Адыгеим ыкIи Абхъазым ястудентхэр хэлэжьагъэх
IофышIэхэм ягъэхьазырынкIэ еджапIэу «Ход в Будущее» зыфиIорэр Адыгеим мэфиплIэ щыкIуагъ.
Ащ Адыгэ Республикэм ыкIи Абхъаз Республикэм ястудент 50 хэлэжьагъ. Iофтхьабзэм кIэщакIо фэхъугъэх АР-м ныбжьыкIэ IофхэмкIэ и Комитет, Абхъаз Республикэм ныбжьыкIэ IофхэмкIэ ыкIи спортымкIэ икъэралыгъо Комитет, Урысые студент проектэу «Твой Ход» зыфиIорэр. Ар президент платформэу «Россия — страна возможностей» ипроектхэм ащыщ. Iофтхьабзэр УФ-м шIэныгъэмкIэ ыкIи апшъэрэ гъэсэныгъэмкIэ и Министерствэрэ ныбжьыкIэ IофхэмкIэ Федеральнэ агентствэмрэ яIэпыIэгъухэу зэхащэ.
Шъолъыр зэфэшъхьафхэр зэдэлэжьэнхэр, студентхэм яIофшIэгъэ анахь дэгъухэр къыхэгъэщыгъэнхэр ыкIи проектэу «Твой Ход» зыфиIорэм имэхьанэ нахь зэлъягъэшIэгъэныр ары зэхэщакIохэм пшъэрылъ шъхьаIэу яIэр. Iофтхьабзэхэр «Адыгеим иныбжьыкIэхэр» зыфиIорэ Гупчэмрэ Адыгэ къэралыгъо университетымрэ ащыкIуагъэх.
Программэм къыдыхэлъытагъэу гъэсэныгъэ модульхэр щыIагъэх, ахэм ахэхьагъэх тренингхэр, купым хэтэу Iоф зэрашIэщтым фэгъэхьыгъэ блокхэр. Проектым нэIуасэ зэрэфэхъугъэхэм дакIоу Iоф зэрашIэщтыри зэрагъэшIагъ.
— Шъолъырхэм азыфагу зэпхыныгъэ илъыным мэхьанэшхо иI, IэпэIэсэныгъэу аIэкIэлъхэмкIэ зэхъожьынхэ фае. IофышIэхэм ягъэхьазырынкIэ еджапIэу «Ход в Будущее» зыфиIорэр гъэсэныгъэ программэ къодыеп, зэдэгущыIэным, Iоф зэдэшIэгъэным ыкIи шIэныгъэхэмкIэ зэхъожьыгъэным яшIуагъэкIэ ныбжьыкIэ купхэр зэрэзэхэпщэн плъэкIыщтыр ащ къегъэлъагъо. Адыгеим ыкIи Абхъазым ястудентхэр проектым хэщагъэ зэрэхъущтхэм, студент купхэр зэрэзэдэлэжьэщтхэм тицыхьэ телъ, — къыIуагъ Урысые студент проектэу «Твой Ход» зыфиIорэм ипащэу Юлия Епифановам.