ГъэхъэгъэшIухэр зы­шIыгъэ спорт­смен­хэм ыкIи ахэм ятренерхэм лъытэныгъэ афэшIыгъэныр ти­культурэ изы Iахь хъугъэ.

Адыгэ Республикэм и ЛIы­шъхьэу КъумпIыл Мурат бэмышIэу ригъэблэгъагъэх ыкIи рэзэныгъэ гущыIэхэр ариIуагъ урысые, дунэе зэнэкъокъухэм ащатекIогъэ, хагъэунэфыкIырэ чIыпIэхэр къащызыхьыгъэ тиспортсменхэм ыкIи ахэм ятренерхэм.
Адыгеим имуниципальнэ образованиехэм япащэхэми ащ дырагъэштагъ. Тэхъутэмыкъое рай­он администрацием ипащэу Шъэо Аскэр аIукIагъ самбистхэу Наш Расулрэ СтIашъу Эльдаррэ ыкIи ахэм ятренерэу Джарымэкъо Рустам.
Наш Расул Тэхъутэмыкъое гурыт еджапIэу N 1-р къыухыгъ, самбэмкIэ дунаим и Кубок къыдихыгъ, джащ фэдэу самбэмкIэ дунэе зэнэкъокъухэм дышъэр къащихьыгъ.
СтIашъу Эльдар ныбжьыкIэхэм самбэмкIэ яя VI-рэ гъэмэфэ Спартакиадэ джэрз ме­далыр къыщыфагъэшъошагъ. ЗэIукIэгъум илъэхъан муниципалитетым ипащэ къыхигъэщыгъ районым самбэм зызэрэщиу­шъомбгъурэр.
«Спорт лъэпкъхэм ащыщэу районым анахь зыщыпылъхэр, анахьыбэмэ къыхахырэр самбэр ары. Шъолъыр зэнэкъокъухэм къащыублагъэу дунэе мэхьанэ зиIэхэм анэсыжьэу тиспортсменхэм гъэхъэгъэшхохэр аща­шIых», — къыIуагъ Шъэо Аскэр.
Джащ фэдэу ащ хигъэунэфыкIыгъ Расулрэ Эльдаррэ ягъэ­хъагъэхэм кIалэхэм ягуетыны­гъэрэ тренерэу Джарымэкъо Рустам иIэпэIэсэныгъэрэ зэря­лъапсэр. Район пащэм къыхи­гъэщыгъ тапэкIи муниципалитетым спортым зыщиушъомбгъуным, амалышIухэр кIалэхэм яIэнхэм Iоф зэрэдишIэ-щтыр, гъэхъэгъэшIухэр тиспорт­сменхэм ашIынхэм, районым щытхъу къыфахьыным ицыхьэ зэрэтелъыр.
ЗэIукIэгъум щытегущыIагъэх самбэм районым джыри нахь зыщегъэушъомбгъугъэным фэшI шIэгъэн фаехэм, спортсмен ныбжьыкIэхэм Iоф зыдашIэжьыным пае амалэу арагъэгъотыщтхэм. Наш Расулрэ СтIашъу Эльдаррэ район пащэм, зэIукIэгъум хэлэ­жьагъэхэм къафаIотагъ зэнэкъо­къухэм гупшысэу арагъэ­шIыгъэр, тапэкIэ гухэлъэу яIэхэр ыкIи рай­он администрациер Iэпы­Iэгъу къызэрафэхъу­рэмкIэ зэра­фэразэхэр къыха­гъэщыгъ.
Район пащэм спортсменхэм ыкIи ахэм ятренер рэзэныгъэ тхылъхэр, шIухьафтынхэр ари-­
тыгъ, ныбжьыкIэхэм ахэр щы­сэшIу зэрафэхъухэрэр, тапэкIи дунаим зыцIэ щыраIощт, республикэр зыIэтыщт спортсменхэр районым зэрипIущтхэр кIигъэтхъыгъ.