Адыгеим икъэлэ шъхьаIэ тыгъуасэ хъугъэ-шIэгъэшхо къыщыхъугъ – Успенскэ чылысэу агъэпсырэм тонни 4,5-рэ зихьылъэгъэ одыджын шъхьаIэр щаIэтыгъ.

Iофтхьабзэм хэлэжьагъэх АР-м и ЛIышъхьэу КъумпIыл Мурат, Мыкъуапэ имэрэу Геннадий Митрофановыр, Мые­къуапэрэ Адыгеимрэ яепархие ипащэу, архиепископэу Тихон, АР-мрэ Пшызэ шъолъыррэ ямуфтиеу Къэрдэнэ Аскэрбый, программэу «ЛIыхъужъхэм яуахът» зыфиIорэм хэлажьэу Сергей Ковалевыр, республикэм идин пащэхэр.
Мыекъуапэрэ Адыгеимрэ яепархие къызызэIуахыгъэр илъэс 30 зыщыхъурэм ехъулIэу, Адыгеим и ЛIышъхьэ ­иIэпыIэгъу хэлъэу а одыджынышхор гъэрекIо къызIэкIагъэхьагъ. Ижъырэ технологиехэм атетэу Москва изавод ар щагъэ­чъыгъ. Одыджынышхом ишIын мэзи 4-рэ пылъыгъэх. Святой Троицэм, Пресвятой Богородицэм, Преподобнэ Тихон ясурэт­хэр ащ тешIыхьагъэх.
Адыгеим и ЛIышъхьэ къэзэрэугъоигъэхэм мэфэкIитIумкIэ – чылысым иодыджынышхо зэраIэтыгъэмкIэ, гуащэу Ольгэ и МафэкIэ афэгушIуагъ. КъумпIыл Мурат зэрэхигъэунэфыкIыгъэмкIэ, Успенскэ чылысэу ашIырэри, непэрэ хъугъэ-­шIагъэри гушъхьэлэжьыгъэм, дин зэгурыIоныгъэм, культурэ кIэным якъэухъу­мэн фэIорышIэх.

«ТицIыфхэм ягушъхьэ байныгъэрэ языкIыныгъэрэ ятамыгъэу щыт чылысым иухынкIэ непэ зы лъэбэкъу тэшIы. Чыристанхэм ямызакъоу, зэкIэ республикэм щыпсэухэрэмкIи а хъугъэ-шIагъэм мэхьанэшхо иI. Адыгеим щыпсэурэ цIыфхэу дин зэфэшъхьафхэр зылэжьыхэрэм ядин хабзэхэм, яеплъыкIэхэм шъхьэкIафэ тиреспубликэ щафашIы. Мамырныгъэм, зэгурыIоныгъэм, обществэм хэхъоныгъэ ышIыным алъапсэу ар щыт», — къы­Iуагъ АР-м и ЛIышъхьэ.
Муфтиеу Къэрдэнэ Аскэрбый одыджынышхор зэраIэтыгъэмкIэ чыристанхэм афэгу­шIуагъ, Адыгэ Республикэм ыкIи Пшызэ шъолъыр ащы­псэурэ быслъымэн­хэм ядиндэлэжьапIэрэ епархиемрэ язэпхыныгъэ агъэпытэным зэрэфэхьазырхэр къыIуагъ. Архи­епископэу Тихон зэрэхигъэунэфыкIыгъэмкIэ, Адыгеим ихэбзэ къулыкъухэмрэ идин шъхьа­Iэхэм ялIыкIохэмрэ лъы­тэныгъэ, цыхьэ зэфашIы. Кафедральнэ чылысым ишIынкIэ IэпыIэгъу къа­зэрэфэхъурэм фэшI ­Адыгеим и ЛIышъхьэ зэрэфэразэр ащ къыIуагъ.
Шъугу къэтэгъэкIыжьы Успенскэ чылысым ишIын 1996-рэ илъэсым зэрэфежьэгъагъэхэр, а илъэсым Патриархэу Алексий II-м чылысым ылъапсэ зэриумэхъыгъагъэр. Зи ащ рамышIэу ­уахъти къыхэкIыгъ, 2014-рэ илъэсым респуб­ликэм имылъку IэпыIэгъу ишIуагъэкIэ ащ игъэпсын падзэжьыгъ. Чылысым ишIын непэ ыкIэм фэкIо. Ивановскэ хэкум къыращыгъэ сурэтышIхэм чылысым идэпкъхэм сурэтхэр атырашIыхьэу рагъэжьагъ. МэфэкIышхохэм мыщ Тхьэ щелъэIух. Кафедральнэ чылысым нэбгырэ мини 2,5-рэ фэдиз чIэфэн ылъэ­кIыщт.
Одыджынышхохэр къызыщытеорэ чIыпIэри игъорыгъозэ зэтырагъэпсы­хьагъ. 2018-рэ илъэсым ибэдзэогъу апэрэ одыджынышхоу Богородицэм, Шыихъэу Николай, Архангелэу Михаил, пщэу Владимир ясурэтхэр зытешIыхьагъэр агъэчъыгъ. Одыджынышхуи 10-м щыщэу анахь шъхьаIэр тыгъуасэ аIэтыгъэр ары. Одыджынхэр къызыщытеохэрэ чIыпIэу метрэ 42-рэ зилъэгагъэм одыджынышхор зэрэдахьыягъэм Iоф­тхьабзэм хэлэжьагъэхэр лъыплъагъэх. ЦIыфхэм ямэкъэтын икIэуххэм атетэу, лъэпкъ проектэу «ЩыIэныгъэм пае инфраструктурэр» зыфиIорэм диштэу къи­хьащт илъэсым чылысым къыпэIулъ чIыпIэр зэтырагъэпсыхьащт.
Мыекъуапэрэ Адыгеимрэ яепархие зы хъулъфыгъэ чылыс, зы Спасо-­Иверскэ архиерейскэ унэ, чылыс 83-рэ хэхьэ.
АР-м и ЛIышъхьэ ипресс-­къулыкъу къытырэ къэбархэмкIэ
ЛIышэ Саныет.