Къушъхьэу Фыщт ылъапсэ илъэс къэс щырагъэкIокIырэ ныбжьыкIэ зэхахьэр мыгъэ зыщыIэщт уахътэр къэнэфагъ – шышъхьэIум и 8-м къыщыублагъэу и 10-м нэс.

Ащ изэхэщэн фэгъэхьыгъэ зэхэсыгъо АР-м и Правительствэ и Унэ щыкIуагъ. АР-м и ЛIышъхьэ пшъэрылъ къызэрэфишIыгъэм тетэу ар зэрищагъ минист­рэхэм я Кабинет и Тхьаматэу КIэрэщэ Анзаур. Iофтхьабзэм хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, АР-м иминистрэхэм я Кабинет хэтхэр, муниципальнэ псэупIэхэм япащэхэр, Гупчэу «Адыгеим иныбжьыкIэхэр» зыфиIорэм иIофышIэхэр, Кавказ чIыопс ухъумапIэм, зекIо организациехэм республикэ къулыкъухэм ялIыкIохэр, шъолъырым иапшъэрэ еджапIэхэм япащэхэр.
КIэрэщэ Анзаур къызэриIуагъэмкIэ, Iофтхьабзэм зэрэхэлажьэхэрэмкIэ гъэ­хъагъэ зиIэ ныбжьыкIэхэр къыхагъэщых зэшIуахыгъэхэм апае. Ар зэрэзэхащэрэм идэгъугъи хэхъо зэпыт. Джы щыIэщтым изэхэщэни, ащ къыдыхэлъытэгъэщтхэми, щынэгъончъэным иIофыгъохэми тэрэзэу алъыплъэнхэ зэрэфаер министрэхэм я Кабинет и Тхьаматэ къыхигъэщыгъ.
АР-м ныбжьыкIэ IофхэмкIэ и Комитет итхьаматэу Максим Галушкиным къызэриIотагъэмкIэ, шышъхьэIум и 4-м АКъУ-м Iофтхьабзэм хэлэжьэщтхэр щаугъоищтых, мэфищ зекIом фэгъэхьыгъэ шIэныгъэ мафэу ар щытыщт. Нэбгырэ 500-м ехъу къушъхьэ лъапсэм кIощтэу агъэнафэрэр.
НыбжьыкIэ зэфэсым дунэе мэхьанэ иIэ хъущт. Адыгеим иныбжьыкIэхэм анэмыкIэу Краснодар краим, Къэ­бэртэе-Бэлъкъарым, Къэрэщэе-Щэрджэсым, Къалмыкъым, Херсон хэкум, ныбджэгъу­ныгъэ зыдытиIэ къэралыгъохэу Абхъазым ыкIи Беларусь хьакIэхэр къарыкIыщтых. Гъэсэныгъэм, шIэныгъэм, спортым, культурэм ыкIи общественнэ IофшIэным гъэхъагъэхэр ащызышIыгъэхэр ары ащ хэлэжьэнхэу къыхахыхэрэр.
ШIэныгъэ, экскурсие, спортивнэ, культурнэ ыкIи патриотическэ IофтхьабзэхэмкIэ зэхахьэр баищт. Хъугъэ-шIэгъэ анахь шъхьаIэу щытыщтыр Адыгеим и ЛIышъхьэ, министрэхэм я Кабинет хэтхэм машIом ыпашъхьэ ныбжьыкIэхэр зэрэщаIукIэщтхэр ары. ЗэдэгущыIэгъум илъэхъан, хабзэ зэрэхъугъэу, гукъэкIэу яIэхэмкIэ республикэ пащэхэм ныбжьыкIэхэр адэгощэщтых. Джащ фэдэу «Фыщт» ­изэIукIэгъу къыдыхэлъытагъэу купэу «Мыстым» икъэгъэлъэгъон щыIэщт, зэлъашIэрэ спортсменыр исэнаущыгъэхэмкIэ адэгощэщт, адыгэ джэгу зэхащэщт.
ЧIыопс ухъумапIэм игъогууанэхэм ныбжьыкIэхэр арыкIохэ, зыщыпсэущтхэм ягъэпсын зэшIуахы зыхъукIэ ыкIи экскурсие ащэхэ хъумэ, сэнэхьатым феджэгъэ зекIозещэхэр ягъусэщтых. Щынэ­гъончъагъэм хэушъхьафыкIыгъэ къулыкъухэмрэ Кавказ чIыопс ухъумапIэмрэ яIофышIэхэр лъыплъэщтых, медицинэ фэIо-фашIэхэр зэшIозыхыщтхэр шъолъы­рым иволонтерхэу медицинэм фэгъэсагъэхэр ары.
Министрэхэм я Кабинет ипащэ пстэуми анаIэ тыраригъэдзагъ инфраструктурэм игъэпсын икъоу зэшIуахыным – электроэнергиер, шхын стырыр, зэшъо­щтхэ псыр Iофтхьабзэм хэлажьэхэрэм яIэн фае. Къулыкъоу ащ изэхэщэн зыпшъэ илъ пстэуми ялIыкIохэр гъэхьазырынхэр зэрэкIохэрэм къытегущыIа­гъэх. КIэухым пстэуми зэхэщэнымкIэ пшъэ­рылъхэр афашIыгъэх.
Шъугу къэдгъэкIыжьын, ныбжьыкIэ пэрытхэм язэхахьэу «Фыщтыр» АР-м и ЛIышъхьэу КъумпIыл Мурат игукъэкIыкIэ апэрэу 2017-рэ илъэсыр ары зыщыIагъэр, ащ къыщыублагъэу илъэс къэс зэхащэ.