Хьылъэзещэ машинэхэр зезыфэхэрэм уахътэу зыщызекIохэрэр зэраукъуагъэм ыкIи зэращэрэм ионтэгъугъэ къызэрэрагъэхъугъэм афэгъэхьыгъэу илъэсыр къызихьагъэм къыщыублагъэу сомэ миллион 36-кIэ Адыгеим щагъэпщынагъэх.

Мы илъэсым ижъоныгъокIэ мазэ и 20-м къыщыублагъэу Iоныгъом и 20-м нэс, мафэм фабэу градус 32-м нахьыбэ щыIэ зыхъукIэ, шъолъыр мэхьанэ зиIэ гъогухэм хьылъэзещэ машинэхэр ащызекIо мыхъущтхэу Адыгеим щагъэ­нэфагъ гъогухэм ядэгъугъэ зэщамыгъэ­къоным фэшI. Ар зэрагъэцакIэрэм хэушъхьафыкIыгъэ къулыкъухэр лъэп­лъэх ыкIи яхьылъагъи шапхъэхэм ашIомыкIыным пае ащэчых. Ащ пае 2022 – ­2024-рэ илъэсхэм республикэм игъогухэм атырагъэуцуагъэх къэзыщэчыщтхэ Iэмэ-псымэхэу 6. Джащ фэдэу къэралыгъо автомобиль лъыплъэнымкIэ ЧIыпIэ отделым иIофышIэхэм стационарнэ ыкIи кощырэ пунктищмэ федеральнэ мэхьанэ зиIэ гъогухэм хьылъэзещэхэм якъэщэчын ащызэшIуахы.
АР-м и ЛIышъхьэ ипресс-къулыкъу къызэритырэмкIэ, мы илъэсыр къызихьагъэм къыщыублагъэу зэпымыоу ашIырэ уплъэкIунхэм къахиубытэу Iофтхьэбзэ 227-рэ рагъэкIокIыгъ, транспорт мини 3,6-рэ фэдиз ауплъэкIугъ, ахэм ащыщэу укъоныгъэхэр зиIагъэхэр – 1452-рэ. Укъоныгъэу къыхагъэщыгъэхэм зэкIэмкIи сомэ миллион 36-рэ зытефэгъэ административнэ Iофхэр къызэIуахыгъэх.
Адыгеим и ЛIышъхьэу КъумпIыл ­Мурат къыкIигъэтхъыгъ хьылъэзещэ машинэхэр зэрагъэзекIохэрэм лъыплъэгъэныр къулыкъу пстэоу ащкIэ пшъэдэкIыжь зыхьыхэрэм зэдызэшIуахын зэрэфаем: къэралыгъо автомобиль лъыплъэнымрэ гъогурыкIоныр щынэгъончъэнымкIэ къу­лыкъухэм хьылъэзещэхэр анахьэу зэрыкIорэ гъогухэм уплъэкIунхэр ащызэшIуа­хынхэр; хьылъэу зэращэн фаем ионтэгъугъэ къезыгъэхъурэ хъызмэтшIапIэхэр тхыгъэнхэр ыкIи ахэр зиехэм пшъэ­дэкIыжь ягъэхьыгъэныр.