Культурнэ пчыхьэзэхахьэу «Джэгу Ун» зышъхьэр Адыгэкъалэ щыкIуагъ. Къэлэ администрациемрэ Краснодар щызэхэщэгъэ Адыгэ Хасэмрэ ащ икIэщакIох.

ЗыгъэпсэфыпIэ чIыпIакIэу Адыгэкъалэ щагъэпсыгъэм и Амфитеатрэ мэфэкIыр щырекIокIыгъ. Iофтхьабзэр хъугъэ-шIэгъэ зэфэшъхьафхэмкIэ баигъэ. Лъэпкъ Iэпэ­щысэхэмкIэ егъэджэнхэр, адыгэ джэгукIэхэр, шIухьафтынхэр зэрылъ квестхэр, Iэпэщысэхэм яермэлыкъ, адыгэ джэгур ащ къыдыхэлъытэгъагъэх. Пчы­хьэм къыщегъэжьагъэу чэщ кIахэ нэс ар кIуагъэ. Адыгэкъалэ имызакъоу, республикэм ичIыпIэ зэфэшъхьафхэм къарыкIыгъэ ныбжьыкIэхэри ащ хэлэ­жьагъэх. Джащ фэдэу унэгъо-унагъохэу къекIолIагъэх.
— Пчыхьэзэхахьэм къекIолIагъэхэм зэкIэми лъэшэу тащыгушIукIыгъ. КIэлэ ныбжьыкIэхэмкIэ ар гъэшIэгъоныгъэ ыкIи шIэныгъэкIуапIэ хъугъэ, — къыщиIуагъ ителеграм-нэкIубгъо Адыгэ­къалэ ипащэу Хьачмамыкъо Азамат.
Нэбгырэ шъэ пчъагъэ пчыхьэзэхахьэм хэлэжьагъ. ЛIэуж зэфэшъхьафхэр зэфэзыщэгъэ ыкIи лъэпкъ культурэм имэфэкIышхоу ар хъугъэ. Ныбжьым емы­лъытыгъэу, шъхьадж шIогъэшIэгъоныр къыщыхихынэу амал иIагъ. Бэмэ ­лъэпкъ шъуашэхэр ащыгъыгъ. Ары пчыхьэзэха­хьэм мэхьэнэ шъхьаIэу иIагъэри: адыгэ культурэр къэухъумэгъэныр, зегъэужьыгъэныр, лIэужхэм азыфагу зэпхыны-
гъэ илъыныр, лъэпкъ зэхашIэр гъэпытэгъэныр.

— Непэрэ пчыхьэзэхахьэм сэ лъэшэу сигъэгушIуагъ. НыбжьыкIэхэм мурад зы­фагъэуцужьи, пшъэрылъхэр зыфа­шIыжьи, тхьапэм щызэхагъэуцуи рагъэ­кIокIыжьыгъ. Къалэу Краснодар къи­кIыгъэ ныбжьыкIэхэр чанэу хэлэжьагъэх. «Тхьашъуегъэпсэу» ясэIо. Зыгъэ­псэфыпIэу мэфэкIыр зыщыкIуагъэри чIыпIэ шIагъу, арышъ, зэкIэри шъукъеблагъ, — къыщитхыгъ ятелеграм-нэкIубгъо Адыгэкъалэ культурэмкIэ игъэIорышIапIэ ипащэу НапцIэкъо Мариет.

— Лъэшэу сигуапэ хъугъэ пчыхьэзэхахьэу сыкъызэкIолIагъэр. Мыщ фэдэ Iофтхьабзэхэр тищыкIагъэх. Адыгэм сыдигъуи хэлъыгъэу непи къытхэнэжьыгъэ культурэр мыщ фэдэ чIыпI къызщыбгъэлъэгъон плъэкIыщтыр. НыбжьыкIэхэр урамым къытепщынхэмкIэ зыфэпщэнхэ фаер спорт закъоп. Мыщ фэдэ зэха­хьэхэри ащ фэлажьэх. КъыткIэхъухьэ­хэрэр ппIунхэмкIэ ащ мэхьанэшхо иI, — еIо Адыгэкъалэ щыпсэурэ спорт­смен цIэрыIоу Шъхьащэкъо Кимэ.
МэфэкI дахэм, зэрэхабзэу, адыгэ джэгу дахэр кIэух фэхъугъ.