Программэу «Уры­сы­ем инеущырэ маф» зыфиIорэм къыдыхэ­лъытагъэу теннис цIыкIумкIэ Адыгэ Респуб­ликэм изэIухыгъэ зэ­нэкъокъу Мыекъуапэ щэкIо.

Зыныбжь илъэс 14-м емы­хъугъэхэм ащытекIуагъэхэр мы мафэхэм къэнэфагъэх. МэфитIум къыкIоцI Урысыем и Къыблэ исубъектибгъумэ къарыкIыгъэ пшъэшъэ 34-мэ ыкIи кIэлэ 48-мэ заушэтыгъ. Пшъашъэхэм язэнэ­къокъу текIоныгъэр къыщыди­хыгъ къалэу Лабинск къэзыгъэлъэгъогъэ Дарья Кузнецовам. ЯтIонэрэ ыкIи ящэнэрэ чIыпIэхэр афагъэшъошагъэх Сидоровхэу Викториерэ Вероникэрэ, мыхэр зэшыпхъух, къалэу Ставрополь щыщых.
Ставрополь илIыкIоу Андрей Бурак кIалэхэмкIэ анахь лъэ­шыгъ. Шытхьалэ щыщ Даниил Казарцевыр ятIонэрэ хъугъэ, Пятигорскэ илIыкIоу Арман Мкртчян ящэнэр.

Адыгеим испортсменхэмкIэ къэгъэлъэгъон анахь дэгъу зиIэр яплIэнэрэ чIыпIэр къыдэзыхыгъэ Артем Вариводиныр ары. Ирина Славновар япшIыкIухэнэрэ хъугъэ, тIури Мыекъуапэ щыщых.
Турнирым икIэух едзыгъо непэ рагъэкIокIыщт. Ащ 2008-рэ илъэ­сым ыкIи ащ ыуж къэхъугъэхэр хэ­лэжьэщтых. Зэнэкъокъум изэхэщакIохэм къызэраIуагъэмкIэ, Iоф­тхьабзэм хэлажьэхэрэм ухьазырыныгъэ дэгъу къагъэлъагъо, ащ дакIоу теннис цIыкIум пыщэгъэ ныбжьыкIэхэм япчъагъэ хэ­хъо. Мы спорт лъэпкъым зиу­шъомбгъуным, сэнаущыгъэ зы­хэлъ ныбжьыкIэхэм зыкъызэIуахыным афэIорышIэ программэу «Урысыем инеущырэ маф» зыфиIорэр.
Шъолъыр зэфэшъхьафхэм къа­рыкIыгъэ спортсменхэм ыкIи тре­нерхэм опытэу аIэкIэлъымкIэ зэхъожьынхэмкIэ Адыгеим щы­зэхащэгъэ турнирыр площадкэ дэгъу хъугъэ. Чемпионатым къы­дыхэлъытагъэу рагъэкIокIыгъэ мас­тер-классхэм ыкIи семинархэм яшIогъэшхо къэкIуагъ. Зэнэ­къокъум иаужырэ мафэ гъэшIэгъонэу, узIэпищэу зэрэкIощтым щэч хэлъэп.