Къэралыгъо программэу «Тилъэпкъэгъухэу IэкIыб къэралыгъохэм ащыпсэухэ­рэр ежьхэм яшIоигъоныгъэкIэ Адыгэ Республикэм къэкощыжьынхэмкIэ ­IэпыIэгъу афэхъугъэныр» зыфиIорэр пхырыщыгъэным иIофыгъохэм афэгъэхьыгъэу АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр брифинг зэхищагъ.
Тиреспубликэ къэзыгъэзэжьыгъэ ти­лъэпкъэгъухэр щыIэныгъэм зэрэхэгъо­зэжьхэрэм, IэпыIэгъу афэхъугъэнымкIэ зэхэщэн Iофтхьабзэу зэрахьэхэрэм ар къатегущыIагъ. Ащ къызэриIуагъэмкIэ, Урысые Федерацием ипрограммэ диштэу 2019-рэ илъэсым къыщыублагъэу тэ тишъолъыри ар щагъэцакIэ. Программэм ипхырыщын фэгъэзэгъэ къулыкъу пстэуми зэзэгъыныгъэхэр адашIыгъэхэу зэдэ­лажьэх. Ар зыфэIорышIэрэр IэпэIэсэныгъэ ин зыхэлъ тилъэпкъэгъухэу IэкIыб къэралыгъохэм ащыпсэухэрэм тишъо­лъыр къагъэзэжьыныр, республикэм исоциальнэ-­экономикэ хэхъоныгъэ яIахьышIу хашIыхьаныр ары.
Комитетым итхьаматэ къызэриIуагъэм­кIэ, тилъэпкъэгъухэу илъэс 18 хъугъэхэр, Къэралыгъо программэм къыдилъытэрэ шапхъэхэр зыкIуачIэ къыхьыхэрэр зэкIэ мы программэм хэлэжьэнхэ фитых. Тилъэпкъэгъухэу IэкIыб къэралхэм ащыпсэухэрэр УФ-м идипломатическэ ыкIи иконсульскэ IофшIапIэхэу IэкIыб къэралхэм ащыIэхэм занкIэу зафагъэзэн ыкIи Къэралыгъо программэм хэлажьэхэ зэрашIоигъом епхыгъэ лъэIу тхылъыр аратын алъэкIыщт. IэкIыб къэралхэм къарыкIыгъэ тилъэпкъэгъухэу ренэу е охътэ гъэнэфагъэкIэ хабзэр амыукъоу Урысые Федерацием щыпсэухэрэр программэм хэлэжьэнхэмкIэ ялъэIу тхылъхэр АР-м хэгъэгу кIоцI IофхэмкIэ и Министерствэ кощын IофхэмкIэ и ГъэIорышIапIэ фагъэхьых.
— Программэм Iоф зишIэрэ илъэси 6-м къыкIоцI тилъэпкъэгъу нэбгырэ ­340-мэ (программэм хэлэжьэгъэ нэбгыри 125-рэ ыкIи ахэм яунэгъо 215-рэ) Адыгеим къагъэзэжьыгъ. Нахьыбэу къэзыгъэзэжьыгъэхэр урысхэр, адыгэхэр, джащ фэдэу нэмыкI лъэпкъхэри (украинцэхэр, къэндзалхэр, ермэлхэр, казаххэр) ахэтых. Къэкощыжьыгъэхэм нахьыбэрэмкIэ ­илъэс 30-м къыщегъэжьагъэу илъэс 45-м нэс аныбжь. Ахэм мымакIэу ахэтых апшъэрэ гъэсэныгъэ зиIэхэр, яIофшIэнкIэ IэпэIэсэныгъэ зыIэкIэлъхэр, ныбжьыкIэ чанхэр, — къыIуагъ Шъхьэлэхъо Аскэр.
2025-рэ илъэсым тилъэпкъэгъу нэбгырэ 60-мэ (программэм хэлажьэхэу нэбгырэ 15-мэ, унэгъо 45-мэ) Адыгеим псэупIэкIэ къагъэзэжьынэу щыт. Мы илъэсым имэзихэу пыкIыгъэм АР-м хэгъэ­гу кIоцI IофхэмкIэ и Министерствэ иучет нэбгырэ 23-рэ (программэм хэлэжьэрэ нэбгырэ 11 ыкIи ахэм яунэгъо 12) хагъэуцуагъ.
Адыгеим псэупIэкIэ къэкIогъэ тилъэпкъэгъухэм УФ-м игражданствэ яIэ зыхъу­кIэ, мыщ исхэм яфитыныгъэхэр зэкIэ къаратых, джащ фэдэу къэ­ралыгъо программэхэм ахэлэжьэнхэ, япсэупIэ амалхэр нахьышIу ашIынхэ алъэкIы.
Зихэкужъ къэзыгъэ­зэжьыгъэхэр щыIэныгъэм хэгъэгъозэжьыгъэнхэмкIэ мэхьа­нэшхо зиIэхэм ащыщ зыщыпсэущтхэ унэхэр зэрагъэгъотынхэр. Урысые Федерацием зэрицIыфыр къэзыушыхьатырэ гражданствэр цIыфым къызыдихыкIэ, псэупIэ зэрагъэгъотыным епхыгъэ программэхэм ахэлажьэ, зэтыгъо ахъщэ IэпыIэгъу фатIупщы. ТичIыпIэгъухэм ежьхэм яахъщи хагъахъозэ псэупIэхэр ащэфых.
Брифингым фэгъэхьыгъэ къэбар игъэ­кIотыгъэ тигъэзет къыхиутыщт.
КIАРЭ Фатим.