтхэм игу­гъапIи щыIэн фае. А учреждениехэр икъоу зэтегъэпсыхьэгъэнхэ ыкIи цIыфхэр рагъэблэгъэнхэм фэхьазыр хъунхэ фае», — къыIуагъ КъумпIыл Мурат.

Шъугу къэтэгъэкIыжьы: 2025-рэ илъэ­сым ыкIэм ехъулIэу Адыгеим врач ам­булатории 7 щагъэпсынэу рахъухьагъ: селоу Садовэм (Красногвардейскэ район), къуаджэхэу Афыпсыпэрэ Щын­джыерэ (Тэхъутэмыкъое район), псэу­пIэхэу Абдзэхэхьабл, Победэм, Краснооктябрьскэм, къутырэу Северо-Восточные Сады (Мыекъопэ район).

Республикэм и ЛIышъхьэ къызэрэхигъэщыгъэмкIэ, а проектхэр гъэцэкIагъэ зыхъухэкIэ, республикэм щыпсэурэ цIыфыбэхэм анахь къапэблэгъэ медицинэ учреждением нэсынхэмкIэ зэпа­чыщтыр бэкIэ нахь макIэ хъущт. Фельдшер-мамыку IэзапIэхэмрэ врач амбулаториехэмрэ нахьыбэ зыхъухэкIэ, пэублэ медикэ-санитар IэпыIэгъури нахьышIоу зэхэщагъэ хъущт, анахьэу етIани зыныбжь хэкIотагъэхэмрэ кIэлэцIыкIухэр зэрыс унагъохэмрэкIэ ащ мэхьанэшхо иI.

«УФ-м и Президентэу Владимир Путиным социальнэ инфраструктурэм хэхъоныгъэ егъэшIыгъэнымкIэ, медицинэ фэIо-фашIэхэр цIыфхэм нахь дэгъоу афэгъэцэкIэгъэнхэмкIэ пшъэ­рылъхэу къыгъэуцугъэхэм ренэу тадэлажьэ. Партийнэ программэхэу «Единэ Россием» иIэхэм, къэралыгъо программэхэм, лъэпкъ проектхэм къатырэ амалхэр зэкIэ нахь дэгъоу дгъэфедэнхэм тынаIэ тетэгъэты», — къыIуагъ АР-м и ЛIышъхьэ.
Къэралыгъо программэхэмрэ лъэпкъ проектхэмрэ яшIуагъэкIэ мы аужырэ илъэси 8-м Адыгеим кIэу сымэджэщи 4, поликлиники 5, фельдшер-мамыку IэзэпIэ 33-рэ ыкIи врач-амбу­латории 3 къыщызэIуахыгъ. Мы илъэсым ыкIэм ехъулIэу Мыекъуапэ, Адыгэ­къалэ, Джэджэ, Кощхьэблэ ыкIи Тэ­хъутэмыкъое районхэм сымэджэщ ыкIи IэзэпIи 5 игъэкIотыгъэу ащагъэцэ­кIэжьыщт.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.