Адыгеим иныбжьыкIэхэм ялIыкIохэмрэ Къэралыгъо автоинспекцием иIофышIэ­хэмрэ зэгъусэхэу пэшIо­рыгъэшъ Iофтхьабзэу «Тызэгъусэу гъогур нахь щынэгъончъэ тшIыщт» зы­фиIорэр Мыекъуапэ щызэ­хащагъ.

Хабзэ зэрэхъугъэу, мы Iофтхьабзэм икIэщакIохэм лъэсрыкIохэм ыкIи водительхэм заIуагъэкIагъ ыкIи гъогум узэрэщызекIон фэе шэпхъэ шъхьаIэу щыIэхэр агу къагъэкIыжьыгъэх, гукъэгъэкIыжь тхылъ цIыкIухэри аратыгъ.
Транспортыр зыгъэIорышIэщтыгъэхэм гущыIэгъу афэхъугъэх ыкIи гъогум лъэшэу ущыкIоныр зэрэщынагъор, лъэс­рыкIохэм уафэсакъынэу зэрэщытыр ­ыкIи щынэгъончъэным ибгырыпх ренэу бгъэфедэн зэрэфаем анаIэ тырарагъэ­дзагъ.
Iофтхьабзэм хэлэжьэгъэ ныбжьыкIэ­хэм гъогум къытехъухьэрэ хъугъэ-шIагъэхэм зэфэхьысыжь афашIызэ, узщызэпырыкIын фэе чIыпIэхэр къыхагъэщыгъэх, цIыфхэм шэпхъэ гъэнэфагъэхэр агу къагъэкIыжьыгъ.
Джащ фэдэу къыхагъэщыгъ пщагъо хъумэ е мэзахэмэ щыгъынхэм акIыIу тыралъхьэрэ къэнэфырэ пкъыгъохэм яшIуагъэ къызэрэкIорэр.
Адыгеим иныбжьыкIэхэм гъогум тетхэм закъыфагъэзагъ щынэгъончъэу зекIонхэу, зэфэсакъыжьынхэу. Хэукъоныгъэхэм апкъ къикIэу тхьамыкIагъоу гъогухэм къатехъухьэхэрэм япчъагъэ нахь макIэ хъунэу Iофтхьабзэм хэлэ­жьагъэхэр мэгугъэх.