Адыгеим фабэр щызэкIакIорэп. Пчэдыжьым сыхьатыр блым къыщегъэжьагъэу тыгъэм ыкIуачIэ зыхыуегъашIэ. ЦIыфхэр жьаурыкIохэу чъыIэтагъэхэм къащакIухьэ. Ау щэджа­гъорэ ащи ишIуагъэ къэ­кIожьырэп. «Чъыгхэми жьау къатыжьырэп» зыфаIорэм фэдэу, мафэр зэфэныкъо зыхъу­рэм тыгъэм зышIогъэбылъы­гъуае мэхъу. Арышъ, нахьыбэмэ мафэм иапэрэ Iахь къызфагъэ­федэ е пчыхьэ кIасэм, чъыIэтагъэ къызыхъурэм, къекIых. Ау пстэуми фабэм зышIуагъэбылъы­рэп, ар зикIасэхэри щыIэх. ГущыIэм пае, Мыекъуапэ щыпсэурэ Ксения Зайчиковам бэмэ афэмыщэчырэ фабэр шIотхъагъу.
— Бытырбыф тыщыпсэугъэу мыщ тыкъэкIожьыгъ. Арышъ, тэ фабэм тыфэлIагъ. Егъэлыегъащэуи слъытэрэп, къысэкIоу, сытхъэжьэу сыхэт,— еIо ащ.
Пчэдыжьыпэ чъыIэтагъэр къызфегъэфедэ кIэлэцIыкIу зыгъэпсэфыпIэм кIорэ сабыйхэм алъыплъэрэ Юлия Чмеленкэм. Мэкъуогъу чъыIэтагъэмкIэ кIэлэцIыкIухэр пчэдыжьрэ нахьыбэрэ жьым хагъэтыщтыгъэхэмэ, джы сыхьатыр пшIым нэс ныIэп.

— Мы мазэр фэбэ дэд. Сэ сшъхьэкIэ къысэхьылъэкIы, ау сыда пшIэщтыр, Iоф пшIэн фае. Удэсмэ, унэм уисыщт, — къыз­дэгуащэ ар.
Iоф ышIэрэп, ау унэм исышъу­рэп Елена Ермаковар. Лениным ыцIэ зыхьырэ гупчэм ихъэ­ренэхэр икIэсэ чIыпI. Тыгъэр къышъхьащэуцофэ ахэм ащыщ исэу тхылъ еджэ.
— Жьаум учIэсыфэ дэгъу, ау нахь фабэ къызыхъукIэ, сэкIожьы. Мыщ фэдэу жьым сыхэсэу седжэнэу сикIас, арышъ, пчэдыжь чъыIэтагъэм сыкъэкIо — еIо пшъэшъэ ныбжьыкIэм.
Нижний Новгород къикIыгъэ Варченкэхэм яунагъо мы мафэхэм Мыекъуапэ зыщегъэ­псэфы, илъэгъупхъэ чIыпIэхэр зэрегъэлъэгъух. Хы Iушъом щыIагъэхэу республикэм къэкIуа­гъэх. Ащ елъытыгъэмэ, Адыгеим жьы къыщыпщэныр нахь псынкIэу къыхагъэщы.
— Тэ тадэжьи мы мафэхэм фабэу градус щэкIыр щыI, ау Iо хэмылъэу, шъуадэжь нахьыбэжь. Адэ, ар зэхэтэшIэ шъхьаем, дэхагъэу тлъэгъурэм ар ттырехы, — аIо ахэм.
Фабэм тыфэлIагъэми, бэдзэ­огъу жъоркъым тыкIигъэ­гъожьыгъ. Аужырэ мэфищым фабэм ыкIуачIэ анахьэу лъэшыгъэ, градус 38-м нэсыгъ. Непи мэфэ жъоркъыщтэу ом изытет лъыплъэрэ къулыкъум къеты, фабэр градус щэкIрэ бгъурэм нэсынэу ыгъэунэфыгъ. Ау ащ ыуж фабэр нахь къеIы­хыщт, ощххэри къыздихьыщтых. Шъыпкъэмэ уахътэм къыгъэ­нэфэщт.
Анцокъо Ирин.