Адыгеим и ЛIышъхьэу КъумпIыл Мурат зыгъэпсэфыпIэ шъолъырэу «Мэздах» зыфиIорэм щы­Iагъ, чIыпIэм изэтегъэпсыхьан зэрэкIорэм, IофшIэнхэр зэрэлъыкIуатэхэрэм нэIуасэ зафишIыгъ. Ащ игъусагъэх АР-м иминист­рэхэм я Кабинет и Тхьаматэ игуадзэу Хъоткъо Хъызыр, АР-м псэолъэшIынымкIэ, унэ-ком­мунальнэ ыкIи гъогу хъызмэтымкIэ иминистрэ иапэрэ гуа­дзэу Лафышъэ Рэмэзан, Мыекъуа­пэ имэрэу Геннадий Митрофановыр, къалэм иархитектор шъхьа­Iэу Ацумыжъ Мадинэ, программэу «ЛIыхъужъхэм ­яуахът» зыфиIорэм хэлажьэу Сергей Ковалевыр, подряднэ ­организацием илIыкIохэр.

УплъэкIун IофшIэнхэм ялъэхъан хэбзэ къулыкъухэм ялIыкIохэм къахэхьа­гъэх Мэздахэ иIэгъо-блэгъухэм защызыгъэ­псэфырэ цIыфхэр. Паркым изэтегъэ­псыхьан еплъыкIэу фыряIэмкIэ Адыгеим и ЛIышъхьэ ахэм яупчIыгъ, пшъэдэкIыжь зыхьырэ къулыкъухэм пшъэрылъ ­афишIыгъ ятIонэрэ чэзыум игъэцэкIэнкIэ цIыфхэм игъоу алъэгъухэрэр къыдалъы­тэнхэу.
Шъугу къэтэгъэкIыжьы: шъолъырэу «Мэздахэр», Нэгыежъ-Iуашъхьэ икъушъхьэтх къыщыхагъэкIыгъэр, къэлэ щыIэкIэ Iэрыфэгъум игъэпсынкIэ проект анахь дэгъухэм якъыхэхын епхыгъэ Урысые зэнэкъокъоу кIорэм диштэу зэтырагъэ­псыхьэ. Апэрэ чэзыум зэшIуахыщт Iоф­шIэнхэм апае сомэ миллиони 163,5-рэ къыхагъэкIыгъ. Зэтырагъэпсыхьажьыгъэ дэкIояпIэм дэжь зызыщыпплъыхьан плъэкIыщт чIыпIэ 2024-рэ илъэсым щагъэпсыгъагъ. КIэлэцIыкIу спорт ыкIи джэгупIэхэр зэтырагъэпсыхьагъэх. ЦIыфхэр зыщытезекIухьащтхэ ыкIи кушъхьэфачъэмкIэ къызщачъыхьащт гъогухэр ашIыгъэх. Архитектурнэ пкъыгъо цIыкIухэр, тIысыпIэхэр, хэкIитэкъупIэхэр, видеолъыплъэнымкIэ, аудиосистемэхэмкIэ ящыкIагъэхэр агъэпсыгъэх.
ЯтIонэрэ чэзыум къыдыхэлъытагъэу къалэм щыпсэухэрэмрэ хьакIэхэмрэ агу рихьырэ лъагъохэр, кушъхьэфачъэмкIэ къызщачъыхьан алъэкIыщтхэр ашIыгъэх. ПсыуцупIэхэмрэ ахэм къапэIулъ чIыпIэхэмрэ аукъэбзых, лъэс гъогухэр зэтырагъэпсыхьэх, чIыпIэхэм якъэгъэнэфын епхыгъэ Iофтхьабзэхэр зэшIуахых. Хъэренэхэр, зызщагъэпсэфыщт чIыпIэхэр ыкIи нэмыкIхэр шIэхэу къызфагъэфедэнхэ алъэкIыщтых. Лъэс гъогухэр нахьыбэу ашIыщтых, цIыфхэмкIэ нахь Iэрыфэгъу зэрэхъущтым тетэу ахэри зэтырагъэ­псыхьащтых.

