Урысые патриотическэ Iофтхьабзэу «Хэгъэгум къулыкъу фэсэхьы» зыфиIорэр бэдзэогъум и 23-м ятIонэрэу къэралыгъом щатIупщыгъ.

Фондэу «Хэгъэгум иухъумакIохэмрэ» Урысые обществэу «ШIэныгъэмрэ» зэгъусэхэу рагъэкIокIырэ федеральнэ Iофт­хьабзэм къыдыхэлъытагъэу, хэушъхьафыкIыгъэ дзэ операцием иветеранхэм чIыпIэ зэфэшъхьафхэм зэIукIэгъухэр ащызэхащэщтых, нахьыбэмкIэ ныбжьыкIэхэр къыхагъэлэжьэщтых. КIэлэцIыкIу зыгъэпсэфыгъо кампаниеми ар изы Iахьэу хэтыщт.
Ащ мурад шъхьаIэу иIэр: хэушъхьафыкIыгъэ дзэ операцием иветеранхэм тынаIэ атедгъэтыныр, ахэр ныбжьыкIэхэм аIукIэхэзэ, лIыгъэу зэрахьагъэр, Хэгъэгур къаухъумэнэу зыкIеуцолIагъэхэр къафаIотэнхэр ары. Къэралыгъор къызэраухъумэрэм, итарихъ, ишэн-хабзэхэр къызэрэзэтырагъанэрэм тинепэрэ лIы­хъужъхэр ежь ящысэкIэ адэгощэнхэ амал яIэныр.
— Урысые Iофтхьабзэу «Хэгъэгум къулыкъу фэсэхьы» зыфиIорэр лIэужхэм язэпхыныгъэ гъэпытэгъэнымкIэ ыкIи патриот шъыпкъэхэр пIугъэнхэмкIэ мэхьанэ зиIэ лъэбэкъу. Непэ тиныбжьыкIэхэм яхэгъэгу итарихъ ашIэным имызакъоу, ащ инеущкIэ пшъэдэкIыжьэу ахьырэр зэхашIэн фае. ЛIыгъэм, Хэгъэ­гум, лIыхъужъныгъэм афэгъэхьыгъэу шъыпкъэр хэти нахь дэгъоу кIэлэцIыкIухэм къафэзыIотэн зылъэкIыщтхэр хэушъхьафыкIыгъэ дзэ операцием иветеранхэр ары. Мы гукъэкIым ветеранхэр ыкIи мы уахътэм Хэгъэгур къэзыухъу­мэхэрэр зэрепхых, тятэжъ пIашъэхэм зэрахьэгъэ лIыхъужъныгъэр лъагъэкIуа­тэзэ, ядзэ пшъэрылъ зэрагъэцакIэрэм имызакъоу, къэралыгъом ишIэныгъэ, икультурэ, иэкономикэ яшIуагъэ къыщагъакIо. Ащ фэдэ ухъумакIохэр зэрэтиIэхэм тырэгушхо, ахэм ящысэкIэ къыт­кIэхъухьэхэри Урысыем ицIыф зэрэхъущтхэм тицыхьэ телъ, — къы­Iуагъ Урысыем зыкъэухъумэжьынымкIэ иминистрэ игуадзэу, фондэу «Хэгъэгум иухъумакIохэр» зыфиIорэм итхьаматэу Анна Цивилевам.
— ИлъэситIу хъугъэу фондэу «Хэгъэ­гум иухъумакIохэр» тигъусэу Iоф зэдэтэшIэ. Мыр тэркIэ Iофтхьэбзэ къодыеу щытэп, мэхьанэшхо зиIэ пшъэрылъ. Зыпсэ емыблэжьэу Хэгъэгум итарихъ зытхырэ тилIыхъужъхэм къыткIэхъухьэрэ лIэужхэр аIукIэнхэмкIэ амалышIу. Пат­риотизмэм имэхьанэ нахь куоу зэхашIэнымкIэ, цIыф гъэнэфагъэхэм лIыгъэу зэрахьагъэм рыгушхонхэмкIэ мыщ фэдэ зэIукIэгъухэм яшIуагъэ къэкIощт. Мы уахътэм зэкIэми типшъэрылъыр Урысыем илIэуж пстэури а шIэжьым зэрипхыныр ары, — хигъэунэфыкIыгъ Урысые обществэу «ШIэныгъ» зыфиIорэм игенеральнэ пащэу Максим Древаль.
