Мы илъэсым республикэм ит апшъэрэ еджапIэхэм бюджет чIыпIэу яIэм зэхапшIэу хэхъуагъ.

Адыгэ къэралыгъо университетыр пштэмэ, мыгъэ бюджет чIыпIэ 907-рэ ащ иI. Мыекъопэ къэралыгъо технологическэ университетым — 1460-рэ. Апшъэрэ еджапIэхэм ачIахьэ зышIои­гъохэм ятхылъхэр къырахьылIагъэх. Ахэм азыныкъом Адыгеим ирайонхэм ыкIи икъалэхэм адэт гурыт еджапIэхэр къау­хыгъэх.
— Урысыем ишъолъыр зэфэшъхьаф­хэм къарыкIырэ ныбжьыкIэхэр тиапшъэ­рэ еджапIэхэм ачIахьэ ашIоигъоу къэ­кIох. ТиныбжьыкIэхэм ащыщыбэ къэлэ инхэм адэт апшъэрэ еджапIэхэм ачIэ­хьэх. Анахьэу Москва, Санкт-Петербург, Ростов-на-Дону, Краснодар ыкIи нэ­мыкI къалэхэр къыхахых, — къыIуагъ АР-м и ЛIышъхьэу КъумпIыл Мурат.
Адыгеим «целевой» зыфаIорэ егъэ­джэным мэхьанэшхо зэрэратырэр АР-м и ЛIышъхьэ къыхигъэщыгъ. ШъолъырымкIэ анахь тищыкIэгъэ сэнэхьатхэр шIэныгъэ куу зиIэ ныбжьыкIэхэм зэрагъэгъотых. Ахэм ащыщ псауныгъэр къэухъу­мэгъэным илъэныкъо зэфэшъхьафхэр. Джащ фэдэу предприятиехэм апшъэрэ еджапIэхэм закъыфагъазэзэ, нахь ­ящыкIэгъэ IофышIэхэр агъэхьазырых. Апшъэрэ еджэпIитIумэ сэнэхьат зэ­фэшъхьафхэм ыкIи спортым япхыгъэ гупчэхэр ахэтых. Ахэм студентхэм шIэ­ныгъэ зэращызэрагъэгъотырэм имызакъоу, IофшIэнымкIэ шIуагъэ къэзы­хьыщт лъэныкъохэр арагъашIэх, физическэ культурэм нахь пылъынхэ амал къараты. Къыхэгъэщыгъэн фае Мыекъопэ къэралыгъо технологическэ университетым и Дзэ егъэджэн гупчэ икурсантхэми гъэсэныгъэ тедзэ зэра­гъэгъотын зэралъэкIыщтыр.
Мыекъопэ къэралыгъо технологическэ университетым мы илъэсым бюджет чIыпIэу иIэм зэхапшIэу къыхэхъуагъ. Непэрэ мафэм ехъулIэу апшъэрэ еджапIэм (поселкэу Яблоновскэм дэтыр хэтэу) бакалавриатым ыкIи специа­литетым ачIахьэ зышIоигъо нэбгырэ 2864-м ехъумэ, апшъэрэ еджапIэм иполитехническэ колледжэу Мыекъуапэ дэтым — нэбгырэ 1400-рэ, Яблоновскэм дэтым нэбгырэ 637-мэ ятхылъхэр къарахьылIагъэх.
Мы илъэсым специалистхэр афагъэ­хьазырынхэу фаехэу организацие зэфэшъхьафхэр къяолIагъэх. Ахэм ащыщых АР-м псауныгъэр къэухъумэгъэнымкIэ и Министерствэ, Iэзэн-профилактикэ учреждениеу Краснодар краим итхэм ащыщхэр. Джащ фэдэу инженерием
ыкIи мэкъумэщ лъэныкъохэмкIэ Iоф зышIэщтхэм ягъэхьазырыни ыуж ихьащтых.
Сервисэу «ПэIудзыгъэ шIыкIэм тетэу апшъэрэ еджапIэм чIахь» зыфиIорэм ишIуагъэкIэ Адыгеим имызакъоу, нэ­мыкI чIыпIэхэм къарыкIыхэрэри апшъэрэ еджапIэм бэу къычIэхьэх. Хабзэ зэрэ­хъугъэу, анахь къызэкIолIагъэхэр медицинэ институтыр ары. Джащ фэдэу инженер-техническэ сэнэхьатхэм, чIыгулэжьыным ыкIи кадастрэм, къэбар­лъыгъэIэс–аналитическэ системэм ищы­нэгъончъагъэ нахь къыхахыхэрэм ащыщ. Ащ нэмыкIэу, мэкъу-мэщым епхыгъэ сэнэхьатхэр, псэолъэшIыным, электроэнергетикэм, электротехникэм япхыгъэ факультетхэм бэ къякIуалIэрэр.
Адыгэ къэралыгъо университетым нэбгырэ мини 3-м ехъумэ ятхылъхэр рахьылIагъэх, ащ щыщэу 2380-м ехъур УФ-м щыщых, 620-р IэкIыб къэралхэм къарыкIыщтых. Пчъагъэр джыри зэхъо­кIын ылъэкIыщт. Бюджет мылъкукIэ еджэщтхэм ятхылъхэр бэдзэогъум и 25-м нэс рахьылIэнэу щыт.
Хабзэ зэрэхъугъэу, IэкIыб къэралхэм къарыкIыхэрэр бэу апшъэрэ еджапIэм къекIуалIэх. Туркменистан ыкIи Узбекистан къарыкIыхэрэр мыгъэ нахьыбэх. Урысыем шIэныгъэмкIэ и Министерствэ иквотэкIэ Замбием ыкIи Иорданием нэбгырэ зырыз къарыкIыщт.

ДЕЛЭКЪО Анет.