Республикэм и ЛIышъхьэ зызыгъэпсэфыхэрэр игъусэхэу IофшIэнхэу зэшIуа­хыхэрэм язытет зэригъэлъэгъугъ, джыри нахь дэгъоу а чIыпIэр зэтегъэ­псыхьагъэ хъуным пае ашIэмэ нахьышIу­хэмкIэ цIыфхэр упчIэжьэгъу ышIыгъэх. АР-м псэолъэшIынымкIэ и Министерствэрэ муниципалитетымрэ япащэхэм КъумпIыл Мурат пшъэрылъхэр афишIыгъэх шъолъырыр нахь зэтегъэпсыхьагъэ хъунымкIэ, ищыкIэгъэ Iофыгъохэр зэшIуахынхэу. Адыгеим и ЛIышъхьэ анахьэу анаIэ зытыраригъэдзагъэр а чIыпIэ дахэм яягъэ рамыгъэкIыныр, псэолъэшIынымкIэ агъэфедэхэрэм тыкъэзыуцухьэрэ дунаим зэрар рамыхыным къыдыхэлъытэгъэ Iофтхьабзэхэр тэрэзэу зэшIохыгъэнхэр ары.
Проектым изэшIохынкIэ ящэнэрэ чэзыум къыделъытэх цIыфхэм къызщакIухьащт, кушъхьэфачъэхэмкIэ къызщачъыхьащт чIыпIэхэм нахь зарагъэу­шъомбгъунэу, зекIонымкIэ инфраструктурэм хэхъоныгъэ рагъэшIынэу, щынэгъончъэным иамалхэр икъоу къыдалъы­тэнхэу, инжененр коммуникациехэр тэрэзэу агъэпсынхэу. А Iофтхьабзэхэр зэшIохыгъэ хъунхэм пае шъолъырым рихъухьагъ проект анахь дэгъухэм я Урысые зэнэкъокъу джыри хэлэжьэнэу. Къэлэ Iэрыфэгъу щыIакIэр гъэпсыгъэнымкIэ 2026 – 2027-рэ илъэсхэмкIэ рахъухьагъэхэр гъэцэкIагъэ хъунхэм зэкIэми яIахь хашIыхьан фае.
«Мэздахэр чIыпIэм изэтегъэпсыхьанкIэ проект къодыеу щытэп, зекIохэм япчъа­гъэ нахьыбэ шIыгъэнымкIэ, къэлэ щыIакIэр нахь Iэрыфэгъу хъунымкIэ Iофэу дгъэцакIэрэм изы Iахьышху ар. Непэ а чIыпIэм изэтегъэпсыхьан зэрэлъыкIуа­тэрэм Мыекъуапэ итеплъи къызэблехъу. Апэрэ чэзыум изакъоу кIэухышIоу фэхъу­гъэр нэрылъэгъу: чIыпIэр лъэшэу зэхъо­кIыгъэ хъугъэ, унагъохэм ясабыйхэр ягъусэхэу, ныбжьыкIэхэр, зыныбжь хэкIотагъэхэр ягуапэу мыщ къэкIох. Паркэу зигугъу къэтшIырэр цIыфхэм нахь зызфакъудыирэ чIыпIэ дахэу мэхъу, ащ зыщагъэпсэфы, щызэIокIэх, культурнэ Iофтхьабзэхэр щызэшIуахых. А пстэури ублэпIэ къодый ныIэп. Тэ гухэлъэу тиIэр чIыопсыр, Iэрыфэгъу щыIакIэр, гъэпсэфыныр зэгъусэхэу шIыгъэнхэр ары. ЧIыопсым идэхагъэ цIыфхэм агу щиз хигъахъоу, спортым пылъынхэу, къалэм игъунапкъэ шIомыкIхэу якIэлэцIыкIухэм зарагъэгъэпсэфын амал яIэнэу тыфай. ЦIыфхэр тигъусэхэу, цIыфхэм апай Мэз­дахэ зыкIызэтедгъэпсыхьэрэр. Мы Iофым къыхэлэжьэрэ пстэуми, зиеплъыкIэхэр къытэзыIохэрэм, проектыр нахьышIоу гъэцэкIагъэ хъунымкIэ зишIуа­гъэ къытэкIыхэрэм «тхьашъуегъэпсэу» ясэIо», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.