Бзылъфыгъэхэм медицинэ IэпыIэгъу зыщарагъэгъотырэ IэзапIэхэм республикэм щахагъахъо ыкIи сабыйхэр къазщыфэхъухэрэ сымэджэщыр Iэмэ-псымакIэхэмкIэ зэтырагъэпсыхьэ.

Мыгъэ лъэпкъ проектэу «Унагъор» зыфиIорэм къыдыхэлъытагъэу сомэ миллион 475-рэ бзылъфыгъэхэм медицинэ IэпыIэгъу зыщарагъэгъотырэ IэзэпIитфым якъызэIухын пэIуагъэхьащт. Ахэм ащыщэу плIыр медицинэ организациехэм ачIэтых: К.М. Батмэным ыцIэ зыхьырэ сымэджэщэу Адыгэкъалэ дэтым, Кощхьэблэ район гупчэ сымэджэщым, Инэм IэзапIэм ыкIи Мыекъопэ районым игупчэ сымэджэщ. Джыри зы Джэджэ район сымэджэщым ичIыналъэ щагъэуцущт. Яблоновскэ IэзапIэм ыкIи Красногвардейскэ район гупчэ сымэджэщым 2026-м къащызэIуахынхэу агъэнафэ.
АР-м псауныгъэр къэухъумэгъэнымкIэ и Министерствэ къызэрэщаIуагъэмкIэ, медицинэ учреждениехэм Iэмэ-псымэхэу ящыкIагъэхэр зэкIэ къа­рагъэуалIэх.
Джащ фэдэу Мыекъопэ къэлэ сымэджэщым иперинатальнэ гупчи изэтегъэпсыхьан гухэлъ благъэхэм ащыщ. Ащ итехническэ амалхэр пкъыгъуи ­159-кIэ агъэкIэжьыщтых. Медицинэ оборудованиякIэ сымэджэ хьылъэхэр зычIэлъ­­хэ, къэхъугъакIэхэмрэ пIалъэм ыпэу къэхъугъэхэмрэ зыщаIыгъхэ отделение­хэм, джащ фэдэу операциехэр зыщашIыхэрэм ачIагъэуцощт.
— Джырэ уахътэм лъэпкъ проектым къыхиубытэу амалыкIэхэр щыIэнхэм тыдэлажьэ. Ар — бзылъфыгъэхэм медицинэ IэпыIэгъу зыщарагъэгъотырэ IэзапIэхэм хэушъхьафыкIыгъэ къулыкъу­хэу сабый къэхъуным ны-тыхэр ащыфэзыгъэхьазырыщтхэм якъызэIухын, — къыIуагъ Адыгеим и ЛIышъхьэу ­КъумпIыл Мурат.