Урысые Федерацием следствиемкIэ икъулыкъухэм яIофышIэ и Мафэ фэгъэхьыгъэ мэфэкI Iофтхьабзэр АР-м и Правительствэ зычIэт унэм щыкIуагъ. Адыгеим и ЛIышъхьэу КъумпIыл Мурат къэзэрэугъоигъэхэм афэгушIуагъ.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ ­инспектор шъхьаIэу Сергей Дрокиныр, УФ-м и Следственнэ комитет АР-мкIэ иследственнэ гъэIорышIапIэ ипащэу Василий Лариныр, министрэхэм я Кабинет хэтхэр, АР-м и Парламент идепутатхэр, хэбзэухъумэкIо къулыкъухэм япащэхэр.
КъумпIыл Мурат следственнэ къулыкъухэм яIофышIэхэмрэ яветеранхэмрэ ясэнэхьат епхыгъэ мэфэкIымкIэ афэгушIуагъ, хабзэр Урысыем щымыукъогъэнымкIэ якъулыкъу мэхьанэшхо зэриIэр къыхигъэщыгъ. ХэбзэухъумэкIо къулыкъу зэфэшъхьафхэм, Следственнэ комитетым, хэгъэгу кIоцI IофхэмкIэ Министерствэм, щынэгъончъэнымкIэ Федеральнэ къулыкъум ыкIи нэмыкIхэм Iоф ащызышIэрэ следовательхэм цIыфхэм яфитыныгъэхэм якъэухъумэнкIэ, бзэджэшIагъэхэм апэуцужьыгъэнымкIэ япшъэрылъхэр агъэцакIэх.
«БзэджэшIагъэхэр зэрэзэхэшъуфырэмкIэ, къэзылэжьыгъэхэм пщыныжь зэряжъу­гъэхьырэмкIэ общественнэ щынэгъончъагъэмрэ хабзэмрэ якъэухъумэн шъуиIахьышIу хэшъошIыхьэ. Ащ фэдэ пшъэрылъхэр зыгъэцэкIэн зылъэкIыщтхэр шIэныгъэ куу зиIэхэр, теубытагъэ зыхэлъ­хэр, пшъэдэкIыжьэу ахьырэр икъоу къызыгурыIохэрэр, иIоф фэшъыпкъэхэр ары. Адыгеим иследовательхэр ащ фэдэ шэпхъэ лъагэхэм адештэх, янахьыжъ IофшIэгъухэм ахэлъ хэбзэ дэгъухэр лъа­гъэкIуатэх. Шъуисэнэхьат хэшIыкIышхо зэрэфышъуиIэм, хэбзэухъумэкIо, хэбзэ къулыкъухэм азыфагу зэпхыныгъэ пытэ зэрилъым яшIуагъэкIэ хэгъэгум ианахь щынэгъончъэ шъолъырхэм зэращыщы­гъэу Адыгеир къэнэжьы. Республикэм исоциальнэ-экономикэ хэхъоныгъэкIэ, тицIыфхэм ящыIэкIэ-псэукIэ зыкъегъэIэтыгъэнымкIэ ар лъэпсэ пытэу щыт», — къыIуагъ АР-м и ЛIышъхьэ.
Республикэм ипащэ зэрэхигъэунэфыкIыгъэмкIэ, мэхьанэшхо иI цIыфхэм ящынэгъончъагъэ къемыгъэIыхыгъэным, терроризмэм, экстремизмэм, зэхэщэгъэ бзэджэшIагъэм апэуцужьыгъэным.
Компьютерхэр къызфагъэфедэзэ зэрахьэрэ бзэджэшIагъэхэм апэуцужьыгъэнымкIэ, бюджет лъэныкъомкIэ бзэджэшIагъэу зэрахьэхэрэр зэхэфыгъэн­хэмкIэ, джырэ шIыкIэ-амалхэр яIофшIэн щагъэфедэнымкIэ пшъэрылъ заулэ ­КъумпIыл Мурат афишIыгъ. Анахьэу анаIэ зытырагъэтын фаер пенсионерхэм, сэкъатныгъэ зиIэхэм, сабыибэ зэрыс унагъохэм якъэухъумэн ары. Мэхьа­нэшхо зиIэ лъэныкъохэм ащыщ хэушъхьафыкIыгъэ дзэ операцием хэлажьэхэрэм, ащ иветеранхэм, ахэм яунагъохэм арысхэм яфитыныгъэхэмрэ яфедэхэмрэ якъэухъумэн.
Республикэм и ЛIышъхьэ къызэрэхигъэщыгъэмкIэ, цIыфхэм ятхылъхэм язэхэфын икъоу анаIэ тырагъэтын фае.
«Республикэм исхэм къаIэкIэкIырэ тхылъхэм псынкIэу ахэплъэнхэ, ахэмкIэ хэкIыпIэ къагъотын фае. Джащыгъум цIыфхэм хэбзэухъумэкIо къулыкъухэм, къэралыгъоми цыхьэу афашIырэм нахь хэхъощт», — къыIуагъ АР-м ­и ЛIышъхьэ.
Iофтхьабзэм икIэух КъумпIыл Мурат Урысыем и Следственнэ комитет ­АР-мкIэ иследственнэ гъэIорышIапIэ ипащэхэм, иIофышIэхэм, республикэм следствиемкIэ икъулыкъухэм яIофышIэ пстэуми шIуагъэ къытэу Iоф зэрашIагъэм фэшI «тхьашъуегъэпсэу» ариIуагъ. Хэгъэгум ифедэхэм якъэухъумэнкIэ хьалэлэу Iоф зэрашIагъэм фэшI ветеранхэм зэрафэразэм къыкIигъэтхъыгъ.
ХэбзэухъумэкIо къулыкъухэм яIофышIэ пэрытхэр мыщ щагъэшIуагъэх. Хабзэр амыукъонымкIэ, цIыфхэм яфитыныгъэ­хэмрэ яфедэхэмрэ якъэухъумэнкIэ гъэ­хъагъэхэр зэряIэхэм фэшI щытхъуцIэу «Адыгэ Республикэм изаслуженнэ юрист» зыфиIорэр афагъэшъошагъ УФ-м и Следственнэ комитет АР-мкIэ иследственнэ гъэIорышIапIэ иотдел ипащэу Дмитрий Жеребцовымрэ мэхьанэшхо зиIэ Iофхэм язэхэфын фэгъэзэгъэ отделым иследователэу Темзэкъо Муратрэ.
Хабзэм игъэпытэнкIэ гъэхъагъэхэр зэряIэхэм фэшI АР-м и ЛIышъхьэ и Рэзэныгъэ тхылъ афагъэшъошагъ УФ-м и Следственнэ комитет АР-мкIэ иследственнэ гъэIорышIапIэ Мыекъопэ районымкIэ иотдел иследователэу Бэгъ Бислъан, къалэу МыекъуапэкIэ иотдел иследователь шъхьаIэу Бэгъушъэ Руслъан, Джэджэ следственнэ отделым иследователь шъхьаIэу Елизавета ­Селивановам.
АР-м и Къэралыгъо Совет – Хасэм и Тхьаматэу Владимир Нарожнэри, УФ-м и Следственнэ комитет АР-мкIэ иследственнэ гъэIорышIапIэ ипащэу Василий Ларинри зимэфэкI хэзыгъэунэфыкIыхэрэм къафэгушIуагъэх. IофышIэ пэрытхэм рэзэныгъэ тхылъхэр, къулыкъу тынхэр къафагъэшъошагъэх.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.