ЩыIэныгъэмкIэ IэзэгъукI
ЛъырыкIуапIэхэр операцие шIыгъэнхэмкIэ шIыкIакIэхэм ягъэфедэн Адыгеим щыдэлажьэх.
Адыгэ республикэ клиническэ сымэджэщым гум кIэрыкIырэ лъырыкIуапIэу пкъышъолым щызэбгырыкIырэм (артерием) иукъэбзынкIэ апэрэу шэпхъакIэхэм адиштэрэ консоль рахьылIагъ. Шъолъырым къытIупщыгъэ ахъщэмкIэ пкъыгъуакIэр зэрагъэгъотыгъ.
Пэрыохъунчъэу лъыр лъынтфэм рыкIонымкIэ зишIуагъэ къэкIорэ стентыр сымаджэм хэзгъэуцуагъэхэр клиническэ сымэджэщым рентгенохирургическэ IэзэнымкIэ ыкIи узхэр къыхэгъэщыгъэнхэмкIэ икъутамэ ипащэу Щыко Руслъанрэ Краснодар иклиническэ сымэджэщэу N 1-у С.В. Очаповскэм ыцIэ зыхьырэм иврачэу Андрей Пахолковымрэ.
АР-м псауныгъэр къэухъумэгъэнымкIэ и Министерствэ къызэрэщаIуагъэмкIэ, технологиякIэм игъэфедэн имэхьаныр, тегъэфагъэу Iоф зышIэрэ Iэмэ-псымэу бырыум ехьщырымкIэ гу лъынтфэм ришIыхьэгъэ лъы пцIагъэхэр зэрагъэкIодыхэрэр ары. Ар катетеркIэ лъынтфэм ыкIоцI рагъахьэ ыкIи зы такъикъым гъогогъуи 160-рэ зегъэчэрэгъу.
— Ащ ихьатыркIэ бгъузэ хъугъэ лъынтфэр зыпкъ еуцожьы. Лъыр шапхъэм тетэу рыкIо мэхъужьы. Арынчъэу, лъы пцIагъэхэм япшIэшъун щыIэп. Арышъ, мыщ фэдэ екIолIакIэм ишIуагъэкIэ зилъырыкIуапIэ зэщыкъогъэ сымэджэ хьылъэхэмкIэ хэкIыпIэ щыIэ хъугъэ, — къыщаIуагъ АР-м псауныгъэр къэухъумэгъэнымкIэ и Министерствэ.