Донецкэ Народнэ Республикэм къикIыгъэ кIэлэеджэкIо нэбгырэ 24-мэ мы мафэхэм республикэм зыщагъэпсэфы, сэнэхьат зэфэшъхьафхэм япхыгъэу яшIэныгъэхэм ахагъахъо.

Мыекъопэ къэралыгъо технологическэ университетыр мы илъэсым апэрэу гъэсэныгъэ-зекIо программэу «Университетские смены» зыфиIорэм хэлажьэ. ЧэзыуитIоу гощыгъэу Урысыем ишъолъырыкIэхэм къарыкIыгъэ ныбжьыкIэхэр мыщ къырагъэблэгъэщтых.
КIэлэеджакIохэм ящыIэныгъэ зэрапхыщт сэнэхьатым икъыхэхын епхыгъэу «Ингредиенты успеха» («Пицца профессий) зыфиIорэ программэр апшъэрэ еджапIэм зэхигъэуцуагъ. Ащ къыдыхэлъытагъэу зэкIэмкIи нэбгырэ 48-рэ ащ къекIолIэнэу агъэнафэ. Мэфи 10-м къыкIоцI ныбжьыкIэхэм гъэсэныгъэ, культурнэ, патриотическэ Iофтхьэбзэ зэфэшъхьафхэр афызэхащэщтых. ЯшIэныгъэхэм зэрахагъахъорэм дакIоу загъэпсэфын амал яIэщт, зекIо кIощтых.
Апэрэ чэзыур зэрэкIорэр зэдгъэлъэгъугъ, мы апшъэрэ еджапIэм джыри чIэмыхьагъэхэм Iоф адэзышIэрэ гупчэм ипащэу Олег Франк гущыIэгъу тыфэ­хъугъ.
— Илъэс 14-м къыщегъэжьагъэу 17–м нэс зыныбжьыхэр ары къедгъэблагъэ­хэрэр. Донецкэ Народнэ Республикэм икъалэу Горловкэ ыкIи къалэу Иловайскэ къарыкIыгъэхэр ары джырэкIэ щыIэхэр. Программэм къыдыхэлъыта­гъэу сэнэхьат зэфэшъхьафхэм нэIуасэ афэтэшIых, университетым Iоф зэришIэрэр, тистудентхэм шIэныгъэ куу зэрагъэгъотынымкIэ амалышIоу аIэкIэлъхэр ятэгъэ­лъэгъух, мастер-классхэр, джэгукIэ зэфэшъхьафхэр афызэхэтэщэх. Адыгэ Республикэм ищыIэкIэ-псэукIэ зыфэдэр нэрылъэгъу афэхъугъ, шэн-хабзэхэм, культурэм, цIыф цIэрыIохэм нэIуасэ афэхъугъэх. Чыжьэу къикIырэ кIэлэе­джакIохэр шъолъырым итарихъ нэIуасэ фэхъух. Тилабораториехэр зэрядгъэлъэ­гъугъэм имызакъоу, мы мафэхэм хьисапымкIэ паркым тыщыIагъ, политехническэ колледжым имедицинэ кластер нэIуасэ фэхъугъэх. Мафэ къэс яуахътэ гъэшIэгъонэу, шIуагъэ пылъэу зэрагъэ­кIощтым тишъыпкъэу ыуж тит, — еIо Олег Франк.
Шъугу къэдгъэкIыжьын Урысые Федерацием и Президент иунашъокIэ УФ-м шIэныгъэмрэ апшъэрэ гъэсэныгъэмрэкIэ и Министерствэрэ Урысые общественнэ-къэралыгъо движениеу «Апэрэхэм ядвижениерэ» программэу «Университетские смены» зыфиIорэр мы аужырэ илъэсхэм зэрэзэхащэрэр. ЫпэрапшIэу хэушъхьафыкIыгъэ дзэ операцием щыIэхэм якIэлэцIыкIухэр, «Апэрэхэм ядвижение» зэхищэгъэ къыхэхыным пхырыкIыгъэхэр ары екIуалIэхэрэр.
Донецкэ Народнэ Республикэм къи­кIырэ кIэлэцIыкIухэм Адыгеир агу зэрэрихьырэр къытаIуагъ:
— Шъолъыр зэфэшъхьафхэм ащызэхащэгъэ мыщ фэдэ Iофтхьабзэхэм яплIэнэрэу сахэлажьэ. Мыекъопэ къэралыгъо технологическэ университетым программэ гъэшIэгъон зэхигъэуцуагъ, сэнэхьат зэфэшъхьафхэм нэIуасэ тафашIыгъ, ушэтынхэр тагъэшIыгъэх, джэгукIэхэмкIэ тимафэхэр баигъэх. Адыгеир лъэшэу сыгу рихьыгъ, ичIыопс идэхагъэ, ибаигъэ, икъушъхьэхэр зыфэдэр бэрэ сыгу илъыщт. ГъочIэгъыр сшIогъэ­шIэгъон дэдагъ, — еIо Кристина Гранкинам.
— Геологием епхыгъэ сэнэхьатыр зэзгъэгъотын мурад сшIыгъэми, мыщ тызыщыщагъэгъозэгъэ сэнэхьатхэр зэкIэ сшIогъэшIэгъоныгъэх. ШIэныгъэ лые щыIэп, щыIэныгъэм къырыкIощтыр къэшIэгъуай, ащыщ горэм зыфэзгъэзэнкIи мэхъу. ГъэшIэгъонэу бэ тфызэхащагъэр, анахьэу криминалистикэм ыкIи бионикэм япхыгъэ лъэныкъохэр сыгу къинэжьы­гъэх. Мыекъуапэ щыпсэухэрэр ­зэрэцIыфышIухэр тыушэтыгъэ, тарихъ мэхьанэ зиIэ чIыпIабэ тагъэлъэгъугъ, ахэм якъэбархэр сшIогъэшIэгъоныгъэх. ТымышIэрэ культурэм нэIуасэ тыфэхъугъ, бэ тыгу къи­нэжьыщтыр, — къыIуагъ Егор Белоноговым.
Бэдзэогъум и 25 мэфэкI шIыкIэм тетэу апэрэ чэзыур зэфашIыжьыгъ, и 26-м ныбжьыкIэхэр гъогу техьажьыгъэх. ЯтIонэрэ чэзыум иIофшIэн мы тхьаумафэм къыщегъэжьагъэу аублэщт, шышъхьэIум и 5-м нэс ахэр республикэм щыIэщтых.
ДЕЛЭКЪО Анет.