Урысые кIэлэцIыкIу гупчэу ­«Орленкэм» щыкIогъэ шIэныгъэ фестивалым нэбгырэ мини 3-м ехъу хэлэжьагъ.

Ахэр Урысыем, Беларусь, Казахстан, Кыргызстан, Кубэ, Молдовэм, Монго­лием, Приднестровскэ, Молдавскэ рес­публикэхэм, Таджикистан ыкIи Узбекистан къарыкIыгъэх. Адыгеим илIыкIоу нэбгырэ 37-рэ ахэм ахэтыгъ.
Iофтхьабзэр шIэныгъэ-гъэгъозэн проектэу «Наука вокруг. Открытия про­должаются» зыфиIорэм къыдыхэлъы­тагъэу Адыгэ къэралыгъо университетым зэхищагъ. Урысые Федерацием гъэсэныгъэмкIэ и Министерствэ игрант ишIуа­гъэкIэ ар къадэхъугъ. «Орленкэм» шIэныгъэ фестивалыр мыгъэ ятIонэрэу щэкIо.
— КIэлэеджакIохэм апае фестивалым тематическэ площадкэхэр къыдыхэ­лъытэгъагъэх, шIэныгъэ документальнэ фильмым еплъыгъэх ыкIи шIэныгъэлэжь цIэрыIохэр лекциехэм къафеджагъэх. Мыщ фэдэ Iофтхьабзэхэм яшIуагъэкIэ, шIэныгъэм илъэныкъо зэфэшъхьафхэм нэIуасэ афэхъух ыкIи хэщагъэ мэхъух, шIэныгъэ ушэтынхэм ахэлажьэх, — къы­Iуагъ проектэу «Наука вокруг. Открытия продолжаются» зыфиIорэм ипащэу, Адыгэ къэралыгъо университетым иректорэу Мамый Даутэ.
Я XXI-рэ лIэшIэгъур технологиякIэхэм ялъэхъан, шIэныгъакIэхэр мафэ къэс щыIэныгъэм къыхэхьэх. Ар къыдалъытэзэ, научнэ шоу зэфэшъхьафхэр, химическэ ушэтынхэр, мастер-классхэр, къэгъэлъэгъонхэр ыкIи квестхэр ныбжьыкIэхэм афызэхащагъэх. ЗэкIэмкIи лагерым тематическэ площадкэ 40
къы­щызэIуахыгъагъ. Интерактивнэ ыкIи джэ­гукIэ шIыкIэм тетэу кIэлэеджакIохэр биологием, физикэм, химием, IT лъэныкъохэм ыкIи хьисапым нахь апэблагъэ хъугъэх.
— Iофтхьабзэ пэпчъ гъэшIэгъонэу кIуагъэ. КIэлэцIыкIухэр шIэныгъэ зэ­фэшъхьафхэм нахь афэщагъэ хъугъэх. Хэ­гъэгум шIэныгъэлэжь ыкIи ушэтэкIо ныбжьыкIэхэр ищыкIагъэх. Хэта зы­шIэрэр, мыхэм ащыщ горэ Ломоносовым фэдэ хъункIи мэхъу, — къыIуагъ Урысые кIэлэцIыкIу гупчэу «Орленкэм» ипащэу Александр Джеус.
«Научная мастерская» зыфиIорэм мэфэ реным Iоф ышIагъ. Ащ химиемкIэ ыкIи физикэмкIэ ушэтынхэр щашIынхэ алъэкIыгъ, хьисапымкIэ, биологиемкIэ, физическэ биатлонымкIэ зэнэкъокъу­-
гъэх. Дрон-баскетбол ешIагъэх ыкIи сурэт­техынымкIэ анахь IэпэIасэр къыщы­хахыгъ «Мир глазами детей» зыфиIорэм.

«Человек в открытом космосе» зыфиIорэм ехьылIагъэу лекцие къафе­джагъ астрономэу, Иркутскэ къэралыгъо университетым и Астрономическэ обсерваторие ипащэу, профессорэу, физикэ-хьисап шIэныгъэхэмкIэ докторэу Сергей Язевыр.
Программэм къыдыхэлъытагъэу ­Ольга Ажнакинам ыгъэуцугъэ документальнэ фильмэу «Виктория» зыфиIорэм еплъы­гъэх. ШIэныгъэлэжь ныбжьыкIэу адэбз узым икъыхэгъэщынкIэ ыкIи иIэзэнкIэ препаратыкIэ къыхэзыхыгъэ Виктория Шипуновам ар фэгъэхьыгъ. Москва дэт физикэ-техническэ институтым ихэу­шъхьафыкIыгъэ лабораторие ар ипащ. Аужырэ илъэсищым лабораторием ишIэ­ныгъэлэжьхэм препарат заулэ къаугуп­шысыгъ, ахэр заушэтыхэм, адэбзым зэрэхахъорэр нахь макIэ ахэм ашIэу агъэунэфыгъ.
ШIэныгъэ фестивалыр интеллектуальнэ джэгукIэу «Стихии науки» зыфиIорэмкIэ аухыгъ.
Адыгэ къэралыгъо университетым ипресс-къулыкъу.