Социальнэ газификацием къыдыхэлъытагъэу хэпIэ 12904-мэ гъэстыныпхъэ шхъуан­тIэм ирыкIуапIэхэм апышIэгъэнхэмкIэ зэзэгъыныгъэхэр адашIыгъэх.

АщкIэ ищыкIэгъэ псэуалъэхэр унэ 11931-мэ ягъу­напкъэхэм анагъэсыгъ, 6106-р гъэстыныпхъэм па­шIагъэх. Пчъагъэхэр шъхьэихыгъэ къышIыгъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэм.
2022 — 2025-рэ илъэсхэм фэгъэкIотэнхэр зиIэ нэбгырэ 1418-рэ социальнэ газификацием къыхиубытагъэх. Пчъагъэм хэхьэх хэушъхьафыкIыгъэ дзэ операцием хэлэжьэрэ нэбгырэ 216-рэ.
ХэпIэ тедзэхэм гъэстыныпхъэр анэгъэсыгъэнымкIэ IофшIэнхэр агъэцакIэх. Ащ фэдэ товариществэ 43-рэ тишъолъыр щагъэунэфыгъ. ПстэумкIи зэзэгъыныгъи 116-рэ адашIыгъах, хэпIэ 86-мэ ягъунапкъэхэм гъэстыныпхъэр аращэлIагъ, унэ 12-мэ ащагъэблагъ.
— Джащ фэдэу социальнэ псэуалъэхэм газыр ящэлIэгъэнымкIэ лъэIу тхылъ 28-рэ къатыгъ (12-р псауныгъэр къэухъумэгъэным иех, 16-р — гъэсэныгъэм). Мы пчъагъэм щыщэу 26-мэ гъэстыныпхъэр аращэлIагъ, 11-м — ащыхагъэнагъ. КъыдэгъэкIыжьыным пылъхэм ыкIи нэмыкI организациехэм газыр ящэлIэгъэнымкIэ шъолъыр программэм зэхъокIыныгъэхэр къызщыдыхэлъытэгъэщт тхьапэхэм ягъэхьазырын джырэкIэ дэлажьэх, — къыIуагъ Владимир Нарожнэм.
АР-м и ЛIышъхьэу КъумпIыл Мурат мы лъэны­къомкIэ IофшIэным къыкIырамыгъэчынэу, рахъухьагъэр игъом агъэцэкIэнэу пшъэрылъ афишIыгъ.