Хэбзэгъэуцу ныбжьыкIэхэм я Палатэу ФедерациемкIэ Советым щылажьэрэм социальнэ политикэмкIэ ыкIи псауныгъэм икъэухъумэнкIэ и Комитет итхьаматэу Адыгеим ихэбзэгъэуцу ныбжьыкIэ агъэнэфагъ.

Урысые Федерацием и Федеральнэ ЗэIукIэ ФедерациемкIэ и Совет хэбзэгъэуцу ныбжьыкIэхэм я Палатэ изэхэсыгъо щыкIуагъ. Ар зэращагъ ФедерациемкIэ Советым социальнэ политикэмкIэ и Комитет итхьаматэ игуадзэу, хэбзэгъэуцу ныбжьыкIэхэм я Палатэ игъэIорышIакIоу Александр Варфоломеевымрэ Палатэм итхьаматэу, Москва хэку Думэм идепутатэу Лев Закировымрэ.
Адыгеим ыцIэкIэ зэхэсыгъом хэлэ­жьагъ хэбзэгъэуцу ныбжьыкIэхэм я Палатэу ФедерациемкIэ Советым дэжь щылажьэрэм социальнэ политикэмкIэ ыкIи псауныгъэм икъэухъумэнкIэ и Комитет итхьаматэ ипшъэрылъхэр зыгъэцакIэу, АР-м и Къэралыгъо Совет – Хасэм щылэжьэрэ НыбжьыкIэ парламентым ипрофильнэ комитет итхьаматэу Бэрзэдж Асиет.
Хэбзэгъэуцу ныбжьыкIэхэм я Палатэ социальнэ мэхьанэ зиIэ гукъэкIхэу къы­рихьыжьэхэрэм ФедерациемкIэ Советым осэ ин къащыфашIыгъ.
ФедерациемкIэ Советым социальнэ политикэмкIэ и Комитет итхьаматэу Елена Перминовам ипсалъэ къыщыхигъэщыгъ мэхьанэшхо зиIэ социальнэ хэбзэгъэуцугъэм изэхэгъэуцон хэбзэгъэ­уцу ныбжьыкIэхэм яIахь зэрэхэлъыр. Зигугъу къышIыгъэр гъэтэрэзыжьынхэу зидзэ пшъэрылъ зыгъэцакIэзэ фэхыгъэ­хэм якIэлэцIыкIухэу ясабыигъом къыщыублагъэу сэкъатныгъэ зиIэхэм пенсие къафэкIонымкIэ фитыныгъэхэр къязытырэ шэсхэр къыздыхэлъытагъэхэр ары.
Александр Варфоломеевым къыхигъэ­щыгъ Урысыем ишъолъырхэм ащыпсэухэрэр анахьэу зыгъэгумэкIырэ Iофыгъо­хэм язэшIохын хэбзэгъэуцу ныбжьыкIэхэр чанэу зэрэхэлажьэхэрэр.
Зэхэсыгъом зэфэхьысыжь къыфа­шIыгъ апэрэ илъэсныкъо IофшIэным. Анахьэу анаIэ зытырагъэтыгъэхэр хэушъхьафыкIыгъэ дзэ операцием хэлажьэхэрэмрэ сабыибэ зэрыс унагъохэмрэ IэпыIэгъу ягъэгъотыгъэныр – лъэныкъохэу къэралыгъомрэ обществэмрэ непэ анахь зыгъэгумэкIыхэрэр.
Зэхэсыгъом хэлэжьагъэхэр атегущыIагъэх къадэхъугъэхэм, тапэкIэ зыдэлэжьэщтхэри агъэнэфагъэх.
Джащ фэдэу IофышIэхэм афэгъэхьыгъэ Iофыгъохэми ахэплъагъэх. Мэкъэтыным икIэуххэмкIэ, зэкIэми зэдырагъаш­тэу, Адыгеим илIыкIоу Бэрзэдж Асиет социальнэ политикэмкIэ ыкIи псауны­гъэр къэухъумэгъэнымкIэ Комитетым итхьаматэу хадзыгъ.
Ащ нэмыкIэу Бэрзэдж Асиет Рэзэныгъэ тхылъ къыратыгъ палатэм иIофшIэн гъэхъагъэхэр зэрэщишIыгъэхэм, къэралыгъом иныбжьыкIэ парламентаризмэ чанэу зызэриушъомбгъурэм ыкIи ишъо­лъыр ифэшъошэ лIыкIоу зэрэщытым апае.
«Социальнэ политикэмкIэ ыкIи пса­уныгъэр къэухъумэгъэнымкIэ Комитетым итхьаматэу ущытыныр щытхъушху. ЦIыфхэм щыIэкIэшIу яIэным фэIорышIэрэ лъэныкъохэм мыхэр анахь шъхьаIэх ыкIи Комитетым иIофшIэн тегъэпсыхьагъ хэбзэгъэуцу ныбжьыкIэхэм шIуагъэ къэ­зытыщт ихъухьанхэр пхырягъэщыгъэнхэм. Цыхьэу къысфашIыгъэм ыкIи къызэрэс­къоуцуагъэхэм апае сиIофшIэгъухэм сафэраз, ащ пшъэдэкIыжьышхо пылъ. Комитетым хэт зэIофшIэгъухэмкIэ тыхьазыр социальнэ ихъухьанхэр пхырытщынхэм, ар джырэ уахътэмкIэ зигъо Iофыгъоу щыт. Узэдэлажьэмэ ары ныIэп IофшIэныр дэгъоу зызэшIопхышъущтыр», — къыIуагъ Бэрзэдж Асиет.
Шъугу къэдгъэкIыжьын, тапэкIэ Бэрзэдж Асиет Федерацием и Совет и Рэзэныгъэ тхылъ къыфагъэшъошагъ УФ-м иныбжьыкIэ парламентаризмэ хэхъоныгъэ ышIыным иIахь зэрэхилъхьэрэм ыкIи УФ-м и Федеральнэ ЗэукIэ Федера­циемкIэ и Совет хэбзэгъэуцун IофшIэнэу зэшIуихырэм чанэу зэрэхэлажьэрэм апае.