Апшъэрэ дзэ еджапIэхэм ачIэхьащтхэм яугъоин фэгъэхьыгъэ пресс-зэIукIэ Мыекъуапэ идзэ комиссариат тыгъуасэ щыкIуагъ. Ар зэрищагъ къалэм идзэ комиссарэу Алексей Санташовым.

— Мы уахътэм апшъэрэ классхэр къэзыухыгъэхэу зыкI ушэтынхэу атыгъэ­хэмкIэ чIэмыхьашъугъэхэр, джащ фэдэу гурыт гъэсэныгъэ колледжхэм, училищ­хэм щызэзыгъэгъотыгъэхэу джы апшъэ­рэ гъэсэныгъэ зиIэ зышIоигъохэр зыкъэ­ухъумэжьынымкIэ Министерствэм иеджапIэхэм ачIэхьанхэшъ, офицер хъунхэм иамал зэрэщыIэр алъыдгъэIэсы тшIоигъу. АщкIэ министерствэм пшъэрылъэу зыдиIыгъыр къэралыгъом ищынэгъончъагъэ ыкIи изыкъэухъумэжьын фытегъэпсыхьэгъэ IофышIэхэр нахьыбэу гъэхьазырыгъынхэр ары, — къыхигъэщыгъ дзэ комиссарэу Алексей Санташовым.
Мыщ шIуагъэу пылъым игугъу къэтшIымэ, апшъэрэ дзэ еджапIэхэм ачIэсыфэхэ Урысыем зыкъэухъумэжьынымкIэ и Министерствэ шапхъэхэм адиштэу ыфэпэщтых, ыгъэшхэщтых, зыщыпсэунхэ аригъэгъотыщт ыкIи ахъщэ тын къаритыщт. Къэзыуххэрэм IофшIэпIэ чIыпIэхэр къафигъотыщтых, лэжьэпкIэ ин къагъэхъэщт, шъуашэу ащыгъыщтыр къаратыщт, зэреджэрэ илъэсхэр яIоф­шIэгъу уахътэ хэхьащтых, дзэкъулыкъу­шIэхэм яфэшъошэ социальнэ фэгъэ­кIотэнхэр ежьхэми, яунагъохэми яIэщтых, къэралыгъо программэм диштэу псэупIэ зэрагъэгъотышъущт, илъэс 20 зытешIэкIэ, пенсием кIощтых.
— ШIоигъоныгъэ зиIэ ныбжьыкIэхэр тызхэт илъэсым шышъхьэIум и 25-м нэс дзэ комиссариатым къекIолIэнхэшъ, лъэIу тхылъ атхын алъэкIыщт, мыщ япсауныгъи щауплъэкIущт, — хигъэунэфыкIыгъ А. Санташовым.
Мы илъэс еджэгъур тштэмэ, респуб­ликэмкIэ нэбгырэ 200 фэдиз, къалэу МыекъуапэкIэ нэбгырэ 50 фэдиз апшъэ­рэ еджапIэхэм ащеджэнхэу кIуагъэх.
Iэшъынэ Сусан.