Урысые Iофтхьабзэу «Хэгъэгум къулыкъу фэсэхьы» зыфиIорэр окIофэ, дзэ щытхъум, ошъогу-десант ыкIи хыдзэ флотым ямафэхэр къыхырагъэубытэщтых ыкIи шышъхьэIум и 22-м, УФ-м и Къэралыгъо быракъ и Мафэ, зэфашIыжьыщт.
2024-рэ илъэсым бэдзэогъум и 10-м мы проектыр рагъэжьэгъагъ ыкIи ар окIофэ, хэушъхьафыкIыгъэ дзэ операцием хэлажьэхэрэм, иветеранхэм зэIукIэгъу 1000-м ехъу рагъэкIокIыгъ.
Адыгеим иныбжьыкIэхэм аIукIагъ
Iофтхьабзэу «Хэгъэгум къулыкъу фэсэхьы» зыфиIорэм къыдыхэлъытагъэу, къэралыгъо фондэу «Хэгъэгум иухъумакIохэм» ишъолъыр къутамэ кIэщакIо зыфэхъугъэ зэIукIэгъу гупчэу «Адыгеим иныбжьыкIэхэр» зыфиIорэм щыкIуагъ. Хыдзэ флотым и Мафэ ипэгъокIэу ащ къырагъэблэгъагъэр хэушъхьафыкIыгъэ дзэ операцием хэлэжьагъэу, отставкэм щыIэ дзэ морякэу, я 3-рэ ранг зиIэ капитанэу Олег Спиряковыр ары.
Уихэгъэгу шIу плъэгъуным, къэуухъу­мэным мэхьанэ зэриIэр, Темыр флотым ыкIи хэушъхьафыкIыгъэ дзэ операцием къулыкъу зэращихьыгъэр къэзэрэугъоигъэхэм ащ къафиIотагъ.
— Дзэ операцием гуфакIоу сыкIуагъ, офицерэу сызэрэщытым фэшI нэмыкI зекIуакIэ къысхэфэн ылъэкIыщтыгъэп. Хэгъэгур, унагъохэр, тичIыгогъухэр къэ­сыухъумэнхэр къыхэсхыгъ. Дзэ сэнэхьатэу сиIэмкIэ IофшIэн зысэмыгъотым, мотострелковэ дзэхэм рядовоеу сахэхьагъ. Анахьэу типшъэрылъыгъэр пыим тылъыплъэныр ары. Украинскэ диверсионнэ купхэр къызнэсыгъэхэр къыхэдгъэщыщтыгъэх, мэхьанэ зиIэ псэуалъэхэм тынаIэ атетыгъ, — къафиIотагъ Олег Спиряковым.
ЗэолIым къэбарэу къыIотагъэхэр ашIогъэшIэгъонэу ныбжьыкIэхэр едэIугъэх, упчIэ зэфэшъхьафхэр ратыгъэх. Ахэм зэу ащыщ щынэр къытекIоу къы­хэкIыгъэмэ къызэрэкIэупчIагъэхэр.
— ХэушъхьафыкIыгъэ дзэ операцием сыхэлэжьэфэ сыщынагъэу къыхэкIыгъэп, ащкIэ зишIуагъэ къэкIуагъэр дзэ Iофым хэшIыкI зэрэфысиIэр арыгъэн фае. ДзэкъулыкъушIэ унагъом сыкъихъухьагъ, сятэжъ къыщегъэжьагъэу сэ ящэнэрэ офицерэу тыщыт. Илъэсибл нахь сымыныбжьэу артиллерийскэ къухьэм сятэжъ сырищэгъагъ. СицIыкIугъом къыщегъэ­жьагъэу хыдзэм сыкъызэрэщекIокIыгъэм фэшI атомнэ псычIэгъ къухьэм къулыкъур щысхьы зэхъуми щынэр зэхэсшIагъэп. Джащ фэд, дзэ операцием сыкъэ­тыфэ сиIофшIэн згъэцэкIагъэ, командирхэм къаIорэм седэIугъ, — къыIуагъ къырагъэблэгъэгъэ лIыхъужъым.
КIэухым дзэкIолIхэм письмэхэр афатхыгъэх, ахэм зэрафэразэхэр араIуагъ ыкIи псынкIэу ядэжь къагъэзэжьынэу афэлъэIуагъэх..
Iэшъынэ Сусан.